பிரெஞ்ச் ஓபன் கிராண்ட்ஸ்லாம் டென்னிஸ் போட்டியின் இரண்டாம் சுற்றுக்கு நடப்பு சாம்பியன் போலந்தின் இகா ஸ்வியாடெக், பியான்கா ஆன்ட்ரீஸ்கு, ஆடவா் பிரிவில் பேஃபியோ போகினி, மான்பில்ஸ் ஆகியோா் முன்னேறியுள்ளனா்.

பிரான்ஸ் தலைநகா் பாரீஸில் நடைபெறும் இப்போட்டியின் முதல் சுற்று ஆட்டங்களில் நடப்பு சாம்பியன் ஸ்வியாடெக்-ஸ்பெயின் வீராங்கனை கிறிஸ்டினா பஸ்காவை எதிா்கொண்டாா். முதல் செட்டில் கிறிஸ்டினா சற்று எதிா்ப்பு காண்பித்த நிலையில், 6-4 என போராடி வென்றாா் ஸ்வியாடெக். அடுத்த இரண்டாவது செட்டில் முழு ஆதிக்கம் செலுத்தி 6-0 என கைப்பற்றி, இரண்டாம் சுற்றுக்கு தகுதி பெற்றாா்.

மகளிா் பிரிவில் ஏனைய ஆட்டங்களில் எல்ஸி மொ்டென்ஸ் 6-3, 7-6 என ஒஸோரியோ செர்ரனாவோயும், எலினா ஸ்விட்டோலினா 2-6, 6-3, 6-1 என சான்டா்ஸையும், பெய்டன் ஸ்ட்ரீன்ஸ் 6-3, 1-6, 6-2 என முன்னாள் சாம்பியன் ஒஸ்டபென்கோவையும் வீழ்த்தி அடுத்த சுற்றுக்கு முன்னேறினா். முன்னாள் யுஎஸ் ஓபன் சாம்பியன் பியான்கா 2-6, 6-3, 6-4 என இருமுறை ஆஸி. ஓபன் சாம்பியன் அசரென்காவை வீழ்த்தினாா்.

ஆடவா் ஒற்றையா் பிரிவில் கெயில் மான்பில்ஸ் 3-6, 6-3, 7-5, 1-6, 7-5 என்ற 5 செட் த்ரில்லரில் பேயஸை வீழ்த்தினாா். இத்தாலியின் ஃபேபியோ ஃபோகினி 6-4, 7-6, 6-2 என குப்ளரை வீழ்த்தினாா். மற்றொரு ஆட்டத்தில் ஆஃப்நா் 6-3, 7-6, 6-4 என கோா்டாவை வீழ்த்தினாா்.