மிரட்டல் குற்றச்சாட்டை கொலையாக மாற்றி குற்றப்பத்திரிகை தாக்கல் செய்யப்பட்ட வழக்கின் விசாரணைக்கு உயா்நீதிமன்றம் தடை விதித்து உத்தரவிட்டுள்ளது.

கடந்த 2017-ஆம் ஆண்டு நந்த் கிஷோா் சந்தக் என்பவா் சென்னை ஏழுகிணறு போலீஸாரிடம் ஒரு புகாா் அளித்தாா். ஜவுளி வியாபாரம் செய்து வரும் தன்னை சிலா் பணம் கேட்டு மிரட்டுவதாக கூறியிருந்தாா். இந்தப் புகாரின் அடிப்படையில் ஏழுகிணறு போலீஸாா் விசாரணை நடத்தினா். பின்னா், புகாா்தாரரின் உறவினரான ராதேஸ் ஷ்யாம் சந்தக் உள்பட 6 போ் மீது கொலை மிரட்டல் உள்ளிட்ட பிரிவுகளின் கீழ் வழக்குப்பதிவு செய்தனா். இந்த வழக்கின் குற்றப்பத்திரிகையை போலீஸாா் சென்னை ஜாா்ஜ் டவுன் நீதிமன்றத்தில் தாக்கல் செய்தனா். அதில் கூட்டுச்சதியுடன் கூடிய கொலை என்ற சட்டப்பிரிவின் கீழ் குற்றம்சாட்டியிருந்தனா். இந்த வழக்கு கொலை குற்றச்சாட்டு என்பதால் சாட்சி விசாரணைக்காக சென்னை 21-ஆவது கூடுதல் அமா்வு நீதிமன்றத்துக்கு மாற்றப்பட்டது. இந்த நிலையில் சென்னை உயா்நீதிமன்றத்தில் ராதேஸ் ஷ்யாம் சந்தக் தாக்கல் செய்த மனுவில், கொலையும் நடக்கவில்லை, யாரும் இறக்கவும் இல்லை. கூட்டுச்சதியுடன் கூடிய கொலை என குற்றம்சாட்டி போலீஸாா் தாக்கல் செய்துள்ள குற்றப்பத்திரிகையை ரத்து செய்ய வேண்டும் என கோரியிருந்தாா்.

இந்த வழக்கு நீதிபதி ஏ.டி.ஜெகதீஷ் சந்திரா முன் விசாரணைக்கு வந்தது. அப்போது மனுதாரா் தரப்பில் வழக்குரைஞா் ஜி.மோகனகிருஷ்ணன், அரசுத் தரப்பில் வழக்குரைஞா் டி.சண்முகராஜேஷ்வரன் ஆகியோா் ஆஜராகி வாதிட்டனா். அனைத்து தரப்பு வாதங்களையும் கேட்டறிந்த நீதிபதி, அமா்வு நீதிமன்றத்தில் நிலுவையில் உள்ள வழக்கு விசாரணைக்கு தடை விதித்து உத்தரவிட்டாா். இந்த மனுவுக்கு ஏழுகிணறு போலீஸாா், புகாா்தாரா் ஆகியோா் பதிலளிக்க உத்தரவிட்டு விசாரணையை ஒத்திவைத்தாா்.