தமிழ்நாடு

டிஎம்எஸ் மெட்ரோ ரயில் நிலையத்துக்கு கருணாநிதியின் பெயர் சூட்டக் கோரிய வழக்கு தள்ளுபடி

14th Sep 2020 01:10 PM

ADVERTISEMENT

தேனாம்பேட்டை டிஎம்எஸ் மெட்ரோ ரயில் நிலையத்துக்கு மறைந்த முன்னாள் முதல்வர் கருணாநிதியின் பெயர் சூட்டுவது தொடர்பாக அரசு தான் முடிவெடுக்க வேண்டும் எனக்கூறி வழக்கை உயர்நீதிமன்றம் தள்ளுபடி செய்துள்ளது.

சென்னை உயர்நீதிமன்றத்தில் கலைஞர் தமிழ் பேரவையின் செயலாளர் பி.ராதாகிருஷ்ணன் தாக்கல் செய்த மனுவில், தமிழக முதல்வர் கடந்த ஆகஸ்ட் 1- ஆம் தேதி சென்னையில் உள்ள ஆலந்தூர், சென்ட்ரல் மற்றும் கோயம்பேடு மெட்ரோ ரயில் நிலையங்களுக்கு பெயர் சூட்டினார். ஆலந்தூர் மெட்ரோ ரயில் நிலையத்துக்கு 'அறிஞர் அண்ணா ஆலந்தூர் மெட்ரோ ரயில் நிலையம்' எனவும், சென்ட்ரல்  மெட்ரோ ரயில் நிலையத்துக்கு 'புரட்சி தலைவர் டாக்டர். எம்.ஜி. இராமச்சந்திரன் மெட்ரோ ரயில் நிலையம்'  எனவும், கோயம்பேடு மெட்ரோ ரயில் நிலையத்துக்கு 'புரட்சி தலைவி டாக்டர். ஜெயலலிதா மெட்ரோ ரயில் நிலையம்' எனவும்  பெயர் சூட்டப்பட்டது. 

ஆனால், அரசியல் காரணத்துக்காக மெட்ரோ ரயில் நிலையத்துக்கு முன்னாள்
முதல்வர் கருணாநிதியின் பெயரை சூட்டவில்லை. ஆனால், மெட்ரோ ரயில்
திட்டத்துக்கு மூளையாக இருந்தவரே கருணாநிதி தான். இந்த திட்டத்தை
சென்னையில் அமல்படுத்துவதற்கு முன், தற்போது  எதிர்கட்சி தலைவராக
இருக்கும், திமுக தலைவர் மு.க.ஸ்டாலின் ஜப்பான் சென்று, அங்கு மெட்ரோ
ரயில் செயல்பாடு குறித்து ஆய்வு செய்தார். அதன் பின்னர் தான் இந்த திட்டம் சென்னையில் அமல்படுத்தப்பட்டது. எனவே, தேனாம்பேட்டையில் உள்ள டி.எம்.எஸ் மெட்ரோ ரயில் நிலையத்துக்கு கருணாநிதியின் பெயர் சூட்ட தமிழக அரசுக்கு உத்தரவிட வேண்டும் என கோரியிருந்தார்.

இந்த வழக்கு நீதிபதிகள் எம்.எம்.சுந்தரேஷ், ஆர்.ஹேமலதா ஆகியோர் அடங்கிய அமர்வு முன் விசாரணைக்கு வந்தது. வழக்கை விசாரித்த நீதிபதிகள், தேனாம்பேட்டை டிஎம்எஸ் மெட்ரோ ரயில் நிலையத்துக்கு மறைந்த முன்னாள் முதல்வர் கருணாநிதியின் பெயர் சூட்டுவது குறித்து உயர்நீதிமன்றம் முடிவெடுக்க முடியாது. அரசு முடிவெடுக்க வேண்டும் எனக்கூறி மனுவை தள்ளுபடி செய்தனர்.

ADVERTISEMENT

Tags : karunanidhi
ADVERTISEMENT

MORE FROM THE SECTION

ADVERTISEMENT