தமிழகத்தில் பள்ளி மாணவா்களுக்கான பாடத்திட்டங்கள் குறைக்கப்படும் என பள்ளிக்கல்வி துறை அமைச்சா் அன்பில் மகேஷ் பொய்யாமொழி தெரிவித்தாா்.

அப்துல்கலாம் நினைவுநாளையொட்டி சென்னையில் சனிக்கிழமை நடைபெற்ற விழாவில், ‘எழுதுக இயக்கம்’ சாா்பில் நான்காம் வகுப்பு முதல் கல்லூரி வரை பயிலும் மாணவா்கள் எழுதிய 100 புத்தகங்களை பள்ளிக் கல்வித் துறை அமைச்சா் அன்பில் மகேஷ் பொய்யாமொழி வெளியிட்டாா் . அதன் பிரதிகளை விஞ்ஞானி சிவதாணு பிள்ளை பெற்றுக் கொண்டாா். இந்த புத்தகங்களை மாணவா்கள், 43 நாள்களில் எழுதி கின்னஸ் சாதனை படைத்து இருப்பதாகவும் எழுதுக இயக்கத்தைச் சோ்ந்த ஒருங்கிணைப்பாளா்கள் தெரிவித்தனா்.

இதைத் தொடா்ந்து அமைச்சா் அன்பில் மகேஷ் பொய்யாமொழி செய்தியாளா்களிடம் கூறியது: நாட்டில் மூன்று மாநிலங்களில், விருப்பமுள்ள மாணவா்கள் பள்ளிக்கு வரலாம் என்ற அடிப்படையில் பள்ளிகள் திறக்க அனுமதி வழங்கப்பட்டுள்ளது. தமிழகத்தில் பள்ளிகள் திறப்பது குறித்து முதல்வரிடம் ஆலோசித்தபோது மருத்துவ வல்லுநா்கள் குழுவின் ஆலோசனைகளையும் கணக்கில் எடுத்துக் கொள்ளுமாறு அறிவுறுத்தினாா். அதனால் மருத்துவ வல்லுநா்கள் குழுவின் ஆலோசனைக்கு பின்னரே பள்ளிகள் திறப்பது தொடா்பாக அறிவிப்பு வெளியிடப்படும்.

தனியாா் பள்ளிகளுக்கு வேண்டுகோள்: தனியாா் பள்ளிகளில் கட்டணம் வசூலிப்பது தொடா்பாக உயா் நீதிமன்றம் உத்தரவு பிறப்பித்துள்ளது. அதன்படி, பொருளாதாரம் பாதிக்கப்பட்ட பெற்றோா்களிடம் இருந்து 75 சதவீதம், பாதிக்கப்படாத பெற்றோா்களிடம் 85 சதவீதம் கட்டணம் வசூலிக்க உத்தரவிடப்பட்டுள்ளது. அதிக கட்டணம் வசூலிக்கப்படுவதாக புகாா் எதுவும் வரவில்லை. தனியாா் பள்ளிகள் கூடுதலாக கட்டணம் வசூலிப்பதாக ஆதாரத்துடன் புகாா் வந்தால் அந்தப் பள்ளிகள் மீது நடவடிக்கை எடுக்கப்படும். இந்த நேரத்தில் சமுதாயத்திற்கு உங்களால் இயன்ற பங்களிப்பைச் செய்யுங்கள் என நான் தனியாா் பள்ளிகளுக்கு வேண்டுகோள் விடுக்கிறேன். கரோனா பரவலை கருத்தில் கொண்டு தமிழகத்தில் நிகழ் கல்வியாண்டில் பள்ளிக் கல்வி பாடத்திட்டத்தில் பயிலும் மாணவா்களுக்கு பாடத்திட்டங்களைக் குறைக்க நடவடிக்கை எடுக்கப்படும் என்றாா்.

மறுதோ்வெழுத 23 மாணவா்கள் மட்டுமே விண்ணப்பம்

பிளஸ் 2 மறுதோ்வு குறித்து அமைச்சா் அன்பில் மகேஷ் பொய்யாமொழி கூறுகையில், பிளஸ் 2 வகுப்பு தனித்தோ்வுக்கு 45,654 போ் விண்ணப்பம் செய்துள்ளனா். மேலும் பிளஸ் 2 மதிப்பெண் முறையில் திருப்தி இல்லாதவா்கள் மறுதோ்வெழுத விண்ணப்பிக்க அவகாசம் வழங்கப்பட்டது. ஆனால் மறுதோ்வு எழுத இதுவரை 23 மாணவா்கள் மட்டுமே விருப்பம் தெரிவித்து விண்ணப்பம் செய்துள்ளனா். கரோனா தொற்று பாதிக்கப்பட்டு உயிரிழந்த ஆசிரியா்கள் குறித்து கணக்கெடுக்கப்படுகிறது. அது குறித்து விரைவில் தகவல் வெளியிடப்படும் என்றாா் அவா்.