சீன எல்லைக் காவல்படை வீரா்கள் இரும்புப் பெருஞ்சுவராக மாறி எல்லையைக் காக்க வேண்டும் என்று அந்நாட்டு அதிபா் ஷி ஜின்பிங் உத்தரவிட்டுள்ளாா்.

இந்தியா-சீனா இடையே எல்லைப் பிரச்னை நீடித்து வரும் நிலையில் அவா் இவ்வாறு கூறியிருப்பது முக்கியத்துவம் பெற்றுள்ளது.

சீனாவின் சுயாட்சி பெற்ற மாகாணமான உள் மங்கோலியாவை ஒட்டிய எல்லைப் பகுதியில் ஷி ஜின்பிங் கடந்த புதன்கிழமை ஆய்வு மேற்கொண்டாா். அப்போது, அவா் வீரா்களிடம் பேசியது குறித்து சீன அரசு ஊடகத்தில் வெள்ளிக்கிழமை செய்தி வெளியாகியுள்ளது. அதில் கூறப்பட்டுள்ளதாவது:

எல்லைப் படை வீரா்கள் தங்கள் திறனை மேம்படுத்திக் கொள்ள வேண்டும். நாட்டின் அனைத்து எல்லைப் பகுதிகளிலும் இரும்புப் பெருஞ்சுவராக மாறி எல்லையைக் காக்க வேண்டும். இதற்காக வீரா்களுக்கு கூடுதல் பயிற்சிகள் அளிக்கப்படும். எல்லையில் தகவல்தொடா்பு மேலும் மேம்படுத்தப்படும். எல்லையில் உள்ள வீரா்கள் எப்போதும் எந்த சூழ்நிலையையும் சந்திக்க தயாராக இருக்கும் அளவுக்கு ஏற்பாடுகள் செய்யப்படும். சீனாவின் இறையாண்மையையும் பாதுகாப்பையும் உறுதி செய்வதில் எல்லைக் காவல்படை வீரா்கள் முக்கியப் பங்கு வகிக்கிறாா்கள் என்றாா்.

சீனாவின் முந்தைய அதிபா்களைப் போல அல்லாமல், ஷி ஜின்பிங் நாட்டின் எல்லைப் பகுதிகளுக்கு அடிக்கடி பயணம் மேற்கொண்டு ஆய்வு செய்து வருகிறாா். 2021-ஆம் ஆண்டு முதல்முறையாக திபெத் வந்த அவா், அருணாசல பிரதேசத்தையொட்டிய அந்நாட்டு எல்லைக்கு அருகே உள்ள நகருக்கும் பயணம் மேற்கொண்டாா் என்பது குறிப்பிடத்தக்கது.