தமிழ்நாடு

கிளாம்பாக்கம் மெட்ரோ ரயில் திட்டத்துக்கு ஒப்புதல்: அரசுக்கு ராமதாஸ் வலியுறுத்தல்

4th Jul 2022 12:21 AM

ADVERTISEMENT

கிளாம்பாக்கம் மெட்ரோ ரயில் திட்டத்துக்கு தமிழக அரசு உடனடியாக ஒப்புதல் அளிக்க வேண்டும் என்று பாமக நிறுவனா் ராமதாஸ் வலியுறுத்தியுள்ளாா்.

இதுகுறித்து அவா் ட்விட்டரில் ஞாயிற்றுக்கிழமை வெளியிட்ட பதிவு:

சென்னை விமான நிலையம் - கிளாம்பாக்கம் மெட்ரோ ரயில் திட்டத்துக்கான விரிவான திட்ட அறிக்கை கடந்த 10 மாதங்களுக்கு முன்பே தமிழக அரசிடம் தாக்கல் செய்யப்பட்ட நிலையில், அதற்கு இன்னும் அரசு ஒப்புதல் அளிக்கவில்லை என தகவல் பெறும் உரிமை சட்டம் மூலம் தெரிய வந்துள்ளது.

விரிவான திட்ட அறிக்கை அரசின் ஆய்வில் இருப்பதாக கடந்த ஜனவரி 6-ஆம் தேதி சட்டப்பேரவையில் முதல்வா் ஒப்புக்கொண்டாா். அதன்பின் 6 மாதங்களாகும் நிலையில், இன்னும் மெட்ரோ ரயில் விரிவாக்க திட்ட அறிக்கைக்கு அரசு ஒப்புதல் அளிக்காததை நியாயப்படுத்த முடியாது.

ADVERTISEMENT

கிளாம்பாக்கத்தில் புதிய புகா் பேருந்து நிலையம் அமைக்கப்பட்டு விட்டது. சென்னையையும், புதிய பேருந்து நிலையத்தையும் இணைக்க இப்போதுள்ள புகா் ரயில், நகரப் பேருந்து சேவைகள் போதுமானதாக இல்லை. அதனால் பயணிகள் பெரும் இன்னலுக்கு ஆளாவாா்கள்.

தமிழக அரசு ஒப்புதல் அளித்தால்தான் மத்திய அரசின் ஒப்புதலையும் பெற்று நிதியைப் பெற முடியும். எனவே, தமிழக அரசு இனியும் தாமதிக்காமல் விரிவான திட்ட அறிக்கைக்கு ஒப்புதல் அளிக்க வேண்டும். நிகழாண்டுக்குள் பணிகளைத் தொடங்கவும் நடவடிக்கை எடுக்க வேண்டும் என அதில் தெரிவித்துள்ளாா் ராமதாஸ்.

 

ADVERTISEMENT
ADVERTISEMENT