தமிழ்நாடு

பெண்கள், ஆண்களுக்கு சம வாா்டுகளை ஒதுக்கக் கோரி வழக்கு: அரசு பதிலளிக்க உத்தரவு

3rd Dec 2021 05:37 AM

ADVERTISEMENT

சென்னை மாநகராட்சி வாா்டுகளை மண்டல வாரியாக ஒதுக்காமல், ஒட்டு மொத்தமாகப் பிரித்து ஆண்களுக்கும் பெண்களுக்கும் சமமாக ஒதுக்க வேண்டுமென தொடரப்பட்ட வழக்கில் தமிழக அரசு பதிலளிக்குமாறு சென்னை உயா் நீதிமன்றம் உத்தரவிட்டுள்ளது.

சென்னை மாநகராட்சிக்கான மொத்தமுள்ள 200 வாா்டுகளில் பட்டியலின, பழங்குடியின மற்றும் அவற்றின் பெண்கள் என 32 வாா்டுகள் ஒதுக்கப்பட்டுள்ளன. மீதமுள்ள 168 இடங்களில் பொதுப் பிரிவில் பெண்களுக்கு 89 இடங்களும் , ஆண்களுக்கு 79 இடங்களும் ஒதுக்கப்பட்டுள்ளன.

கடந்த 2016-ஆம் ஆண்டு பிறப்பிக்கப்பட்ட தமிழ்நாடு நகராட்சி சட்டத்தின் அடிப்படையில் மீதமுள்ள 168 இடங்களில் பெண்களுக்கு 50 சதவீதம் இட ஒதுக்கீடாக 84 இடங்கள் தான் ஒதுக்கப்பட்டு இருக்க வேண்டும். ஆனால் பெண்களுக்கு கூடுதலாக வாா்டுகள் ஒதுக்கப்பட்டுள்ளன.

இந்நிலையில், ஆண்களுக்கும், பெண்களுக்கும் சரிசமமாக வாா்டுகளை ஒதுக்கக் கோரி வழக்குரைஞா் ஆா்.பாா்த்திபன் என்பவா் சென்னை உயா் நீதிமன்றத்தில் வழக்கு தொடா்ந்தாா்.

ADVERTISEMENT

இந்த வழக்கு பொறுப்பு தலைமை நீதிபதி முனீஸ்வா் நாத் பண்டாரி, நீதிபதி பி.டி. ஆதிகேசவலு ஆகியோா் அடங்கிய அமா்வு முன்பு வியாழக்கிழமை (டிச.2) விசாரணைக்கு வந்தது. அப்போது மனுதாரா் தரப்பில் ஆஜரான மூத்த வழக்குரைஞா் எஸ்.பிரபாகரன், 50 சதவீதத்திற்கும் அதிகமாகப் பெண்களுக்கு வாா்டுகள் ஒதுக்கீடு செய்யப்பட்டுள்ளன. தமிழ்நாடு நகராட்சிகள் திருத்த சட்டம் 2016-இன் படி, ஆண்கள், பெண்களுக்கு சரிசமமாக வாா்டுகளை ஒதுக்கீடு செய்ய வேண்டும். அதாவது மண்டல வாரியாக வாா்டுகளை ஒதுக்கீடு செய்யாமல், மாநகராட்சியின் ஒட்டுமொத்த வாா்டுகளையும் ஆண்களுக்கும், பெண்களுக்கும் சமமாகப் பிரித்து வழங்க வேண்டும் என வாதிட்டாா்.

அதைத்தொடா்ந்து ஆஜரான அரசு தலைமை வழக்குரைஞா் ஆா்.சண்முக சுந்தரம், மண்டல வாரியாக வாா்டுகளைப் பிரித்து ஒதுக்கும்போது ஒற்றைப்படை எண்ணிக்கையில் வாா்டுகள் இருந்தால் பெண்களுக்கு ஒரு வாா்டு கூடுதலாகிவிடும். இதன் காரணமாகத்தான் பெண்களுக்கு கூடுதல் வாா்டுகள் வருகின்றன.

உச்ச நீதிமன்ற உத்தரவின்படி உள்ளாட்சித் தோ்தலை விரைந்து முடிக்க வேண்டியுள்ளது. இந்த வழக்கில் பதில்தர கால அவகாசம் வேண்டும் என்றாா்.

இருதரப்பு வாதத்தைக் கேட்ட நீதிபதிகள், இம்மனுவுக்கு தமிழக அரசு பதிலளிக்க வேண்டுமெனக்கூறி, விசாரணையை இரண்டு வாரங்களுக்கு ஒத்திவைத்து உத்தரவிட்டனா்.

மேலும், சென்னை மாநகராட்சித் தோ்தல் தொடா்பான அறிவிக்கை வெளியாகும்பட்சத்தில், அது சாா்ந்த அனைத்து நடவடிக்கைகளும் இவ்வழக்கின் இறுதித் தீா்ப்புக்கு உட்பட்டது என்றும் நீதிபதிகள் தெரிவித்தனா்.

ADVERTISEMENT
ADVERTISEMENT