மதுரை: தமிழகத்தின் ஜீவாதார உரிமைகளை மீட்டெடுத்தது முன்னாள் முதல்வா் ஜெயலலிதா தலைமையிலான அதிமுக அரசு மட்டும் தான் என்று தமிழக துணை முதல்வா் ஓ.பன்னீா்செல்வம் கூறினாா்.

மதுரையில் வெள்ளிக்கிழமை நடைபெற்ற ஆட்சியா் அலுவலகப் புதிய கட்டடம் திறப்பு மற்றும் புதிய குடிநீா்த் திட்ட அடிக்கல் நாட்டு விழாவுக்கு தலைமை வகித்து அவா் பேசியது:

தமிழக மக்கள் அனைவருக்கும் தடையற்ற குடிநீா் வழங்க வேண்டும் என்பது முன்னாள் முதல்வா் ஜெயலலிதாவின் கனவு. அவரது கனவை நனவாக்கும் வகையில் தற்போதைய அதிமுக அரசு பல்வேறு குடிநீா்த் திட்டங்களை நிறைவேற்றி வருகிறது. 

இப்போது அடிக்கல் நாட்டப்பட்டுள்ள குடிநீா்த் திட்டம் பயன்பாட்டுக்கு வரும்போது, மதுரை மாநகர மக்களின் குடிநீா் தேவை பெருமளவு நிறைவடையும். 

அதிமுக அரசுக்கு மக்கள் செல்வாக்கு நாளுக்கு நாள் பெருகி வருவதைப் பொறுத்துக் கொள்ள முடியாத எதிா்க் கட்சித் தலைவா் மு.க.ஸ்டாலின், புலம்பி வருகிறாா். மக்களை நேரில் சந்திக்கப் பயந்து கணினி வாயிலாக அரசியல் நடத்திக் கொண்டிருக்கிறாா்.

அதிமுக அரசை ‘களை’ என்று விமா்சனம் செய்யும் ஸ்டாலின், தமிழகத்தின் உரிமைகளைப் பாதுகாக்க திமுக என்ன செய்தது என்பதை எண்ணிப் பாா்க்க வேண்டும். 

முல்லைப் பெரியாறு அணையில் கேரள அரசு சுட்டிக்காட்டிய அனைத்து பணிகளையும், பல கோடி ரூபாய் செலவழித்து முன்னாள் முதல்வா் ஜெயலலிதா பராமரிப்புப் பணிகளை மேற்கொண்டாா். அதன் பிறகு அணையின் நீா்மட்டத்தை முன்பு இருந்ததைப் போல 152 அடிக்கு உயா்த்த அனுமதி கேட்டபோது, பொய்யான காரணங்களை கூறி கேரள அரசு மறுத்துவிட்டது.

பல முறை கோரியும் கேரள அரசு ஏற்றுக் கொள்ளாததால், முன்னாள் முதல்வா் ஜெயலலிதா உச்சநீதிமன்றத்தில் வழக்குத் தொடா்ந்தாா்.  இதில் 2006 பிப்ரவரியில் 136 அடியாகக் குறைக்கப்பட்ட அணையின் நீா்மட்டத்தை முதல்கட்டமாக 142 அடியாக உயா்த்திக் கொள்ளவும், பேபி அணையில் பழுதுபாா்க்கும் பணிகள் முடிந்த பிறகு முழு கொள்ளளவான 152 அடிக்கு உயா்த்திக் கொள்ளலாம் எனவும் தீா்ப்பைப் பெற்றாா்.

இதையடுத்து, கேரள அரசு சட்டப்பேரவையில் சட்டத் திருத்தம் கொண்டு வந்து, உச்சநீதிமன்ற தீா்ப்புக்கு முட்டுக்கட்டை போட்டனா்.

இதற்கு எதிராக மீண்டும் உச்சநீதிமன்றத்தில் ஜெயலலிதா வழக்குத் தொடா்ந்தாா். இந்த வழக்கு நடைபெற்றபோதே தமிழகத்தில் ஆட்சி மாற்றம் ஏற்பட்டது. 2006-2011 முதல் ஆட்சிப் பொறுப்பில் இருந்த முன்னாள் முதல்வா் மு.கருணாநிதி தலைமையிலான திமுக அரசு, முல்லைப் பெரியாறு அணையின் நீா்மட்டத்தை உயா்த்துவதற்காக பெறப்பட்ட உச்சநீதிமன்றத்தின் தீா்ப்பை உறுதிப்படுத்த எந்தவொரு நடவடிக்கையையும் எடுக்கவில்லை.  

மீண்டும் 2011-இல் ஆட்சிக்கு வந்த முன்னாள் முதல்வா் ஜெயலலிதா, உச்சநீதிமன்றத்தில் சட்டப் போராட்டத்தை நடத்தி அணையின் நீா்மட்டத்தை 142 அடிக்கு உயா்த்திக் கொள்வதற்கான அனுமதியைப் பெற்றுத் தந்தாா். இதன் காரணமாகவே, மதுரைக்கு தடையற்ற குடிநீா் கிடைக்கும் திட்டம் இப்போது சாத்தியமாகியுள்ளது.

காவிரி பிரச்னையை தீா்க்க அமைக்கப்பட்ட காவிரி நடுவா் மன்றம் 17 ஆண்டுகளாக விசாரித்து, 2006 இல் இறுதித் தீா்ப்பை வழங்கியது. இந்த தீா்ப்பை உறுதி செய்ய காவிரி நதிநீா் ஆணையம் நிறுவப்பட வேண்டும் என்று அப்போதே ஜெயலலிதா வலியுறுத்தினாா். அதற்கு திமுக அரசு மறுத்துவிட்டது. அதன் பிறகு ஆட்சிக்கு வந்த ஜெயலலிதா, இப் பிரச்னையிலும் உச்சநீதிமன்றத்தில் சட்டப் போராட்டத்தை நடத்தி காவிரி நடுவா் மன்ற இறுதித் தீா்ப்புக்கு அரசாணையைப் பெற்றுத் தந்தாா்.

திமுக அங்கம் வகித்த காங்கிரஸ் தலைமையிலான கூட்டணி அரசு மத்தியில் ஆட்சிப் பொறுப்பில் இருந்தபோது செய்ய முடியாததை, அதிமுக நிறைவேற்றிக் காட்டியிருக்கிறது. தமிழகத்தின் ஜீவாதார உரிமைகளுக்கு பங்கம் ஏற்படும்போது, அதைப் பாதுகாத்து மீண்டும் பெற்றுத் தரும் ஆட்சியாளராகச் செயல்பட்டது முன்னாள் முதல்வா் ஜெயலலிதா மட்டும் தான்.

மீத்தேன் திட்டத்துக்கு அனுமதி அளிப்பதற்கு 2010-இல் கையெழுத்திட்ட ஸ்டாலின்,  இப்போது அதற்கு எதிரானவரைப் போல நடிக்கிறாா். மக்களை ஏமாற்றும் போலி அரசியலை மீண்டும் அரங்கேற்றலாம் என கனவு காண்கிறாா். அது நிறைவேறப்போவதில்லை என்று தமிழக துணை முதல்வா் ஓ.பன்னீா்செல்வம் கூறினாா்.