குன்றசைந்து வருவதுபோல்
யானையாரே! - எழிற்
கோலங்கொண்டு தெருவில் வரும்
யானையாரே!
நின்று நின்று காசு வாங்கும்
யானையாரே! - உம்மை
நெருங்கி நின்று பார்க்கட்டுமா
யானையாரே!
காடுவிட்டு நாடு வந்த
யானையாரே! - அந்தக்
காரணத்தைச் சொல்லிடுவீர்
யானையாரே!
பாடுபட்டு உழைப்பதற்கு
யானையாரே - நன்கு
பழக்கப்பட்டுப் போனீரோ
யானையாரே!
தும்பிக்கையை நீட்டி நீட்டி
யானையாரே! - தலை
தொட்டுத் தொட்டு வாழ்த்துகின்றீர்
யானையாரே!
தம்பி, தங்கை உம்மைக் கண்டு
யானையாரே! - மிகவும்
சத்தமிட்டுச் சிரிக்கின்றார்
யானையாரே!
சர்க்கசிலே வித்தை காட்டி
யானையாரே - பெருஞ்
சாதனைகள் செய்கின்றீரே
யானையாரே!
சொர்க்கம் உமக்குக் காடன்றோ
யானையாரே! - அதைத்
தொலைத்துவிட்டு இங்கேன் வந்தீர்
யானையாரே!