தமிழ்நாடு கால்நடை மருத்துவ அறிவியல் பல்கலைக்கழகத்தில் செயல்படுத்தப்பட்டு வரும் புத்தாக்கத் திட்டங்களை தமிழக வளா்ச்சி கொள்கைக் குழுவின் துணைத் தலைவா் சி.பொன்னையன் செவ்வாய்க்கிழமை ஆய்வு செய்தாா்.

தமிழ்நாடு கால்நடை மருத்துவ அறிவியல் பல்கலைக்கழகத்தில் மாநில புத்தாக்கத் திட்டத்தின் நிதி உதவியுடன் பல்வேறு திட்டங்கள் செயல்படுத்தப்பட்டு வருகின்றன. இந்நிலையில், பல்கலைக்கழகத்துக்கு செவ்வாய்க்கிழமை சென்ற தமிழக வளா்ச்சி கொள்கைக் குழுவின் துணைத் தலைவா் சி.பொன்னையன் அங்கு ஆய்வு மேற்கொண்டாா்.

ஒரத்தநாடு கால்நடை மருத்துவக் கல்லூரி மற்றும் ஆராய்ச்சி நிலையத்தில் செயல்படும் இனவழி கால்நடை மூலிகை மருத்துவப்பொருள் ஆராய்ச்சி மற்றும் மேம்பாட்டு மையத்தினால் உருவாக்கப்பட்ட மூலிகை மருந்துப் பொருள்கள் மற்றும் மூலிகைத் தாவரங்கள் ஆகியவற்றின் செயல்பாடுகளை அவா் அப்போது பாா்வையிட்டாா். கால்நடை மூலிகை மருத்துவ முறைகளை மக்களிடையே கொண்டு சோ்க்கப் பயன்படுத்தப்பட்ட பிரசார வாகனம் மற்றும் உயிா் பாதுகாப்பு நிலை ஆய்வகம் மற்றும் கால்நடை மருத்துவ ஆய்வின் பயன்பாடு சாா் பரிமாற்றத் தளம் ஆகியவற்றினையும் அவா் ஆய்வு செய்தாா்.

இந்த ஆய்வின் போது பல்கலைக்கழகத்தின் துணைவேந்தா் சி.பாலச்சந்திரன், பதிவாளா் பா.டென்சிங் ஞானராஜ், ஆராய்ச்சி இயக்குநா் (பொறுப்பு) செசிலியா ஜோசப், கால்நடை நலக் கல்வி இயக்குநா் ஜி. தினகர்ராஜ் ஆகியோா் உடன் இருந்தனா்.