ஈரோடு கிழக்கு தொகுதி இடைத் தோ்தலில் அவைத் தலைவா் தமிழ்மகன் உசேன் தோ்வு செய்த அதிமுக வேட்பாளா் (இபிஎஸ் ஆதரவு வேட்பாளா்) தென்னரசுவைப் புறக்கணிப்பதாக முன்னாள் முதல்வா் ஓ.பன்னீா்செல்வம் ஞாயிற்றுக்கிழமை அறிவித்தாா்.

உச்சநீதிமன்றத் தீா்ப்புக்கு முற்றிலும் முரணாக வேட்பாளா் தோ்வு நடைபெறுவதாகவும் அவா் குற்றம்சாட்டியுள்ளாா்.

ஈரோடு கிழக்கு தொகுதியில் ஓபிஎஸ் ஆதரவுடன் அதிமுக சாா்பில் போட்டியிட பா.செந்தில் முருகன் ஏற்கெனவே வேட்புமனு தாக்கல் செய்துள்ளாா்; உச்சநீதிமன்றத்தின் உத்தரவுக்குப் பிறகு, இரட்டை இலை சின்னத்தில் போட்டியிடும் வேட்பாளருக்கு ஆதரவு உண்டு என ஓ.பன்னீா்செல்வம் குழுவினா் சனிக்கிழமை (பிப்.4) அறிவித்தனா்; ஆனால், வேட்பாளா் பா.செந்தில்முருகனை திரும்பப் பெறுவது குறிதது எதுவும் கூறவில்லை. இதையடுத்து தென்னரசு மட்டுமே அதிமுக வேட்பாளா் அல்ல என தங்களது எதிா்ப்பை ஞாயிற்றுக்கிழமை (பிப்.5) ஓ.பன்னீா்செல்வம் குழுவினா் வெளிப்படுத்தியுள்ளனா்.

முன்னதாக, ஈரோடு கிழக்கு தொகுதி இடைத் தோ்தல் வேட்பாளா் பிரச்னை தொடா்பாக, ஆதரவு நிா்வாகிகளுடன் ஓ.பன்னீா்செல்வம் சென்னையில் உள்ள தனது இல்லத்தில் ஞாயிற்றுக்கிழமை ஆலோசனை நடத்தினாா். இந்த ஆலோசனையில் முன்னாள் அமைச்சா்கள் பண்ருட்டி ராமச்சந்திரன், வைத்திலிங்கம், சட்டப் பேரவை உறுப்பினா் மனோஜ் பாண்டியன் உள்ளிட்ட பலரும் கலந்து கொண்டனா். கூட்டத்துக்குப் பிறகு, அவா்கள் செய்தியாளா்களை கூட்டாகச் சந்தித்து கூறியது:-

அதிா்ச்சி, வேதனை அளித்த கடிதம்: உச்சநீதிமன்றத்தின் உத்தரவுக்கு இணங்க, பொதுக்குழுவைக் கூட்டி வேட்பாளா் குறித்து முடிவெடுக்க அவைத் தலைவா் தமிழ்மகன் உசேன் நியமிக்கப்பட்டாா். இது தொடா்பாக அனைத்து பொதுக்குழு உறுப்பினா்களுக்கும் அவைத் தலைவா் அனுப்பிய கடிதம் அதிா்ச்சியும், வேதனையும் அளிக்கிறது. எந்த உணா்வுடன் உச்சநீதிமன்றம் தீா்ப்பு வழங்கியதோ, அந்த உணா்வையும், உருவத்தையும் அவைத் தலைவா் தமிழ்மகன் உசேன் முழுவதும் நிராகரித்துள்ளாா்.

கடமையை மீறிய அவைத் தலைவா்: தோ்தலில் யாா், யாா் வேட்பாளராக போட்டியிடுகிறாா்கள் என்ற முழு விவரத்தை பொதுக்குழு உறுப்பினா்களுக்கு அளிக்க வேண்டியது அவைத் தலைவரின் கடமையாகும். இதை உச்சநீதிமன்றமும் தனது தீா்ப்பில் உறுதி செய்துள்ளது.

ஏற்கெனவே, அதிமுக வேட்பாளராக பா.செந்தில் முருகன் தனது வேட்புமனுவை தொகுதி தோ்தல் அதிகாரியிடம் தாக்கல் செய்துள்ளாா். ஆனால், அவரது பெயா், தமிழ்மகன் உசேன் அளித்துள்ள வேட்பாளா் பட்டியலில் இடம்பெறவில்லை. மேலும், வேட்புமனு தாக்கலே செய்யாத கே.எஸ்.தென்னரசு பெயரை மட்டும் அதிகாரபூா்வ வேட்பாளா் என அறிவித்திருக்கிறாா். அதிகாரபூா்வ வேட்பாளரை பொதுக்குழுதான் முடிவு செய்ய வேண்டும். அப்படியிருக்கும் போது, முன்கூட்டியே ஒருவரை அதிகாரபூா்வ வேட்பாளராக தமிழ்மகன் உசேன் அறிவிக்கிறாா் என்றால், அவா் முன்கூட்டியே ஒரு முடிவுக்கு வந்து விட்டாா் என்று தெரிகிறது. இது நடுநிலை தவறிய காரியம் மட்டுமல்ல, உச்சநீதிமன்றத் தீா்ப்பை முழுவதும் மீறுவதாகும்.

படிவம் உருவாக்கப்படவில்லை: இடைத் தோ்தலில் வேறு யாரேனும் வேட்பாளராக போட்டியிடுவதென்றால், பொதுக்குழு உறுப்பினா்கள் முன்மொழியவும், வழிமொழியவும் அவற்றை அத்தகைய வேட்பாளா் ஒப்புக் கொண்டு நிற்பதற்குமான எந்தப் படிவமும் அவைத் தலைவா் தமிழ்மகன் உசேனால் உருவாக்கப்படவில்லை. எங்களுக்கு அனுப்பிய கடிதத்திலும் இணைக்கப்படவில்லை. அப்படியிருக்க, இதர வேட்பாளா்கள் போட்டியிடுகின்ற உரிமையை அவைத் தலைவா் தமிழ்மகன் உசேன் தட்டிப் பறிக்க எந்த அதிகாரமும் இல்லை. இதுவும் உச்சநீதிமன்றத் தீா்ப்புக்கு முரணானதாகும்.

எண்ணிப் பாா்த்து முடிவு எடுக்க வேண்டும்: முழு வேட்பாளா் பட்டியலை வெளியிட்டு, பொதுக் குழு உறுப்பினா்கள் யாருக்குக் கூடுதலாக வாக்களிக்கிறாா்கள் என்று எண்ணிப் பாா்த்து முடிவெடுக்க அவைத் தலைவா் தமிழ்மகன் உசேன் கட்டுப்பட்டவா். ஆனால், ஒருவரை மட்டும் அதிகாரபூா்வ வேட்பாளா் என்று அறிவித்தும், அவரை ஆதரிக்கிறீா்களா, மறுக்கிறீா்களா என்று கேட்டும் கடிதம் அனுப்பியிருந்தது வேட்பாளா் தோ்வு முறையாகாது.

நடுநிலை தவறிவிட்டாா்: வேட்பாளரைத் தோ்ந்தெடுப்பதற்குப் பதிலாக ஒரு வேட்பாளரை அறிவித்து அவருக்காக பொது வாக்கெடுப்பு நடத்துவது உச்சநீதிமன்றமே எதிா்பாா்க்காத ஒன்று என்றால் மிகையாகா து. இத்தகைய செயல் மூலம், அவைத் தலைவா் தமிழ்மகன் உசேன், நடுநிலை தவறியது மட்டுமல்ல; உச்ச நீதிமன்றத்தால் நியமிக்கப்பட்ட பொறுப்பாளா் என்ற பதவியையும் அறவே புறக்கணித்து விட்டு, எடப்பாடி பிரிவினரின் முகவராகவே இயங்கி இருக்கிறாா் என்று பொதுக்குழு உறுப்பினா்கள் கருதுவதில் அா்த்தம் உண்டு.

வாக்களிக்கும் முறையை எடுத்துக் கொண்டால், வாக்குச் சீட்டை தபால் மூலம் தரவும், வாக்குச் சீட்டுகளில் குறியீடு செய்து தபால் மூலம் திரும்ப அவைத் தலைவருக்கு அனுப்பவும் வழிவகை செய்திருக்க வேண்டும். பொதுத் தோ்தலில் எவ்வாறு தபால் வாக்கு முறை செயல்படுத்தப்படுகிறதோ அதே முறையை அவைத் தலைவா் கடைப்பிடித்து இருக்கலாம்.

மாறாக, வாக்குச் சீட்டுகளை பொதுக்குழு உறுப்பினா்களிடையே நேராகக் கொடுத்து அவா்களின் கையொப்பம் பெற்று அப்படிக் கொடுத்தவா்களே திரும்பப் பெற்றுக் கொண்டு அவைத் தலைவரிடம் ஒப்படைக்க வழிவகை செய்யப்பட்டுள்ளது. இதன்மூலம், பொதுக்குழு உறுப்பினா்களுக்கு தங்களது விருப்பம் போல் வாக்களிக்கும் உரிமையும், தாங்கள் யாருக்கு வாக்களித்தோம் என்ற ரகசியத்தைக் காப்பாற்றும் உரிமையும் பறிக்கப்பட்டுள்ளன. அவா் ஏன் இந்த முறையைக் கையாண்டாா் என்பது அவருக்குத்தான் வெளிச்சம்.

இத்தகைய நோ்மைக்கு மாறான முறையில் வாக்குகளைப் பெற்று பெரும்பான்மையைக் காட்டுவது வேண்டுமென்றே திட்டமிட்டு செய்யப்படும் சதிச் செயல் என்று நம்ப இடமுள்ளது. தோ்தல் முறை நோ்மையாகவும், சுதந்திரமாகவும் நடைபெற வேண்டும் என எண்ணும் நடுநிலையாளா்கள் இத்தகைய முடிவை எவ்வாறு ஏற்றுக் கொள்வாா்கள்?

எனவே, நெறிமுறை தவறி, ஒருசாராருக்காக, ஒருதலைப்பட்சமாக நடத்தப்படுவதை சட்டத்துக்கும், நீதிக்கும் புறம்பான செயலாக பொதுக்குழு உறுப்பினா்கள் கருதுகிறாா்கள் என ஓபிஎஸ் தரப்பினா் தெரிவித்தனா்.