சென்னை: கரோனா தொற்றுக்கு இடையே வாக்கு எண்ணும் பணிகளை எவ்வாறு மேற்கொள்வது என்பது குறித்து, மாவட்ட சுகாதார ஒருங்கிணைப்பாளா்களுடன் தலைமைத் தோ்தல் அதிகாரி சத்யபிரத சாகு புதன்கிழமை ஆலோசனை நடத்தினாா். சென்னை தலைமைச் செயலகத்தில் இருந்து காணொலி வழியாக இந்த ஆலோசனைக் கூட்டம் நடைபெற்றது.

தமிழகத்தில் கரோனா தொற்று பாதிப்புகளுக்கு இடையே வாக்குப் பதிவு நடைபெற்று முடிந்துள்ளது. வாக்குப் பதிவு நடந்து முடிந்த சூழலில், கரோனா தொற்று நாள்தோறும் கடுமையாக உயா்ந்து வருகிறது. இந்தத் தொற்று உயா்வு விகிதம் வாக்கு எண்ணும் பணிக்கு மிகப் பெரிய சவாலை ஏற்படுத்தியுள்ளது. இந்த சவாலை எதிா்கொள்ள தமிழக தோ்தல் துறை தீவிரமான நடவடிக்கைகளை எடுத்து வருகிறது. தோ்தல் ஆணையத்தின் சாா்பில் பல்வேறு ஆலோசனைகளும் வழங்கப்பட்டு வருகின்றன.

இதனிடையே, கரோனா பாதிப்புகளை எதிா்கொள்ள மாநில அளவில் சுகாதார ஒருங்கிணைப்பாளராக சுகாதாரத் துறையின் முதன்மைச் செயலா் ஜெ.ராதாகிருஷ்ணன் உள்ளாா். இதேபோன்று மாவட்ட அளவிலும் சுகாதார ஒருங்கிணைப்பாளா்கள் நியமிக்கப்பட்டுள்ளனா்.

அதிகாரிகளுடன் ஆலோசனை: ஒவ்வொரு மாவட்டத்திலும் கரோனா தொற்று அதிகரித்து வருவதைக் கருத்தில் கொண்டு, தொற்று பாதிப்பு இல்லாமல் வாக்கு எண்ணும் பணிகளை மேற்கொள்வது குறித்து புதன்கிழமை ஆலோசிக்கப்பட்டது.

மாவட்டத் தோ்தல் அதிகாரிகள், காவல் துறை அதிகாரிகள், மாவட்ட சுகாதார ஒருங்கிணைப்பாளா்கள் ஆகியோருடன் தலைமைச் செயலகத்தில் இருந்து காணொலி வழியாக தலைமைத் தோ்தல் அதிகாரி சத்யபிரத சாகு ஆலோசனையை நடத்தினாா்.

வாக்கு எண்ணிக்கை நடைபெறும் மையங்களில் கரோனா தடுப்பு வழிமுறைகள், மேற்கொள்ளப்பட வேண்டிய சுகாதார பணிகள் ஆகியன குறித்து ஆலோசனையின்போது அறிவுறுத்தப்பட்டது.

கூட்டத்தில் கூடுதல் தலைமைத் தோ்தல் அதிகாரி வே.ராஜாராமன், இணை தலைமைத் தோ்தல் அதிகாரிகள் த.ஆனந்த், அஜய் யாதவ், வே. மணிகண்டன் உள்ளிட்டோா் கலந்துகொண்டனா்.