அரசுப் பள்ளி மாணவா்கள் 4 சதவீதம் பேரே தொழிற்படிப்புகளில் சேருகின்றனா். அந்த மாணவா்களுக்கு இட ஒதுக்கீடு வழங்குவது குறித்து ஆய்வு செய்து ஒரு மாதத்திற்குள் அறிக்கை சமா்ப்பிக்கப்படும் என ஓய்வு பெற்ற உயா் நீதிமன்ற நீதிபதி முருகேசன் தெரிவித்துள்ளாா்.

சட்டம், வேளாண்மை, பொறியியல், கால்நடை, மீன்வளம் உள்ளிட்ட தொழிற்படிப்புகளில் அரசுப் பள்ளி மாணவா்கள் சோ்க்கை குறித்தும், அதில் உள்ள பாதிப்புகளை நிவா்த்தி செய்வதற்கும் தில்லி உயா்நீதிமன்ற ஓய்வு பெற்ற நீதிபதி முருகேசன் தலைமையில் குழு அமைக்கப்பட்டுள்ளது. இந்தக் குழுவின் முதல் கூட்டம் தகவல் தொழில்நுட்ப கல்வி இயக்குநா் அலுவலகத்தில் வெள்ளிக்கிழமை நடைபெற்றது.

இதைத் தொடா்ந்து ஓய்வு பெற்ற நீதிபதி முருகேசன் செய்தியாளா்களிடம் கூறியது: மருத்துவப் படிப்பைத் தவிர சட்டம், பொறியியல், வேளாண்மை, கால்நடை, மீன்வளம் உள்ளிட்ட தொழிற்படிப்புகளில் அரசுப் பள்ளி மாணவா்கள் சோ்க்கையில் உள்ள பாதிப்புகளைக் கண்டறிந்து அறிக்கை அளிக்க தமிழ்நாடு அரசு குழு அமைத்துள்ளது. அரசுப்பள்ளி மாணவா்கள் தொழிற்படிப்புகளில் 2 முதல் 4 விழுக்காடு வரை சேருகின்றனா். இதனை மாற்றி அரசுப் பள்ளி மாணவா்களுக்கு தொழில் படிப்புகளில் தனி இட ஒதுக்கீடு வழங்குவது தொடா்பாக முடிவெடுக்க ஆணையம் அமைக்கப்பட்டுள்ளது.

அரசுப் பள்ளி மாணவா்களுக்கு தொழில் படிப்புகளில் இட ஒதுக்கீடு வழங்குவதால் அவா்களின் சமூக பொருளாதாரம் மேம்படும். துறை வாரியான கோப்புகள் மற்றும் தரவுகளை அதிகாரிகளிடம் கேட்டிருக்கிறோம். இந்த அறிக்கை ஒரு வாரத்தில் கிடைக்கும். அதனடிப்படையில் அரசுப்பள்ளி மாணவா்களுக்கு தொழில் படிப்புகளில் எத்தனை சதவீதம் இட ஒதுக்கீடு வழங்கலாம் என்பதை ஆய்வு செய்து பரிந்துரையாக அளிக்க உள்ளோம். அரசு நிா்ணயித்த ஒரு மாதத்திற்குள் அறிக்கை சமா்ப்பிக்கப்படும் என்றாா் அவா்.