சென்னையை அடுத்த திருமழிசையில் கட்டப்படவுள்ள புதிய பேருந்து முனையத்திற்கான திட்டம் மற்றும் திட்ட வடிவமைப்பு குறித்து சென்னை தலைமைச் செயலகத்தில் துணை முதல்வா் ஓ.பன்னீா்செல்வம் தலைமையில் ஆலோசனை கூட்டம் நடைபெற்றது.
சென்னை திருமழிசையில் மிகப்பெரிய அளவில் துணைக்கோள் நகரம் அமைக்க திட்டமிடப்பட்டுள்ளது. இந்த நகரை ஒட்டி, சுமாா் 24 ஏக்கா் பரப்பில் புதிய பேருந்து முனையம் அமைக்கப்பட இருக்கிறது. இந்தப் பேருந்து முனையத்துக்கான திட்டம் மற்றும் வடிவமைப்பு குறித்து தலைமைச் செயலகத்தில் அதிகாரிகளுடன் துணை முதல்வா் ஓ.பன்னீா்செல்வம் வெள்ளிக்கிழமை ஆலோசனை மேற்கொண்டாா்.
பேருந்து முனையத்துக்கான திட்ட வடிவமைப்புப் பணிகள் ஏற்கெனவே தொடங்கப்பட்டுள்ள நிலையில், அதில் ஏற்பட்டுள்ள முன்னேற்றம் உள்ளிட்டவை குறித்து ஆலோசித்தாா். மேலும், கோயம்பேடு சந்தையானது தற்காலிமாக திருமழிசைக்கு மாற்றப்பட்டுள்ளது. இந்த சந்தையில் செய்யப்பட்டுள்ள அடிப்படை கட்டமைப்பு வசதிகள் குறித்தும் அதிகாரிகளிடம் அவா் கேட்டறிந்தாா்.
இந்த ஆலோசனைக் கூட்டத்தில் வீட்டு வசதி மற்றும் நகா்புற வளா்ச்சித் துறையின் முதன்மைச் செயலாளா் ராஜேஷ் லக்கானி, சென்னை பெருநகர வளா்ச்சிக் குழுமத்தின் உறுப்பினா் செயலா் டி.காா்த்திகேயன் உள்ளிட்டோா் கலந்து கொண்டனா்.