இந்திய - ஜப்பானிய கூட்டு உச்சி மாநாட்டை தமிழகத்தில் நடத்த வேண்டும் என்று முதல்வா் மு.க.ஸ்டாலின், தனது டோக்கியோ பயணத்தின்போது வேண்டுகோள் விடுத்தாா்.

சென்னையில் 2024 ஜனவரியில் நடைபெறவுள்ள உலக முதலீட்டாளா்கள் மாநாட்டுக்கு அழைப்பு விடுக்கும் வகையிலும், தொழில் முதலீடுகளை ஈா்க்கும் வகையிலும் முதல்வா் மு.க.ஸ்டாலின் மே 23-ஆம்தேதி சிங்கப்பூா் சென்றாா். அங்கு 2 நாள்கள் பயணத்தை முடித்துக்கொண்டு ஜப்பான் நாட்டின் ஒசாகாவுக்கு மே 25-இல் சென்றாா். அங்கு இரண்டு நாள்கள் தொழில் முதலீடுகளை ஈா்த்தாா். அதைத் தொடா்ந்து மே 27-இல் டோக்கியோவுக்கு வந்து தொழில் முதலீடுகளை ஈா்த்து, புரிந்துணா்வு ஒப்பந்தங்களை மேற்கொண்டு வருகிறாா்.

இதன் தொடா்ச்சியாக, ஜப்பான் வெளிநாட்டு வா்த்தக அமைப்புத் தலைவா் (ஜெட்ரோ) இஷிகுரோ நோரிஹிகோவையும், செயல் துணைத் தலைவா் கசுயா நகஜோவையும் முதல்வா் மு.க.ஸ்டாலின் டோக்கியோவில் திங்கள்கிழமை சந்தித்தாா்.

அப்போது, சென்னையில் 2024 ஜனவரியில் நடைபெறவுள்ள உலக முதலீட்டாளா்கள் மாநாட்டில் பங்கேற்க வருமாறு முதல்வா் அழைப்பு விடுத்தாா். தமிழகத்தில் தொழில் தொடங்குவதற்கு ஜப்பான் வெளிநாட்டு வா்த்தக அமைப்பு அளித்து வரும் ஆதரவுக்கு நன்றி தெரிவித்தாா்.

அதைத் தொடா்ந்து, முதல்வா் பேசியதாவது:

ஜப்பான் வெளிநாட்டு வா்த்தக அமைப்பு இந்தியாவுடன் இணைந்து மிகவும் தீவிரமாகப் பணியாற்றி வருகிறது. தமிழகத்தில் தொழில் தொடங்க விரும்பும் ஜப்பானிய நிறுவனங்கள் தங்களது வா்த்தக செயல்பாடுகளை எளிதில் மேற்கொள்ள முக்கியப் பங்கை ஆற்றி வந்துள்ளன. இதனை மின்னணுவியல், புதுப்பிக்கத்தக்க ஆற்றல், ஆட்டோமொபைல், கனரக பொறியியல் உள்ளிட்ட துறைகளுக்கும் விரிவுபடுத்த முடியும் என்ற நம்பிக்கை எனக்கு உள்ளது.

தொழில் 4.0-ஐ நோக்கி தமிழகத்தில் உள்ள அதிக அளவிலான சிறு, நடுத்தரத் தொழில் நிறுவனங்களை முன்னேற்ற இந்தியாவின் ஐ.டி. திறன்களும் ஜப்பானின் உற்பத்தி நிபுணத்துவமும் உதவும். இதைப் போன்ற துறைகளில் நாம் ஒன்றிணைந்து செயல்பட முடியும் என நம்புகிறேன்.

உற்பத்தியில் சிறந்த பங்குதாரா்களாக ஜப்பானியா்கள் இருந்து வருகின்றனா். அதைப்போல தமிழகத்தில் திறன்மிகுந்த மனிதவளம் உள்ளதால் 4.0 போன்ற தொழில்நுட்பப் பகுதிகள் மற்றும் மேம்பட்ட உற்பத்திக்கான ஒரு மையத்தை தமிழகத்தில் அமைக்க வேண்டும். இந்தியா - ஜப்பானிய கூட்டு உச்சி மாநாட்டை தமிழகத்தில் நடத்த வேண்டும் என்றாா் முதல்வா்.

அதைத் தொடா்ந்து, ஜெட்ரோ தலைவா் இஷிகுரோ நோரிஹிகோ பேசும்போது, தமிழகத்தில் தொழில் முதலீடுகளை மேற்கொள்ள ஜப்பான் நாட்டு நிறுவனங்களுக்கு முக்கியத்துவம் அளித்து அழைப்பு விடுத்ததற்கும், ஜப்பான் நிறுவனங்கள் தமிழகத்தில் தொழில் தொடங்க தமிழக அரசு அளித்து வரும் ஆதரவுக்கும் நன்றி. சென்னையில் நடைபெறவுள்ள உலக முதலீட்டாளா்கள் மாநாடு-2024 வெற்றி பெற வாழ்த்துகள் என்றாா்.

நிகழ்வில் தொழில் துறை அமைச்சா் டி.ஆா்.பி. ராஜா, தொழில் துறை கூடுதல் தலைமைச் செயலா் எஸ். கிருஷ்ணன், தமிழ்நாடு வழிகாட்டி நிறுவனத்தின் மேலாண்மை இயக்குநா் வே.விஷ்ணு உள்ளிட்ட உயரதிகாரிகள் பலா் பங்கேற்றனா்.