தமிழக நிதியமைச்சா் பி.டி.ஆா்.பழனிவேல் தியாகராஜன் காா் மீது பாஜகவினா் தாக்குதல் நடத்தியுள்ளதற்கு அரசியல் கட்சித் தலைவா்கள் கண்டனம் தெரிவித்துள்ளனா்.

துரைமுருகன் (திமுக): பயங்கரவாதிகளின் தாக்குதலில் உயிரிழந்த மதுரை ராணுவ வீரா் லட்சுமணன் உடலுக்கு இறுதி மரியாதை செலுத்தச் சென்ற நிதியமைச்சா் பழனிவேல் தியாகராஜனின் தேசியக் கொடி பொருத்தப்பட்ட காரின் மீது காலணி வீசியிருக்கும் பாஜகவினரின் அரசியல் பண்பாடற்ற செயலுக்குக் கண்டனத்தைத் தெரிவித்துக் கொள்கிறேன்.

நாட்டுக்காக உயிா்நீத்த ராணுவ வீரரின் உடலுக்கு மரியாதை செலுத்துவதிலும் இதுபோன்று அரசியல் ஆதாயம் தேடும் செயலில் பாஜகவினா் ஈடுபட்டுள்ளனா்.

கே.எஸ்.அழகிரி (காங்கிரஸ்): ராணுவ வீரா் லட்சுமணன் உடலுக்கு அஞ்சலி செலுத்த நிதியமைச்சா் பழனிவேல் தியாகராஜன் வந்தபோது பாஜகவினா் அநாகரிகமாக நடந்துள்ளனா். அவா் வந்த காா் மீது காலணிகளை வீசி தாக்குதல் நடத்தியுள்ளனா். இது கண்டிக்கத்தக்கது. சகிப்புத்தன்மை இல்லாமல் இதுபோன்ற அநாகரிக செயல்களில் ஈடுபடுவதை பாஜகவினா் உடனடியாக நிறுத்திக் கொள்ள வேண்டும்.

கே.பாலகிருஷ்ணன் (மாா்க்சிஸ்ட்): நிதியமைச்சா் காா் மீது காலணி வீசி தாக்கி இழிவான அரசியலில் பாஜகவினா் ஈடுபட்டுள்ளனா். இந்த சம்பவத்தில் ஈடுபட்டவா்கள் மீது கடுமையான பிரிவுகளின் கீழ் வழக்குப் பதிவு செய்து காவல் துறை உரிய நடவடிக்கை எடுக்க வேண்டும்.

கி.வீரமணி (திராவிடா் கழகம்): நிதியமைச்சா் காா் மீது பாஜகவினா் காலணி வீசியிருப்பது கண்டிக்கத்தக்கது. பாஜகவினா் கூறும் தாா்மிகப் பண்பு இதுதான் என்றால், அவா்களை தமிழக மக்கள் அடையாளம் காண வேண்டும்.

ஜவாஹிருல்லா (மமக): நிதியமைச்சரின் காா் மீது காலணி வீசி தாக்குதலில் ஈடுபட்டவா்கள் மீது தமிழக அரசு சட்டரீதியான நடவடிக்கை எடுக்க வேண்டும்.