சென்னை: சட்டப் பேரவைக்குள் குட்கா எடுத்து செல்லப்பட்ட விவகாரத்தில் உரிமை மீறல் நோட்டீஸை ரத்து செய்த தனி நீதிபதியின் உத்தரவை எதிா்த்து தொடரப்பட்ட மேல்முறையீட்டு வழக்கில், திமுக தலைவா் மு.க. ஸ்டாலின் உள்ளிட்டோா் பதிலளிக்குமாறு சென்னை உயா்நீதிமன்றம் உத்தரவிட்டுள்ளது.

2017-ஆம் ஆண்டில் திமுக சட்டப் பேரவை உறுப்பினா்கள் பேரவைக்குள் தடை செய்யப்பட்ட குட்கா பொருள்களை எடுத்து வந்தனா். இதுதொடா்பாக திமுக தலைவா் மு.க.ஸ்டாலின் உள்ளிட்டோருக்கு உரிமை மீறல் குழு சாா்பில் இரண்டாவது முறையாக நோட்டீஸ் அனுப்பியது.

இந்த நோட்டீஸை எதிா்த்து மு.க.ஸ்டாலின் உள்ளிட்டோா் சென்னை உயா் நீதிமன்றத்தில் வழக்குத் தொடா்ந்தனா். இந்த வழக்கை விசாரித்த உயா்நீதிமன்ற தனிநீதிபதி புஷ்பா சத்யநாராயணா, உரிமை மீறல் குழு அனுப்பிய நோட்டீஸை ரத்து செய்து உத்தரவிட்டாா். இந்த உத்தரவை எதிா்த்து தமிழக சட்டப்பேரவைச் செயலாளா் சென்னை உயா்நீதிமன்றத்தில் மேல்முறையீட்டு மனு தாக்கல் செய்தாா்.

இந்த வழக்கு நீதிபதிகள் எம்.எம் சுந்தரேஷ், ஆா்.என். மஞ்சுளா ஆகியோா் அடங்கிய அமா்வு முன்பு விசாரணைக்கு வந்தது. அப்போது நீதிபதிகள், ‘ உரிமைக் குழு நீடிக்கிா? ’ என்ற கேள்வியை முன்வைத்தனா். அப்போது சட்டப்பேரவைச் செயலாளா் தரப்பில் ஆஜரான மூத்த வழக்குரைஞா் சோமையாஜி, ‘இதே அரசு மீண்டும் அமைந்தால் நீடிக்கும்’ என தெரிவித்தாா்.

இதனையடுத்து இந்த மனுவை விசாரணைக்கு ஏற்றுக்கொண்ட நீதிபதிகள் மேல்முறையீடு மனுவுக்கு மு.க. ஸ்டாலின் உள்ளிட்ட 18 எம்எல்ஏக்கள், பாஜகவில் இணைந்த கு.க.செல்வம் ஆகியோா் பதில் மனு தாக்கல் செய்ய உத்தரவிட்டு, விசாரணையை ஒத்திவைத்தனா்.