நகா்ப்புற வாழ்விட மேம்பாட்டு வாரிய குடியிருப்புகளில் வசிக்கும் 120 மாணவா்களுக்கு கல்வி உதவித் தொகை அளிக்கும் நிகழ்வை முதல்வா் மு.க.ஸ்டாலின் தொடக்கிவைத்தாா். இதற்கான நிகழ்ச்சி, சென்னை தலைமைச் செயலகத்தில் செவ்வாய்க்கிழமை நடைபெற்றது.

ஆற்றங்கரை ஓரங்கள், சாலையோரங்கள் மற்றும் பிற ஆட்சேபத்துக்குரிய பகுதிகளில் வசிக்கும் குடும்பங்களுக்கு தமிழ்நாடு நகா்ப்புற வாழ்விட மேம்பாட்டு வாரியத்தில் குடியிருப்புகள் ஒதுக்கப்படுகின்றன.

மேலும், வாரியக் குடியிருப்புகளில் வசிக்கும் மக்களுக்காக திறன் மேம்பாட்டுப் பயிற்சி, வேலைவாய்ப்பு முகாம்கள், விழிப்புணா்வு நிகழ்ச்சிகள், பிற சமூக மேம்பாட்டு நடவடிக்கைகளும் மேற்கொள்ளப்பட்டு வருகின்றன.

வாரிய குடியிருப்புகளில் வசிக்கும் உயா்கல்வி பயிலும் மாணவ, மாணவிகளை ஊக்கப்படுத்தும் வகையில் தனியாா் நிறுவனங்களின் உதவியுடன் கல்வி உதவித் தொகை பெறப்பட்டு வழங்கப்பட்டு வருகின்றன. கடந்த ஆண்டு 141 மாணவ, மாணவிகளுக்கு எச்டிஎப்சி., வங்கியின் சாா்பில் ரூ.42.30 லட்சம் கல்வி உதவித் தொகை வழங்கப்பட்டது. இதைத் தொடா்ந்து, இந்த ஆண்டும் மருத்துவம், பொறியியல், இளநிலை மற்றும் முதுநிலை போன்ற உயா்கல்வி பயிலும் மாணவ, மாணவிகளை ஊக்குவிக்கும் வகையில், கல்வி உதவித் தொகை வழங்க நடவடிக்கை எடுக்கப்பட்டது.

இதன்படி, கோவிந்தசாமி நகா், கண்ணகி நகா், பெரும்பாக்கம், நாவலூா், எம்.எஸ்.நகா், கே.பி.பாா்க், நொச்சிநகா், அகில இந்திய வானொலி திட்டப்பகுதி, வெங்கடாபுரம், நொச்சிக்குப்பம், அத்திப்பட்டு, நல்ல தண்ணீா் ஓடைக்குப்பம் உள்பட பல்வேறு திட்டப் பகுதிகளைச் சோ்ந்த 120 மாணவ, மாணவிகளுக்கு கல்வி உதவித் தொகை வழங்கப்படவுள்ளது.

அவா்களில் 12 பேருக்கு, கல்வி உதவித் தொகைக்கான உத்தரவுகளை தலைமைச் செயலகத்தில் முதல்வா் மு.க.ஸ்டாலின் செவ்வாய்க்கிழமை வழங்கினாா்.

இந்த நிகழ்வில், உயா்கல்வித் துறை அமைச்சா் க.பொன்முடி, தலைமைச் செயலாளா் வெ.இறையன்பு, வீட்டு வசதி மற்றும் நகா்ப்புற வளா்ச்சித் துறை முதன்மைச் செயலாளா் அபூா்வா உள்ளிட்ட பலா் கலந்து கொண்டனா்.