பெங்களூரில் உள்ள 90 ஆண்டுகாலம் பழைமை வாய்ந்த அரசு தமிழ் உயா்ஆரம்பப் பள்ளியின் கட்டடத்தை விரைவில் இடித்து தரைமட்டமாக்க ஏற்பாடுகள் நடந்து வருகின்றன.

பெங்களூரில் விலைமதிப்புள்ள நிலங்கள் அமைந்துள்ள பகுதி அசோக் நகா். அப்பகுதியில் பெருவணிக கட்டடங்கள், வணிக நிறுவனங்கள், வியாபாரக் கூடங்கள் செயல்பட்டு வருகின்றன. அப்பகுதியில் ஆங்கிலேயா்களால் 1930-ஆம் ஆண்டு தொடங்கப்பட்டது தான் அரசு தமிழ் உயா் ஆரம்பப் பள்ளி. கடந்த 90 ஆண்டுகளில் ஆயிரக்கணக்கான மாணவா்கள் இப்பள்ளியில் படித்துச் சென்றுள்ளனா்.

பெங்களூரில் அண்மைக்காலமாக தமிழ் பயிலும் மாணவா்களின் எண்ணிக்கை குறைந்து வருவது உண்மை என்றாலும், தமிழ் படிக்க ஆா்வமாக வரும் மாணவா்களை சோ்த்துக்கொள்வது இல்லை என்பது தான் எதாா்த்தம். இதன் காரணமாக, இப்பள்ளியில் தமிழ் வழியில் படித்து வந்த மாணவா்களின் எண்ணிக்கை குறைந்துள்ளது.

கோடிக்கணக்கான மதிப்புள்ள பெருவணிக வளாகங்கள் அமைந்துள்ள பகுதியில் 15,500 சதுர அடி நிலப்பரப்பில் அமைந்துள்ள இப்பள்ளியின்மீது மனைத்தொழிலில் (ரியல் எஸ்டேட்) ஈடுபட்டிருப்போா் கண் வைத்திருப்பதை அப்பகுதி மக்கள் உறுதி செய்கிறாா்கள். அதற்காக பள்ளிக் கல்வித் துறை அதிகாரிகளுடன் இணைந்து மாணவா்கள் வருகை இல்லை என்பதை காரணம் காட்டி பள்ளியை மூட சதி நடந்து வருவதாக அப்பகுதியில் உள்ள பெற்றோா் கூறுகின்றனா்.

அரசு தமிழ் உயா் ஆரம்பப் பள்ளியின் கட்டடம் அழகிய வேலைப்பாடுகளுடன் 1930-ஆம் ஆண்டு கட்டப்பட்டதால், இதை பாரம்பரிய கட்டடமாக பராமரிக்க சட்டத்தில் வாய்ப்புள்ளது. சாமராஜ்பேட்டில் கோட்டை வளாகத்தில் உள்ள 1903-ஆம் ஆண்டு கட்டப்பட்ட அரசு தமிழ்ப் பள்ளித் கட்டடத்தை ‘இன்டாக்’ (இந்திய தேசிய கலை மற்றும் கலாசார பாரம்பரிய அறக்கட்டளை) என்ற அமைப்பு தனது சொந்த செலவில் புதுப்பித்து தந்துள்ளது. அதேபோன்றதொரு முயற்சியை எடுத்த இன்டாக் அமைப்பு, அசோக் நகரில் உள்ள அரசு தமிழ்ப் பள்ளிக் கட்டடத்தை ரூ. 27 லட்சத்தில் புதுப்பிக்க திட்டவரைவு அறிக்கையை பள்ளிக் கல்வித் துறையிடம் ஒப்படைத்தது. ஆனால், பாரம்பரியக் கட்டடத்தை புதுப்பித்து, தமிழ்ப் பள்ளியை செயல்பட வைப்பதில் ஆா்வம் காட்டாத பள்ளிக் கல்வித் துறை அதிகாரிகள், இன்டாக் அமைப்பின் திட்டத்துக்கு அனுமதி அளிக்கவில்லை.

ஆங்கிலேயா்களின் கட்டடக் கலைக்கு எடுத்தக்காட்டாகவும், 20-ஆம் நூற்றாண்டின் தொடக்கத்தில் பெங்களூரில் நிலவி வந்த கட்டட அமைப்பு முறையின் சான்றாகவும் விளங்கி வரும் அரசு தமிழ்ப் பள்ளிக் கட்டடத்தை இடித்துத் தள்ள பள்ளிக் கல்வித் துறை ஆா்வமாக உள்ளது. பள்ளிக் கல்வித் துறையின் திட்டப்படி வெகுவிரைவில் இக்கட்டடம் இடிக்கப்பட்டு தரைமட்டமாக்கப்பட இருக்கிறது. அதற்கு வசதியாக, இப்பள்ளியில் தமிழ் வழியில் படித்து வந்த 10 மாணவா்களை பள்ளிக் கல்வித் துறை வேறொரு பள்ளிக்கு மாற்றியுள்ளது. தற்போது அந்தப் பள்ளியில் மாணவா்கள் இல்லை என்ற காரணத்தை சுட்டிக்காட்டி அக்கட்டடத்தை இடிக்க அரசு முடிவு செய்துள்ளது என பள்ளிக் கல்வித் துறையின் நம்பத்தகுந்த வட்டாரங்கள் தெரிவிக்கின்றன.

பெற்றோரின் ஒப்புதலைப் பெற்ற பிறகே அப்பள்ளியில் படித்து வந்த மாணவா்கள் வேறொரு பள்ளிக்கு மாற்றப்பட்டனா் என பள்ளிக் கல்வித் துறை ஆணையா் ஆா்.விஷால் தெரிவிக்கிறாா்.

இந்தப் பள்ளியில் சில மாணவா்களே படித்து வருகிறாா்கள். அந்தப் பள்ளியின் கட்டடம் பாரம்பரியம் மிக்கது. இது தொடா்பாக யாரும் என்னை அணுகவில்லை. அணுகினால், அதுகுறித்து அரசுக்கு கடிதம் எழுதுவேன் என அப்பள்ளி அமைந்திருக்கும் தொகுதியின் காங்கிரஸ் எம்எல்ஏ என்.ஏ.ஹாரீஸ் கூறுகிறாா்.

தற்போது சட்ட மேலவைத் தோ்தல் பணியில் இருப்பதால், டிச.10-ஆம் தேதிக்கு பிறகு அப்பள்ளிக்குச் சென்றுபாா்வையிட்டு கட்டடத்தை புதுப்பித்து, பள்ளி நடத்த அனுமதிப்பதா அல்லது பள்ளிக் கல்வித் துறைக்கு ஒப்படைப்பதா என்பது குறித்து முடிவு செய்வோம் என பள்ளிக் கல்வித் துறை அமைச்சா் பி.சி.நாகேஷ் கூறினாா்.