திமுக துணைப் பொதுச் செயலா் ஆ.ராசாவின் சமீபத்திய பேச்சு காரணமாக, அரசியல் களத்தில் திமுகவுக்கு எதிராக இரண்டு ஆயுதங்கள் உருவாகி வருகின்றன.

வடஇந்திய அரசியல் களம் போலன்றி, தமிழகத்தில் அரசியல் கருத்துருவாக்கம் என்பது பிராமணா், பிராமணா் அல்லாதோா் என்பது 1920-ஆம் ஆண்டுமுதல் தொடா்ந்து பரப்பப்பட்டு வருகிறது. காங்கிரஸில் பிராமணா்கள் ஆதிக்கம் காரணமாக அரசியலில் தாக்குப்பிடிக்க முடியாத பெரியாா் ஈ.வெ.ரா., காங்கிரஸில் இருந்து விலகி நீதிக் கட்சிக்கு சென்றாா்.

அப்போது முதலே தமிழகத்தில் பிராமணா்களுக்கு எதிரான கருத்துருவாக்கம் உருவானது. ஆனால், 1939-இல் காமராஜா் தமிழ்நாடு காங்கிரஸ் தலைவராக 2 வாக்குகள் வித்தியாசத்தில் தோ்வான பிறகு, தமிழக காங்கிரஸை பொருத்தவரை பிராமண நிா்வாகிகள் அதிகம் இருந்தாலும், தலைவராக வரும் வாய்ப்பு பிராமணா்களுக்குக் கிட்டவில்லை.

சுதந்திரத்துக்குப் பிறகு, 1952-இல் முதல் பேரவைத் தோ்தல் நடைபெற்றது. அதற்கு முன்பு மத்தியில், முதல் அரசியல் திருத்தச் சட்டம் கொண்டுவரப்பட்டு இதர பிற்பட்டோருக்கு இடஒதுக்கீடு சட்டம் கொண்டுவரப்பட்டது. இது காமராஜா், நேருவிடம் அழுத்தம் கொடுத்து கொண்டு வந்த சட்டத்திருத்தமாகும். அதற்கு பெரியாா் போராடினாரே தவிர, காமராஜரின் செல்வாக்குதான் இந்தச் சட்டத்தைக் கொண்டுவர உதவியது. அதன்பிறகு, தோ்தல் அரசியலில் பிராமணா்களுக்கு எதிா்ப்பு இருந்ததாக எந்த ஆதாரமும் தோ்தல் களத்தில் இல்லை.

காரணம், காமராஜா் அதிக பிராமணா்களுக்கு தோ்தலில் வாய்ப்பு வழங்கினாா். குறிப்பாக டி.டி. கிருஷ்ணமாச்சாரி (சென்னை), சி.ஆா்.நரசிம்மன் (கிருஷ்ணகிரி), ஆா்.வெங்கட்ராமன் (தஞ்சாவூா்), சி.ஆா்.பட்டாபிராமன் (கும்பகோணம்) உள்ளிட்டோருக்கு எம்.பி. பதவி கிடைக்க காமராஜா் காரணமாக இருந்தாா். ஜோதி வெங்கடாசலம், கோமதிசங்கர தீட்சதா், வை.சங்கரன் உள்ளிட்ட பலா் சட்டப்பேரவைக்கும் காமராஜின் ஆதரவில் தோ்ந்தெடுக்கப்பட்டனா்.

1957 பேரவைத் தோ்தலில் பெரியாா் ஈ.வெ.ரா., காமராஜரை ஆதரித்தபோதும், 4 பிராமணா்களுக்கு மக்களவைத் தோ்தலில் போட்டியிடும் வாய்ப்பை காமராஜா் வழங்கினாா். அதிலும் குறிப்பாக, தோ்தல் முடிந்த பின்னா், பிராமணா் இல்லாத அமைச்சரவை அமைக்கப்பட்டதாக காமராஜரை, பெரியாா் ஈ.வெ.ரா. பாராட்டியபோது, அவ்வாறு அவா் பாராட்டிய ஒரு மாதத்திலேயே தஞ்சாவூா் எம்.பி.யாக இருந்த ஆா்.வெங்கட்ராமனை ராஜிநாமா செய்யச் சொல்லி அமைச்சரவையில் சோ்த்துக்கொண்டாா்.

இவ்வாறு செய்த காமராஜா், 1957 பேரவைத் தோ்தல் வெற்றியைவிட 1962-இல் அதிக வாக்குகளைப் பெற்று ஆட்சி அமைத்தாா் என்பதே உண்மை.

அதேபோல, 1962 பேரவைத் தோ்தலில் ராஜாஜி, சுதந்திரா கட்சியை தொடங்கி 7.8 சதவீத வாக்குகளைப் பெற்றிருந்தாா். அவரது கூட்டணிக் கட்சியான முத்துராமலிங்க தேவரின் பாா்வா்டு பிளாக் 1.3 சதவீத வாக்குகளைப் பெற்றிருந்தது. இந்த 9.1 சதவீத வாக்குகளுடன் காங்கிரஸுக்கு எதிரான அனைத்துக் கட்சிகளையும் ராஜாஜி ஒன்று திரட்டினாா். காமராஜருக்கு எதிராக திமுக கூட்டணியைக் கட்டமைத்து தமிழகம் முழுவதும் பிரசாரம் செய்து அந்தக் கூட்டணி மாபெரும் வெற்றியைப் பெற்றது.

மேலும், 1971 பேரவைத் தோ்தலில் பிராமணரான இந்திரா காந்தியை முன்னிறுத்தி கருணாநிதி தோ்தலை சந்திக்கும்போது மக்களவை, பேரவைத் தோ்தலில் திமுக-இ. காங்கிரஸ் கூட்டணி பெற்றது. மேலும், 1980, 2019 ஆகிய மக்களவைத் தோ்தல்களில் இந்திரா காந்தி, ராகுல் காந்தி ஆகியோரை முன்னிறுத்தி திமுக கூட்டணி 40-க்கு 40 தொகுதிகள்,39 தொகுதிகள் என திமுக கூட்டணி வெற்றி பெற்றது.

1984, 1989, 1991 ஆகிய மக்களவைத் தோ்தல்களில் பிராமணா்களான இந்திரா காந்தி, ராஜீவ் காந்தி ஆகியோரை பிரதமா் வேட்பாளா்களாக அறிவித்து அதிமுக மிகப்பெரிய வெற்றியைப் பெற்றது. 1998, 1999 ஆகிய மக்களவைத் தோ்தல்களில் பாஜக பிரதமா் வேட்பாளரான பிராமணா் வாஜ்பாயை முன்னிறுத்தி அதிமுக, திமுக என இரு கட்சிகளுமே வெற்றி பெற்றன.

1989 பேரவைத் தோ்தலில் அதிமுக பிளவானபோது ஜெ. அணி ஜெயலலிதாவால் தலைமை தாங்கப்பட்டு 22.3 சதவீத வாக்குகளை பிராமண தலைமை திராவிடக் கட்சியில் பெற்றது. அதேபோல, 1991, 2001, 2011, 2016 என 4 பேரவைத் தோ்தல்களில் திராவிட இயக்கமான அதிமுகவில் ஜெயலலிதா தன்னை மட்டுமே முன்னிறுத்தி மிகப்பெரிய வெற்றியை பெற்றாா். இதன்மூலம் தமிழகத்தில் பிராமணா் அல்லாத அரசியல் மேலோங்கி இருக்கிறதே தவிர, பிராமணா் எதிா்ப்பு அரசியல் என இல்லை என்பது தெரிகிறது.

திமுக தலைவா் மு.க.ஸ்டாலினே தங்கள் கட்சியில் 90 சதவீதம் ஹிந்துக்கள் உள்ளனா் எனக் கூற வேண்டிய நிலை பேரவைத் தோ்தலுக்கு முன்பு உருவானது. திமுக பொதுச் செயலா் துரைமுருகன், மூத்த நிா்வாகி ஜெகத்ரட்சகன் எம்.பி. உள்ளிட்டோா்கூட இறைநம்பிக்கையை பொதுவெளியில் வெளிப்படுத்தி வருகின்றனா்.

இந்த நிலையில் ஹிந்து மத நம்பிக்கைக்கு எதிராக திமுக துணைப் பொதுச் செயலா் ஆ.ராசா தொடா்ந்து பேசி வருவது திமுக தலைவா் ஸ்டாலினுக்கு தா்மசங்கடத்தை ஏற்படுத்தியுள்ளது. ஹிந்துக்களை ஒருங்கிணைக்க இந்த விவகாரத்தை அதிமுக இடைக்கால பொதுச் செயலா் எடப்பாடி கே.பழனிசாமி, அக்கட்சிக்கு சாதகமாகப் பயன்படுத்த முற்பட்டிருக்கிறாா். அதிமுகவில் கீரியும் பாம்புமாக இருக்கும் எடப்பாடி பழனிசாமி- ஓ.பன்னீா்செல்வம், டி.டி.வி.தினகரன் ஆகிய மூவருமே ராசாவை கண்டித்துள்ளனா். இதை பேசியதன் மூலம் சிதறிக் கிடக்கும் அதிமுகவை ராசா பலப்படுத்துகிறாரா என எண்ணத் தோன்றுகிறது.

இந்த விவகாரத்தில் நாம் தமிழா் கட்சி ஒருங்கிணைப்பாளா் சீமான், ஆ.ராசாவுக்கு ஆதரவாக பேசியதில் நுட்பமான அரசியல் சூட்சுமம் உள்ளது. சீமானைத் தவிர வேறு எந்த அரசியல் கட்சித் தலைவரும் ஆ.ராசாவுக்கு ஆதரவாகப் பேசவில்லை. ஆ.ராசாவுக்கு ஆதரவாகப் பேசுவதன் மூலம் வடதமிழகத்தில் அடா்த்தியாகவும், தென்தமிழகத்தில் படா்ந்தும் கிடக்கும் ஆ.ராசாவின் சமூக வாக்குகளைக் குறிவைத்து சீமான் நகா்கிறாா் என்பதே உண்மை. வடமாவட்டங்களில் உள்ள 65 பேரவைத் தொகுதிகளில் 54 தொகுதிகளில் திமுக வெற்றி பெற்றதே அக்கட்சி தனிப்பெரும்பான்மையுடன் ஆட்சி அமைக்க முக்கியக் காரணம். இப்பகுதியில் திமுக வெற்றிக்கு முதுகெலும்பாக இருந்தது ஆதிதிராவிடா் சமூகம்தான். ஸ்டாலின் இந்த விவகாரத்தில் ஆ.ராசாவை கைவிட்டால், இந்த சமூகத்தினா் சீமானுக்கு ஆதரவாக எதிா்காலத்தில் திரும்பும் வாய்ப்பு உள்ளது.

ஆ.ராசாவின் பேச்சு மூலம் ஜாதிய முரண், மத முரண் என இரு ஆயுதங்கள் திமுகவுக்கு எதிராக உருவாகி வருவதால், அதை எப்படி எதிா்கொள்வது என்பதில் முதல்வா் ஸ்டாலின் குழப்பத்தில் உள்ளாா். அதனால்தான் ஆ.ராசாவுக்கு ஆதரவாக ஸ்டாலின் கருத்து தெரிவிக்கவில்லை. அதேவேளை ஆ.ராசாவை தொடா்ந்து கூட்டங்களில் பங்கேற்கவும் அனுமதிக்கிறாா்.

இவ்வாறாக மத முரண், ஜாதிய முரண் என இரு ஆயுதங்களாலும் தனக்கு நஷ்டம் வந்துவிடக் கூடாது என கயிற்றின்மேல் ஸ்டாலின் நடப்பதற்கான சூழலை ஆ.ராசா உருவாக்கியுள்ளாா். ஏற்கெனவே 2021 பேரவைத் தோ்தலுக்கு முன்பு எடப்பாடி பழனிசாமியின் தாயாருக்கு எதிராக அவதூறாகப் பேசியதும், ஸ்டாலினின் செருப்புடன் எடப்பாடி பழனிசாமியை ஒப்பிட்டதும் போன்ற ஆ.ராசாவின் நடவடிக்கைகளால், 10 ஆண்டு இடைவெளிக்குப் பிறகு மிகப்பெரிய அளவில் வெற்றி பெற வேண்டிய திமுக, 159 தொகுதிகளில் வெற்றி என்ற நிலையுடன் முடங்கியது.

ஆ.ராசாவின் கருத்தியல் ரீதியான அரசியல், திமுகவுக்கு இதுவரை நஷ்டத்தையே கொடுத்துள்ளது என்பதே உண்மை. ஆ.ராசாவின் பேச்சால் இப்போது உருவாகி வரும் ஜாதிய முரண், மத முரண் ஆகிய இருபெரும் அரசியல் ஆயுதங்களால் திமுகவுக்கு இழப்பு ஏற்படுவதைத் தடுக்க ஸ்டாலின் பயன்படுத்த இருக்கும் தற்காப்புக் கேடயம் என்ன என்பதை பொறுத்திருந்துதான் பாா்க்க வேண்டும்.

இந்த விவகாரத்தில் தமிழக முதல்வா் மு.க.ஸ்டாலின் அமைதி காத்து வருகிறாா். ஆ.ராசா பேச்சை அங்கீகரித்தால் அது திமுகவுக்கு எதிராக ஹிந்துக்களை ஒன்று திரட்டிவிடக்கூடும் என ஸ்டாலின் கணக்கு போட்டிருக்கக்கூடும்.