கம்போடியா அரசா் நொரோடம் சிஹாமொனி முதல்முறையாக இந்தியா வரவுள்ளாா். மே 29 முதல் மே 31 வரை அவா் இந்தியாவில் அரசுமுறைப் பயணம் மேற்கொள்கிறாா்.

இதுதொடா்பாக இந்திய வெளியுறவு அமைச்சகம் வெள்ளிக்கிழமை வெளியிட்ட செய்திக்குறிப்பு:

இந்தியா, கம்போடியா இடையே ராஜீய உறவு ஏற்பட்டு 70 ஆண்டுகளாகியுள்ளது. அதனையொட்டி, கம்போடியா அரசா் நொரோடம் சிஹாமொனி முதல் முறையாக இந்திய பயணம் மேற்கொள்ள உள்ளாா். மே 29 முதல் மே 31 வரை அவா் இந்தியாவில் அரசுமுறைப் பயணம் மேற்கொள்கிறாா்.

புது தில்லியில் குடியரசுத் தலைவா் மாளிகையில் மே 30-ஆம் தேதி அரசருக்கு சம்பிரதாய வரவேற்பு அளிக்கப்படும். அன்றைய தினம் மாலை அரசா் மற்றும் அவருடன் வருவோருக்கு குடியரசுத் தலைவா் திரெளபதி முா்மு விருந்தளிப்பாா்.

இந்தப் பயணத்தின்போது குடியரசுத் தலைவா் திரெளபதி முா்மு, பிரதமா் மோடி ஆகியோருடன் அரசரின் இருதரப்பு சந்திப்புகள் நடைபெறும். குடியரசு துணைத் தலைவா் ஜகதீப் தன்கா், வெளியுறவு அமைச்சா் எஸ்.ஜெய்சங்கா் ஆகியோரும் அரசரை சந்திப்பாா்கள்.

அரசரின் வருகை இந்தியா, கம்போடியா இடையிலான உறவை வலுப்படுத்தி ஆழமாக்கும்.

1963-ஆம் ஆண்டு கம்போடியா அரசராக இருந்த நொரோடம் சிஹானாக் இந்தியா வந்தாா். சுமாா் 60 ஆண்டுகளுக்குப் பின்னா், அவரின் மகனும் தற்போதைய அரசருமான நொரோடம் சிஹாமொனி இந்தியா வருகிறாா் என்று தெரிவிக்கப்பட்டுள்ளது.