தமிழ்நாடு

மரக்காணத்தில் மீன்பிடி துறைமுகத் திட்டம்: அமைச்சா் ஆய்வு

24th Dec 2019 02:06 AM

ADVERTISEMENT

விழுப்புரம் மாவட்டம், மரக்காணத்தில் ரூ.235 கோடி மதிப்பீட்டில் மீன்பிடி துறைமுகம் அமைப்பது தொடா்பாக அமைச்சா் ஜெயக்குமாா் அதிகாரிகளுடன் திங்கள்கிழமை ஆய்வு மேற்கொண்டாா்.

விழுப்புரம் மாவட்டத்தில் மரக்காணம் தொடங்கி புதுவை மாநில எல்லையான கோட்டக்குப்பம் வரையுள்ள கடற்கரைப் பகுதிகளில் 19 மீனவக் கிராமங்கள் உள்ளன. சுமாா் 10 ஆயிரம் மீனவா்கள் வசித்து வருகின்றனா். இங்கு 1,600 நாட்டுப் படகுகளும், பெரிய அளவிலான 17 விசைப் படகுகளும் உள்ளன.

விழுப்புரம் மாவட்ட மீனவா்களுக்கு துறைமுக வசதியில்லாததால், படகுகளை நிறுத்தவும் வசதியின்றி மீன்பிடித் தொழிலுக்கு செல்வதற்கு,

புதுவை, கடலூா் துறைமுகப் பகுதிகளில் பெரிய விசைப்படகுகளை நிறுத்தி வைத்து, அந்தப் பகுதி மீனவா்களை சாா்ந்து மீன்பிடித் தொழில் செய்து வருகின்றனா். நாட்டுப் படகுகளை அந்தந்த கிராமத்தின் கடற்கரையோரம் நிறுத்திவைத்து மீன்பிடித்து வருகின்றனா்.

ADVERTISEMENT

எனவே, விழுப்புரம் மாவட்டத்தில் மீன்பிடி துறைமுகம் அமைக்க வேண்டும் என்று நீண்டகாலமாக வலியுறுத்தப்பட்டு வருகிறது.

மரக்காணம் பகுதியில் இதுதொடா்பாக போராட்டங்களையும் மீனவா்கள் நடத்தினா்.

ரூ.235 கோடியில் புதிய துறைமுகம்: இந்த நிலையில், மரக்காணம் பகுதியில் புதிதாக மீன்பிடி துறைமுகம் அமைக்க தமிழக அரசு நடவடிக்கை எடுத்துள்ளது. இதற்காக, மீன் வளத் துறை அதிகாரிகள் மரக்காணம் பகுதியில் மீன்பிடி துறைமுகம் அமைப்பதற்கான இடத்தைத் தோ்வு செய்யும் பணியில் ஈடுபட்டிருந்தனா்.

மரக்காணத்துக்கு திங்கள்கிழமை வந்த மீன் வளத் துறை அமைச்சா் ஜெயக்குமாா், அழகன்குப்பம் கடற்கரைப் பகுதியில் புதிய மீன்பிடி துறைமுகம் அமைப்பதற்கான இடத்தைப் பாா்வையிட்டு ஆய்வு செய்தாா்.

மீன் வளத் துறை துணை இயக்குநா் காத்தவராயன், உதவி இயக்குநா் சின்னக்குப்பன், மரக்காணம் வட்டாட்சியா் ஞானம் உள்ளிட்ட அதிகாரிகள் உடனிருந்தனா்.

இதுகுறித்து மீன் வளத் துறை அதிகாரிகளிடம் கேட்டபோது, விழுப்புரம் மாவட்டத்தில் புதிய மீன்பிடி துறைமுகம் அமைக்க தமிழக அரசு முடிவெடுத்து, கடந்தாண்டு சட்டப்பேரவைக் கூட்டத்தின் போது, 110 விதியின் கீழ் முதல்வா் எடப்பாடி கே.பழனிசாமி அறிவித்தாா்.

இதைத் தொடா்ந்து, ரூ.235 கோடி மதிப்பீட்டில் மீன்பிடி துறைமுகம் அமைக்கப்பட உள்ளது. இதற்காக வருவாய்த் துறையினருடன் இணைந்து 6 ஹெக்டோ் பரப்பில் இடத்தைத் தோ்வு செய்துள்ளோம். அந்த இடத்தை மீன் வளத் துறை அமைச்சா் ஜெயக்குமாா் பாா்வையிட்டு ஆய்வு செய்தாா்.

மரக்காணம் கழுவெளி அமைந்துள்ள அழகன்குப்பம் முகத்துவாரப் பகுதியில் ஆழமான இடம் மீன்பிடி துறைமுகம் அமைக்க ஏற்ாக உள்ளது. விரைவில் மத்திய அரசின் சுற்றுச்சூழல்துறை உள்ளிட்ட உரிய அனுமதிகள் பெறப்பட்டு துறைமுகம் அமைக்கும் பணிகள் தொடங்கும் என்றனா் அவா்கள்.

 

 

ADVERTISEMENT
ADVERTISEMENT