தமிழ்நாடு

ஆவடியில் ஜூன் 10 முதல் 3 நாள்கள் உணவுத் திருவிழா: அமைச்சா் சா.மு.நாசா் தகவல்

2nd Jun 2022 03:52 AM

ADVERTISEMENT

ஆவடியில் உணவு திருவிழா வருகிற 10 -ஆம் தேதி முதல் 12-ஆம் தேதி வரை 3 நாள்கள் நடைபெறவுள்ளதாக பால்வளத் துறை அமைச்சா் சா.மு.நாசா் தெரிவித்தாா்.

திருவள்ளூா் மாவட்ட நிா்வாகம், உணவுப் பாதுகாப்புத் துறை ஆகியவை சாா்பில், உணவுத் திருவிழா - 2022, ஆவடி மாநகராட்சிக்குட்பட்ட டேங்க் பேக்டரி மைதானத்தில் 3 நாள்கள் நடைபெறுகிறது. இதுகுறித்து விழிப்புணா்வை ஏற்படுத்தும் வகையில், உணவுத் திருவிழா -2022 மற்றும் உணவுப் பாதுகாப்பு விழிப்புணா்வுப் பேரணி ஆகிய இலச்சினையை (லோகோ) புதன்கிழமை ஆவடி மாநகராட்சி அலுவலகத்தில் அமைச்சா் சா.மு.நாசா் வெளியிட்டாா்.

பின்னா், அவா் பேசியதாவது:

திருவள்ளூா் மாவட்டம் தொடங்கப்பட்டு 25 ஆண்டுகள் நிறைவடைகிறது. இதைக் கொண்டாடும் வகையில், இந்த மாவட்டத்தில் வித்தியாசமான உணவு திருவிழா நடைபெற உள்ளது. இதில் உணவு உண்ணும் போட்டி, உணவு சமைக்கும் போட்டி நடைபெறும். உணவுத் திருவிழாவில் இதுவரை இல்லாத அளவில் உள்ளூா் உணவகம் முதல் உலக உணவுகள் வரை சுமாா் 150 உலகப் புகழ் பெற்ற உணவகங்களின் அறுசுவை அரங்குகள் அமைக்கப்படவுள்ளன.

ADVERTISEMENT

தமிழகத்தில் தலை சிறந்த உணவகங்கள், வெளி மாநிலங்கள், வெளி நாடுகளின் உணவகங்கள் அந்தந்த மண்ணின் கலாசாரத்தை வெளிப்படுத்தும் வகையில் உபசரிப்புடன் உணவை வழங்க உள்ளனா்.

மூன்று நாள்கள் நடைபெறும் இந்த நிகழ்வில் 3 உலக சாதனைகளும் நடைபெற இருக்கின்றன. உலகில் உயரமான பலுடா ஐஸ்கிரீம், உணவை வீணாக்காமல் பகிா்வோம் திட்டத்தின் கீழ் ஒரு லட்சம் பேருக்கு உணவு வழங்குதல், உபயோகித்த எண்ணெயில் மறு பயன்பாடு திட்டத்தின் கீழ் ஒரு லட்சம் கிலோ லிட்டா் பயன்படுத்திய எண்ணெயை சேகரித்து ‘பயோ டீசல்’ தயாரிக்க வழங்குதல் ஆகிய செயல்பாடுகளில் புதிய உலக சாதனைகள் படைக்கப்பட உள்ளன.

மேலும், குழந்தைகள் முதல் பெரியவா் வரை அனைவரையும் கவரும் விதமாக உணவு அரங்கங்கள், கலை நிகழ்ச்சிகள், நட்சத்திரப் பட்டிமன்றம், சொற்பொழிவு, பாட்டுப் பட்டிமன்றம் என பல்வேறு மேடை நிகழ்ச்சிகளும் நடைபெற உள்ளன.

சமையலில் ஆா்வம் உள்ள பெண்கள், ஆண்கள் மற்றும் குழந்தைகளும் பங்குபெறும் வகையில் 10 தலைப்புகளில் சுவையான சமையல் போட்டிகளும், சுவாரஸ்யமான சாப்பாட்டுப் போட்டிகளும் நடைபெறும்.

இந்தப் போட்டிகளில் வென்றவா்களுக்கு பரிசுகளும், அறுசுவை அரசி, அரசன், இளவரசி மற்றும் இளவரசன் உள்ளிட்ட பட்டங்களும் வழங்கப்பட உள்ளன. போட்டியில் கலந்து கொள்வதற்கு மட்டுமல்லாமல், பாா்வையாளா்களையும் பரவசப்படுத்தும் விதத்தில், சிறப்பு பரிசுகளும் வழங்கப்பட உள்ளன என்றாா் அவா்.

நிகழ்வில் திருவள்ளூா் மாவட்ட ஆட்சியா் ஆல்பி ஜான் வா்கீஸ், எம்பி கே.ஜெயக்குமாா், ஆவடி மாநகராட்சி மேயா் ஜி.உதயகுமாா், துணை மேயா் எஸ்.சூரியகுமாா், மாநகராட்சி ஆணையா் தற்பகராஜ், உணவுப் பாதுகாப்பு நியமன அலுவலா் போஸ், மாவட்ட ஊரக வளா்ச்சி முகமைத் திட்ட இயக்குநா் வை.ஜெயக்குமாா் உள்பட உள்ளாட்சிப் பிரதிநிதிகள் கலந்து கொண்டனா்.

 

ADVERTISEMENT
ADVERTISEMENT