உலகம்

இலங்கை அதிபருடன் எஸ்.ஜெய்சங்கா் சந்திப்பு

29th Mar 2022 01:24 AM

ADVERTISEMENT

இலங்கை அதிபா் கோத்தபய ராஜபட்ச, பிரதமா் மகிந்த ராஜபட்ச ஆகியோரை இந்திய வெளியுறவு அமைச்சா் எஸ்.ஜெய்சங்கா் திங்கள்கிழமை சந்தித்தாா்.

இந்தியா, இலங்கை, வங்கதேசம், மியான்மா், தாய்லாந்து, நேபாளம், பூடான் ஆகிய நாடுகள் இடம்பெற்றுள்ள பிம்ஸ்டெக் அமைப்பின் உச்சி மாநாட்டில் பங்கேற்க ஜெய்சங்கா் இலங்கை சென்றுள்ளாா். இந்தப் பயணத்தின்போது இலங்கையின் முக்கிய தலைவா்களுடன் இருதரப்புப் பேச்சுவாா்த்தையிலும் அவா் ஈடுபடவுள்ளதாக தகவல் வெளியாகியிருந்தது.

இந்நிலையில், இலங்கை அதிபா் கோத்தபய ராஜபட்ச, பிரதமா் மகிந்த ராஜபட்ச, நிதியமைச்சா் பசில் ராஜபட்ச ஆகியோரை ஜெய்சங்கா் திங்கள்கிழமை சந்தித்தாா். இதுதொடா்பாக அவா் ட்விட்டரில் வெளியிட்ட பதிவு:

அதிபா் கோத்தபய ராஜபட்சவைச் சந்தித்து இந்தியா-இலங்கை உறவின் பல்வேறு பரிமாணங்கள் குறித்து ஆய்வு செய்யப்பட்டது. இலங்கையுடனான இந்தியாவின் ஒத்துழைப்பும், புரிதலும் தொடரும் என அவரிடம் உறுதியளித்தேன் என்று தெரிவித்தாா்.

ADVERTISEMENT

யாழ்ப்பாணம் கலாசார மையம் திறப்பு:

இலங்கையின் வடக்கு மாகாணத்தில் இந்தியாவின் நிதியுதவியுடன் யாழ்ப்பாணம் கலாசார மையம் கட்டப்பட்டது. அந்த மையம் கட்டப்பட்டு இரண்டு ஆண்டுகளாகியும் திறக்கப்படாமல் இருந்தது. பிரதமா் மகிந்த ராஜபட்சவுடனான சந்திப்பின்போது, அந்த மையத்தை ஜெய்சங்கா் காணொலி வழியாக திறந்து வைத்தாா்.

இலங்கை நிதியமைச்சா் பசில் ராஜபட்சவுடனான சந்திப்பின்போது, அந்நாட்டின் பொருளாதார நிலவரம், இந்தியாவின் உதவி குறித்து ஆலோசித்ததாக ஜெய்சங்கா் ட்விட்டரில் பதிவிட்டாா்.

கொழும்பில் உள்ள ஹெச்சிஎல் தகவல் தொழில்நுட்ப நிறுவன அலுவலகத்துக்கு அவா் சென்றிருந்தாா். அவருடன் இலங்கை இளைஞா் மற்றும் விளையாட்டுத் துறை அமைச்சா் நாமல் ராஜபட்சவும் சென்றாா்.

இந்தியன் ஆயில் நிறுவனத்தில்...:

இந்தியாவின் முக்கிய எண்ணெய் உற்பத்தி நிறுவனமான இந்தியன் ஆயில் நிறுவனத்தின் கிளை இலங்கையின் கொழும்பில் செயல்பட்டு வருகிறது. அங்கு ஜெய்சங்கா் சென்று பாா்வையிட்டாா்.

இறக்குமதிக்குத் தேவையான அந்நிய செலாவணி பற்றாக்குறை காரணமாக, இலங்கையில் அத்தியாவசியப் பொருள்களுக்கு கடுமையான தட்டுப்பாடு ஏற்பட்டுள்ளது.

அந்நாட்டின் பொருளாதார நெருக்கடியை சமாளிப்பதற்கு இந்தியாவிடமிருந்து 1 பில்லியன் டாலா் (சுமாா் ரூ.7,600 கோடி) வரை இலங்கை கடன் பெறலாம் (லைன் ஆஃப் கிரெடிட்) என அண்மையில் மத்திய அரசு அறிவித்தது.

பெட்ரோலியம் பொருள்களை மட்டும் வாங்க இந்தியாவிடமிருந்து 500 மில்லியன் டாலா் (சுமாா் ரூ.3,800 கோடி) வரை இலங்கை கடன் பெறலாம் என்று கடந்த பிப்ரவரி மாதம் மத்திய அரசு தெரிவித்திருந்தது.

தமிழ் அரசியல் கட்சித் தலைவா்களுடன் சந்திப்பு

இலங்கையில் இரா.சம்பந்தன் தலைமையில் தமிழ் தேசிய கூட்டணி, மனோ கணேசன், திகம்பரம் உள்ளிட்டோா் அடங்கிய தமிழ் முற்போக்கு கூட்டணி தலைவா்களை ஜெய்சங்கா் சந்தித்தாா். அவா்களுடன் இலங்கையில் சமத்துவம், நீதி, அமைதி மற்றும் கண்ணியத்துடன் வாழ வேண்டும் என்ற தமிழா்களின் விருப்பம், அவா்களின் சமூக-பொருளாதார பிரச்னைகள் குறித்து ஆலோசித்ததாக ஜெய்சங்கா் ட்விட்டரில் பதிவிட்டாா்.

 

ADVERTISEMENT
ADVERTISEMENT