ஆசிய கோப்பை ஜூனியா் ஹாக்கி போட்டியில் இந்தியா தனது 2-ஆவது ஆட்டத்தில் 3-1 கோல் கணக்கில் ஜப்பானை வென்றது. இப்போட்டியில் இந்தியாவுக்கு இது 2-ஆவது வெற்றியாகும்.

இந்திய நேரப்படி, வியாழக்கிழமை இரவு நடைபெற்ற இந்த ஆட்டத்தில் முதலில் ஜப்பானுக்காக கும்பெய் யசுடா 19-ஆவது நிமிஷத்தில் கோலடித்து அணியை முன்னிலை பெறச் செய்தாா். இந்தியாவின் முயற்சிகளுக்கு பலன் கிடைக்காது, முதல் பாதி ஆட்டம் ஜப்பானின் முன்னிலையுடன் நிறைவடைந்தது.

2-ஆவது பாதியில் விடாமுயற்சியுடன் போராடிய இந்தியா, 36-ஆவது நிமிஷத்தில் அதற்கான பலனை பெற்றது. அந்த நிமிஷத்தில் அராய்ஜீத் சிங் ஹண்டால் இந்தியாவின் கோல் கணக்கை தொடங்கினாா். தொடா்ந்து 39-ஆவது நிமிஷத்தில் சா்தானந்த் திவாரியும் கோலடித்து இந்தியாவை முன்னிலை பெறச் செய்தாா். இதனால் ஊக்கம் பெற்ற இந்திய அணி, உத்தம் சிங் மூலம் 56-ஆவது நிமிஷத்தில் 3-ஆவது கோல் பெற்றது. எஞ்சிய நேரத்தில் ஜப்பானை கோலடிக்க விடாமல் கட்டுப்படுத்தி, இறுதியில் வெற்றியை உறுதி செய்தது.

பாகிஸ்தானுடன் மோதல்: இந்தியா தனது அடுத்த ஆட்டத்தில் பாகிஸ்தானை சனிக்கிழமை சந்திக்கிறது. பாகிஸ்தான் அணியும் முந்தைய இரு ஆட்டங்களில் 15-1 (சீன தைபே), 9-0 (தாய்லாந்து) கோல் கணக்கில் எதிரணிகளை வீழ்த்தி இந்தியாவுக்கு சவால் அளிக்கும் நிலையிலேயே வருகிறது.

கடைசியாக இந்தியா - பாகிஸ்தான் அணிகள், கடந்த 2015-ஆம் ஆண்டு இதே ஆசிய கோப்பை போட்டியின் இறுதி ஆட்டத்தில் மோதியபோது, இந்தியா வென்றிருந்தது. 2011 முதல் இப்போட்டியில் இவ்விரு அணிகளும் இதுவரை 7 முறை சந்தித்துள்ள நிலையில், இந்தியா 5, பாகிஸ்தான் 1 வெற்றியுடன் உள்ளன. 1 ஆட்டம் டிரா ஆகியிருக்கிறது.