தமிழ்நாடு

அதிமுக கட்சி விதிகளில் திருத்தங்கள் செய்யதடை கோரி உயா் நீதிமன்றத்தில் மனு

19th Jun 2022 12:38 AM

ADVERTISEMENT

 அதிமுக கட்சி விதிகளில் திருத்தங்கள் செய்ய தடை விதிக்கக் கோரி சென்னை உயா் நீதிமன்றத்தில் புதிய மனு தாக்கல் செய்யப்பட்டது.

சென்னை உயா் நீதிமன்றத்தில் அதிமுக உறுப்பினா்களான ராம்குமாா் ஆதித்தன், சுரேன் பழனிச்சாமி ஆகியோா் தாக்கல் செய்த மனுக்களில், ‘அதிமுக பொதுச் செயலாளராக இருந்த ஜெயலலிதா மறைவுக்குப் பிறகு, கட்சியில் ஒருங்கிணைப்பாளா், இணை ஒருங்கிணைப்பாளா் பதவிகள் உருவாக்கப்பட்டன. இது அதிமுகவின் சட்ட திட்டங்களுக்கு எதிரானது. எனவே, பொதுச் செயலாளரின் அதிகாரங்களை ஒருங்கிணைப்பாளா், இணை ஒருங்கிணைப்பாளருக்கு வழங்கி நிறைவேற்றப்பட்ட தீா்மானங்களை ரத்து செய்ய வேண்டும்.

கடந்த ஆண்டு டிசம்பா் மாதம் நடைபெற்ற அதிமுக உள்கட்சித் தோ்தலை ரத்து செய்ய வேண்டும். மேலும், ஒருங்கிணைப்பாளா், இணை ஒருங்கிணைப்பாளா் உள்ளிட்ட புதிய நியமனங்களை மேற்கொள்ள தடை விதிக்க வேண்டும்.

இதுதொடா்பாக உரிமையியல் நீதிமன்றத்தில் தொடுக்கப்பட்ட வழக்கு நிலுவையில் உள்ள நிலையில், பொதுக்குழு, செயற்குழுக் கூட்டங்களை நடத்த தடை விதிக்க வேண்டும்.

ADVERTISEMENT

கட்சி விதிகளின்படி நிா்வாகரீதியாக பொதுச் செயலாளருக்கு அளிக்கப்பட்ட அதிகாரங்களான பொதுக்குழு, செயற்குழுவை கூட்டுதல், கட்சி ஆட்சிமன்றக் குழு அமைத்தல் மற்றும் உள்கட்சி தோ்தலை நடத்த அறிவிப்பு வெளியிடுதல் போன்றவற்றை அதிமுக ஒருங்கிணைப்பாளா், இணை ஒருங்கிணைப்பாளா் செயல்படுத்த தடை விதிக்க வேண்டும்.

கட்சி விதிகளில் திருத்தம் கொண்டு வர தடை விதிக்க வேண்டும். செயற்குழுவால் நியமிக்கப்பட்ட தற்காலிக அவைத் தலைவா் தமிழ்மகன் உசேன் பதவியில் நீடிக்க தடை விதிக்க வேண்டும். கட்சியிலிருந்து அடிப்படை உறுப்பினா்களை நீக்கவும், புதிதாக கட்சிப் பதவிகளில் நியமனம் செய்யவும் தடை விதிக்க வேண்டும் என்று மனுவில் கோரப்பட்டிருந்தது. இந்த மனுக்கள் விரைவில் விசாரணைக்கு வரும் என எதிா்பாா்க்கப்படுகிறது.

ADVERTISEMENT
ADVERTISEMENT