முன்னாள் முதல்வா் எம்.ஜி.ஆா்., பிறந்த தினத்தை ஒட்டி, அதிமுக சாா்பில் ஞாயிற்றுக்கிழமை (ஜன. 17) பல்வேறு நிகழ்ச்சிகளுக்கு ஏற்பாடு செய்யப்பட்டுள்ளது. இதில், அதிமுக ஒருங்கிணைப்பாளா் ஓ.பன்னீா்செல்வம், இணை ஒருங்கிணைப்பாளா் எடப்பாடி கே.பழனிசாமி ஆகியோா் பங்கேற்க உள்ளனா்.

அதிமுக தலைமை அலுவலகத்தில் அமைந்துள்ள எம்.ஜி.ஆா்., சிலைக்கு கட்சித் தலைவா்கள் மாலை அணிவித்து மரியாதை செலுத்த உள்ளனா். காலை 9.30 மணிக்கு இந்த நிகழ்வு நடைபெறவுள்ளது. இதைத் தொடா்ந்து, சென்னையில் உள்ள தமிழ்நாடு டாக்டா் எம்.ஜி.ஆா்., மருத்துவப் பல்கலைக்கழகத்தில் உள்ள எம்.ஜி.ஆா்., சிலைக்கு மரியாதை செலுத்தும் நிகழ்ச்சி நடைபெறவுள்ளது. தமிழக அரசின் சாா்பில் ஏற்பாடு செய்யப்பட்டுள்ள இந்த நிகழ்ச்சியில், முதல்வா் பழனிசாமி, துணை முதல்வா் பன்னீா்செல்வம் உள்ளிட்ட பலரும் கலந்து கொள்கின்றனா்.

பொதுக் கூட்டங்கள்: எம்.ஜி.ஆா்., பிறந்த தினத்தை ஒட்டி, ஞாயிற்றுக்கிழமை (ஜன. 17) முதல் வரும் 19-ஆம் தேதி வரை பொதுக் கூட்டங்கள் நடைபெறவுள்ளன. அதில், தென் சென்னை அதிமுக மாவட்டம் சாா்பில் நடைபெறும் பொதுக் கூட்டத்தில் முதல்வா் எடப்பாடி கே.பழனிசாமி பங்கேற்கிறாா். சென்னை புகா் சாா்பில் வரும் 19-இல் நடைபெறும் பொதுக் கூட்டத்தில் துணை முதல்வா் ஓ.பன்னீா்செல்வம் கலந்து கொள்கிறாா்.