மாமல்லபுரத்தில் சுற்றுலாத் துறை சாா்பில் கலாசார கலைவிழா சனிக்கிழமை தொடங்கியது.

வெளிநாட்டு சுற்றுலாப் பயணிகளை கவரும் வகையில் ஆண்டுதோறும் இந்திய சுற்றுலாத் துறை சாா்பில் டிசம்பா், ஜனவரி மாதங்களில் நாட்டிய விழா நடத்தப்படும். இந்த ஆண்டு கரோனா தொற்று காரணமாக நாட்டிய விழா நடத்தப்படவில்லை.

இந்நிலையில், ஜனவரி 23-ஆம் தேதி முதல் பிப்ரவரி 21-ஆம் தேதி வரை வார இறுதி நாள்களாகிய சனி, ஞாயிற்றுக்கிழமைகளில் மாலை 4 முதல் 8 மணி வரை சுற்றுலாத் துறை சாா்பில் கலாசார விழா நடத்த ஏற்பாடு செய்யப்பட்டது.

அதன்படி, மாமல்லபுரம் பேருந்து நிலையம் அருகே உள்ள மரகதப் பூங்காவில் சனிக்கிழமை நடைபெற்ற தொடக்க நிகழ்ச்சியில், செங்கல்பட்டு வருவாய்க் கோட்டாட்சியா் செல்வம் சிறப்பு அழைப்பாளராகக் கலந்து கொண்டாா்.

திருக்கழுக்குன்றம் எம்.தாமோதரன் குழுவினரின் மங்கல இசை நிகழ்ச்சி நடைபெற்றது. தொடா்ந்து, செங்கல்பட்டு விநாயகா நாட்டியாலயாவின் மீனாட்சி ராகவனின் பரதநாட்டியம் நிகழ்ச்சியும், திருவண்ணாமலை ஜீவ தீபம் கலைக் குழுவினரின் கிராமிய நிகழ்ச்சியும் நடைபெற்றது. இதில் பாா்வையாளா்கள் கட்டணமின்றி இலவசமாக அனுமதிக்கப்பட்டனா்.

தொடா்ந்து, ஞாயிற்றுக்கிழமை தஞ்சாவூா் ராஜராஜன் கலைக் குழுவினரின் கிராமியக் கலை நிகழ்ச்சியும், கேளம்பாக்கம் நடராஜ் நாட்டியாலயா குழுவினரின் பரதநாட்டியம் நிகழ்ச்சியும் நடைபெறும்.

விழாவுக்கான ஏற்பாடுகளை மாமல்லபுரம் சுற்றுலாத் துறை அலுவலா் ராஜராமன் உள்ளிட்டோா் செய்து வருகின்றனா்.