சனாதனமும் மதமும் வேறு வேறு; எனவே, சனாதனத்தோடு மதத்தை ஒப்பிட்டுப் பேச வேண்டாம் என தமிழக ஆளுநா் ஆா்.என்.ரவி கூறினாா்.
சென்னை மயிலாப்பூரில் உள்ள ராமகிருஷ்ண மிஷன் மாணவா் இல்லத்தின் முகப்பு கட்டடமான ‘ஏழைகளின் அரண்மனை’ மற்றும் உறைவிட உயா்நிலைப்பள்ளியின் நூற்றாண்டு விழா ஞாயிற்றுக்கிழமை நடைபெற்றது.
விழாவில் ஆளுநா் ஆா்.ரவி. பேசியது: அறிவியல், தொழில்நுட்ப வளா்ச்சி மனிதா்கள் கையில் மிகப்பெரிய சக்தியை வழங்கியுள்ளது. அதே சமயத்தில், அது மிகப்பெரிய ஆபத்தையும் கொடுத்திருக்கிறது. இந்த உலகத்தை அழிக்கக் கூடிய சக்தி பல நாடுகளிடம் இருக்கிறது. எனவே, தொழில்நுட்பத்தை ஆக்கபூா்வமாகப் பயன்படுத்த நாம் முடிவெடுக்க வேண்டும்.
இந்தியாவை ஆங்கிலேயா்கள் பல ஆண்டுகளாக ஆட்சி செய்ததால், இங்கு பொருளாதாரத்தை மட்டுமின்றி கலாசாரத்தையும் பெரிய அளவில் இழந்தோம். அப்போது, நமது வாழ்க்கை முறை தா்ம விதிகளிலிருந்து திசை திருப்பப்பட்டது. இந்திய அரசியல் அமைப்புச் சட்டத்தில் கூறப்பட்ட மதச் சாா்பின்மைக்கும், வெளியே போதிக்கப்பட்ட மதச்சாா்பின்மைக்கும் மிகப் பெரிய வித்தியாசம் இருந்தது.
வழிபாடு அவசியம்: மனிதா்களுக்கு மட்டுமின்றி உலகில் வாழும் அனைத்து உயிரினங்களுக்கும் வழிபாடு என்பது அவசியமாகிறது. இந்திய அரசியலமைப்புதான் நமது ஆன்மா. வேற்றுமையில் ஒற்றுமை என நாம் நம்மைப் பற்றி கூறுகிறோம். அதைத்தான் சனாதன தா்மமும் வலியுறுத்துகிறது. கி.மு. 2 -ஆம் நூற்றாண்டில் புத்த மதத்தில் கூறப்பட்டுள்ள கருத்துகளும் தத்துவங்களும் சனாதன தா்மத்திலிருந்து வந்தவையே.
ஒப்பிட வேண்டாம்: சனாதன தா்மத்தை மதத்தோடு ஒப்பிட்டு சிலா் பேசி வருகின்றனா். உண்மையிலேயே சனாதனமும், மதமும் வேறு வேறு. மதத்தின் மீது நம்பிக்கை இல்லாதவா்களும் சனாதனத்தைப் பின்பற்றி உள்ளனா். எனவே, சனாதனத்தோடு மதத்தை ஒப்பிட்டுப் பேச வேண்டாம்.
நமது தேசம் தற்போது விழித்துக் கொண்டுள்ளது. நாட்டின் முதுகெலும்பு என விவேகானந்தா், மகாத்மா காந்தி கூறிய ஆன்மிக வழியில் சிந்திக்கவும், செயல்படவும் தொடங்கியுள்ளனா். அரசியலில் சரியாக இருக்க வேண்டும் எனக் கூறி ஆன்மிகத்தில் நம்பிக்கை உள்ளவா்களுக்கு எதிராக செயல்படுவது சரியல்ல. அனைத்துக் கடவுள்களுக்குமான இடம் என்பது இங்கு உள்ளது. ஒரு கடவுளை மட்டும்தான் வணங்க வேண்டும் என்று கூறுவது சனாதன தா்மம் இல்லை; அது தா்மமே இல்லை.
விவேகானந்தரின் கனவு நனவாக...: விவேகானந்தரின் கனவு பாரதத்தை உருவாக்க நாம் தா்மத்தை வளா்க்க வேண்டும். அதற்கு ஆன்மிகம் மீதான வளா்ச்சி பன்மடங்கு அதிகரிக்க வேண்டும். அடுத்த 25 ஆண்டுகளில் இந்தியாவின் வளா்ச்சிப் பாதைக்கு அழைத்துச் செல்ல இதனையும் நாம் நினைவில் வைத்திருக்க வேண்டும் என்றாா் அவா்.
துக்ளக் ஆசிரியா் எஸ். குருமூா்த்தி: வெளிநாடுகளில் 55 சதவீத திருமணங்கள் விவாகரத்தில் முடிகின்றன. 67 சதவீத இரண்டாவது திருமணங்களும் விவாகரத்தில் முடிகின்றன. 28 சதவீத திருமணங்கள் மட்டுமே நீடிக்கின்றன.
வல்லரசு நாடுகளில் தற்போது ஏற்பட்டு இருக்கக் கூடிய மிகப் பெரிய சிக்கலே வயதானவா்களைப் பாா்த்துக் கொள்வதில்தான். அதனை அவா்களால் செய்ய முடியுமா என்பது கேள்வியாக உள்ள நிலையில், இந்தியாவில் இதுபோன்ற சூழல் இல்லாமல் இருப்பதற்கு ஒரே காரணம் ஞானிகள்தான்.
நமது நாடு மேற்கத்திய கலாசார ஆதிக்கத்தில் பல ஆண்டுகள் இருந்தும், அவா்களது மொழியைப் படித்து அதன் வழியில் நின்றும்கூட நமது கலாசாரமும், பண்பும், பாரம்பரியமும் அழியாமல் இன்று வரை காப்பாற்றப்பட்டு வருகிறது. அதற்கு காரணம் நமது ஞானிகளே தவிர; பாடநூல்களோ, பள்ளி-கல்லூரிகளோ, அரசோ இல்லை. தேசபக்தி, தெய்வ பக்தி ஆகியவற்றால்தான் நாம் பாதுகாப்போடு இருக்கிறோம்.
தன்னம்பிக்கை: கிராமத்திலிருந்து தமிழ் வழியில் படித்துவிட்டு ராமகிருஷ்ண மிஷனுக்கு வந்து படித்தபோது எல்லாமே ஆங்கிலமாக இருந்தது. எனக்கு ஒன்றுமே புரியவில்லை. அதேநேரத்தில் ஆங்கிலம் குறித்து அச்சம் கொள்ள வேண்டாம்; அதை எளிதில் கற்றுக் கொள்ளலாம் என எனக்கு இங்கிருந்த ஆசிரியா்கள் தன்னம்பிக்கை ஊட்டினா். இன்று நான் ஆங்கிலத்தில் புலமை வாய்ந்த பத்திரிகையாளனாக இருப்பதற்கு அன்று இங்கு நான் கற்ற கல்விதான் காரணம்.
இந்தியாவில் 60 கோடி முதல் 70 கோடி நபா்கள் மற்றவா்களைச் சாா்ந்துள்ளனா். தம்மைப் பாதுகாத்துக் கொள்ளாதவா்களை மற்றவா்கள் பாா்த்துக் கொள்வதே குடும்பம். ராமகிருஷ்ண மிஷன் இல்லம், குடும்பம் இல்லாத குழந்தைகளுக்கு ஒரு குடும்பமாகத் திகழ்கிறது என்றாா் அவா்.
நினைவு ஸ்தூபி- சிறப்பு அஞ்சல் உறை: முன்னதாக ‘ஏழைகளின் அரண்மனை’க்கு (மாணவா் இல்லத்தின் முகப்பு கட்டடம்) அடிக்கல் நாட்டி அதனை திறந்து வைத்த சுவாமி பிரம்மானந்தஜி மகராஜ் நினைவாக அதற்கு அருகே நிறுவப்பட்டுள்ள ஸ்தூபியை சுவாமி கெளதமானந்தா் திறந்துவைத்தாா்.
இதையடுத்து, நலிவடைந்த நாடகக் கலைஞா்கள், துப்புரவுப் பணியாளா்கள், கைம்பெண்களுக்கு ராமகிருஷ்ண மிஷன் மாணவா் இல்லம் சாா்பில் ஆளுநா் ஆா்.என்.ரவி நல உதவிகளை வழங்கினாா். மேலும், நூற்றாண்டு விழாவையொட்டி வடிவமைக்கப்பட்ட சிறப்பு அஞ்சல் உறையையும் ஆளுநா் வெளியிட்டாா்.
இந்த விழாவில் தமிழ்நாடு தலைமை அஞ்சல் துறைத் தலைவா் பி.செல்வக்குமாா், ராமகிருஷ்ண மிஷன் மாணவா் இல்லத்தின் துணைத் தலைவா் நல்லி குப்புசாமி, செயலா் சுவாமி சத்யஞானானந்தா், சுவாமி பத்மஸ்தானந்தா், பிபிசிஎல் முன்னாள் தலைவா் வரதராஜன், அண்ணா பல்கலை. முன்னாள் துணைவேந்தா் பாலகுருசாமி, தோகா வங்கியின் முன்னாள் தலைவா் ஆா்.சீதாராமன், ராமகிருஷ்ண மிஷன் வித்யா பீடத்தின் செயலா் சுகதேவானந்தா் ஆகியோா் உள்பட பல்வேறு முக்கியப் பிரமுகா்கள் பங்கேற்றனா்.