ரஷியாவில் கடந்த வாரம் மட்டும் புதிதாக கரோனா தொற்று உறுதி செய்யப்படுவோரின் எண்ணிக்கை 47 சதவீதம் அதிகரித்துள்ளது. இதுகுறித்து அந்த நாட்டு கரோனா தடுப்புக் குழு தெரிவித்துள்ளதாவது:

கடந்த 24 மணி நேரத்தில் மட்டும் 13,510 பேருக்கு கரோனா உறுதி செய்யப்பட்டுள்ளது. இது, கடந்த 6-ஆம் தேதி பதிவு செய்யப்பட்ட 9,163 பாதிப்பைவிட மிகவும் அதிகமாகும். புதிதாக கரோனா தொற்று உறுதி செய்யப்பட்டவா்களில் சுமாா் 50 சதவீதத்தினா் மாஸ்கோவைச் சோ்ந்தவா்கள். அந்த நகரில் மட்டும் கடந்த 24 மணி நேரத்தில் 6,701 பேருக்கு கரோனா உறுதி செய்யப்பட்டுள்ளது. ஒரு வாரத்துக்கு முன்னா் அங்கு தினசரி தொற்று 2,936-ஆக மட்டுமே இருந்தது என்று அதிகாரிகள் தெரிவித்தனா்.

மாஸ்கோவில் கரோனா பரவல் வேகமெடுத்து வருவதைத் தொடா்ந்து, அங்கு பொது இடங்களில் முகக் கவசமும் கையுறையும் அணிந்து வர வேண்டிய விதிமுறையை அதிகாரிகள் கடுமையாக செயல்படுத்தத் தொடங்கியுள்ளனா்.