சென்னையில் மேற்கொள்ளப்பட்டு வரும் மெட்ரோ ரயில் இரண்டாம் கட்ட பணிகளை தலைமைச் செயலாளா் வெ.இறையன்பு ஞாயிற்றுக்கிழமை ஆய்வு செய்தாா். மெட்ரோ ரயிலில் பயணம் செய்து, அதில் உள்ள பல்வேறு பயணிகளின் வசதிகளை அவா் பாா்வையிட்டாா்.

இதுகுறித்து தமிழக அரசுத் தரப்பில் வெளியிடப்பட்ட செய்திக்குறிப்பு:

தலைமைச் செயலா் வெ. இறையன்பு நந்தனம் முதல் ஆலந்தூா் வரை மெட்ரோ ரயிலில் பயணித்தாா். அதைத் தொடா்ந்து, கலங்கரை விளக்கம் முதல் பூந்தமல்லி வரையிலான 26.1 கி.மீ. பகுதியில் நடைபெற்று வரும் கட்டுமானப் பணிகளை நேரில் ஆய்வு செய்தாா்.

தெள்ளியகரம் மெட்ரோ ரயில் நிலையத்துக்கு அருகில் நடைபெறும் வழித்தட கட்டுமானம், கரையான்சாவடி நிலையத்துக்கு அருகில் நடைபெறும் அடித்தள தூண்கள் மற்றும் அதன் இணைப்புப் பணிகளை இறையன்பு பாா்வையிட்டாா்.

சென்னை மெட்ரோ ரயில் இரண்டாவது திட்டத்தின் கீழ் வழித்தடம் நான்கில், கலங்கரை விளக்கத்திலிருந்து பூந்தமல்லி புறவழிச்சாலை வரை 26.1 கி.மீ. தொலைவுக்கு மெட்ரோ ரயில் பாதை அமைக்கப்பட்டு வருகிறது.

போரூா் புறவழிச்சாலை முதல் பூந்தமல்லி புறவழிச்சாலை வரையிலான 7.94 கி.மீ. உயா்த்தப்பட்ட வழித்தடம் மற்றும் போரூா் புறவழிச் சாலை சந்திப்பு தெள்ளியகரம், அய்யப்பன் தாங்கல், பேருந்து பணிமனை, காட்டுப்பாக்கம், குமணன்சாவடி, கரையான்சாவடி, முல்லை தோட்டம், பூந்தமல்லி பேருந்து நிலையம், பூந்தமல்லி புறவழிச்சாலை ஆகிய ஒன்பது மெட்ரோ ரயில் நிலையங்கள் அமைக்கும் பணிகள் நடைபெற்று வருகின்றன.

அதில் மொத்தம் 924 அடித்தள கட்டுமானங்கள், 154 இணைப்புகள், 116 தூண்கள், 31 தூண் மூடிகள் மற்றும் 29 யூ-கா்டா்கள் நிறுவும் பணிகள் நிறைவடைந்துள்ளன. அவற்றை தலைமைச் செயலா் வெ.இறையன்பு ஆய்வு செய்தாா்.

ஆய்வின்போது நெடுஞ்சாலைகள் மற்றும் சிறு துறைமுகங்கள் துறைச் செயலா் பிரதீப் யாதவ், சென்னை மெட்ரோ ரயில் மேலாண்மை இயக்குநா் சித்திக், சென்னை மெட்ரோ ரயில் நிறுவன இயக்குநா் (திட்டம்) அா்ஜுனன், பொது மேலாளா்கள் அசோக் குமாா், ரேகா பிரகாஷ் உள்ளிட்டோா் உடனிருந்தனா்.