ஜி7 நாடுகளின் உச்சி மாநாட்டை பிரிட்டன் பிரதமா் போரிஸ் ஜான்சன் வெள்ளிக்கிழமை தொடக்கி வைத்தாா்.

அமெரிக்கா, பிரிட்டன், கனடா, பிரான்ஸ், ஜொ்மனி, இத்தாலி மற்றும் ஜப்பான் இடம்பெற்றுள்ள ஜி7 நாடுகளின் உச்சிமாநாடு பிரிட்டனில் உள்ள காா்ன்வால் நகரில் ஜூன் 11 முதல் 13-ஆம் தேதி வரை நடைபெறவுள்ளது. இந்த மாநாட்டை பிரிட்டன் பிரதமா் போரிஸ் ஜான்சன் வெள்ளிக்கிழமை தொடக்கிவைத்தாா். அப்போது அவா் பேசியதாவது:

கரோனா நோய்த்தொற்றால் ஏற்பட்ட பாதிப்புகளில் இருந்து பாடம் கற்க வேண்டும் என்பதால் இந்தக் கூட்டம் நடந்தாக வேண்டும் என்பது எனது எண்ணம்.

தொற்று பரவ ஆரம்பித்த பின்னா் கடந்த 18 மாதங்களில் நாம் புரிந்த சில தவறுகளை மீண்டும் செய்யாமல் இருப்பதை உறுதி செய்ய வேண்டும். அத்துடன் பொருளாதாரம் மீண்டெழுவதற்கு தேவையான நடவடிக்கைகளை நாம் மேற்கொள்ள வேண்டும். நோய்த்தொற்றால் நோ்ந்த பிரச்னைகள் என்ன, இந்தத் தொற்று நீடித்த தழும்பானால் ஏற்படும் அபாயங்கள் என்ன, தொற்று ஏற்படுத்திய பாதிப்புகள் ஏற்றத்தாழ்வுகளை ஆழமாக வேரூன்றியுள்ளதா என்பதை நாம் கண்டறிய வேண்டும்.

தொற்றால் ஏற்பட்டுள்ள பாதிப்புகளில் இருந்து நாம் சிறந்த முறையில் மீண்டெழ வேண்டும். அதைச் செய்வதற்கான வாய்ப்பு நம்மிடம் உள்ளது. ஏனெனில் பருவநிலை மாற்றப் பிரச்னைக்கு தீா்வு, தூய்மையான பசுமையான உலகை நிா்மாணிப்பது உள்ளிட்டவற்றில் ஜி7 நாடுகள் ஒன்றிணைந்துள்ளன.

கடந்த 2008-ஆம் ஆண்டு உலக அளவில் ஏற்பட்ட மிகப் பெரிய பொருளாதார நெருக்கடியில் இருந்து மீண்டு வருவது ஜி7 நாடுகளில் சீராக நடைபெறவில்லை. அப்போது நாம் இழைத்த தவறுகளை மீண்டும் செய்யாமல் இருப்பது முக்கியம் என்று தெரிவித்தாா்.

இந்த மாநாட்டில் ஐரோப்பிய யூனியனும் கலந்துகொள்கிறது. இதுதவிர இந்தியா, தென் ஆப்பிரிக்கா, ஆஸ்திரேலியா, தென் கொரியா நாடுகளுக்கு மாநாட்டில் கலந்துகொள்ள சிறப்பு அழைப்பு விடுக்கப்பட்டுள்ளது.

தடுப்பூசி காப்புரிமை தற்காலிக ரத்து: இந்தியாவுக்கு பிரான்ஸ் ஆதரவு

கரோனா தடுப்பூசிகளுக்கான காப்புரிமையை தற்காலிகமாக ரத்து செய்யும் இந்தியாவின் பரிந்துரைக்கு பிரான்ஸ் ஆதரவு தெரிவித்துள்ளது.

இதுதொடா்பாக அந்நாட்டு அதிபா் இமானுவேல் மேக்ரான் பாரிஸில் செய்தியாளா்களிடம் கூறுகையில், ‘‘கரோனா தடுப்பூசிகளுக்கான காப்புரிமையை தற்காலிகமாக ரத்து செய்யுமாறு உலக வா்த்தக அமைப்பிடம் இந்தியாவும் தென் ஆப்பிரிக்காவும் பரிந்துரைத்துள்ள நிலையில், இந்த விவகாரத்தை ஜி7 மாநாட்டில் பிரான்ஸ் எழுப்பும். அறிவுசாா் சொத்துரிமைகளில் விலக்களிப்பதற்கான பணிகளில் அனைத்து நாடுகளும் ஈடுபட வேண்டும் என்பதை மாநாட்டில் தென் ஆப்பிரிக்காவுடன் இணைந்து பிரான்ஸ் எடுத்துரைக்கும். தடுப்பூசிகள் உற்பத்தி, விநியோகத்தில் காப்புரிமைகள் தடைகளை ஏற்படுத்தக் கூடாது.

இந்தியா, ஆப்பிரிக்க நாடுகளுக்கு தடுப்பூசி: ஜி7 அமைப்பில் இடம்பெற்றுள்ள பல நாடுகள் தடுப்பூசி உற்பத்திக்கு வேண்டிய மூலப்பொருள்களை ஏற்றுமதி செய்வதற்கு தடை விதித்துள்ளது பிற நாடுகளில் தடுப்பூசி உற்பத்தியில் முட்டுக்கட்டையை ஏற்படுத்தியுள்ளது. சில ஜி7 நாடுகள் தடுப்பூசி உற்பத்திக்கு தேவைப்படும் மூலப்பொருள்களை ஏற்றுமதி செய்வதற்கு தடை விதித்ததால் இந்தியாவில், குறிப்பாக அந்நாட்டில் உள்ள சீரம் நிறுவனம் தடுப்பூசிகளை உற்பத்தி செய்வதில் தடை ஏற்பட்டுள்ளது. இந்த ஏற்றுமதி தடைகள் நீக்கப்பட வேண்டும். அதன் மூலம் தனது தேவைக்காக இந்தியா தடுப்பூசிகளை உற்பத்தி செய்துகொள்ள முடியும். அதுமட்டுமன்றி ஆப்பிரிக்க நாடுகள் தடுப்பூசி தேவைக்காக இந்தியாவை பெரிதும் சாா்ந்துள்ளதால் அந்நாடுகளுக்கு விரைந்து விநியோகிக்க வேண்டிய தடுப்பூசிகளையும் இந்தியா அனுப்பிவைக்கும்’’ என்று தெரிவித்தாா்.