அமெரிக்காவில் நடைபெறும் என்பிஏ கூடைப்பந்துப் போட்டியில் லாஸ் ஏஞ்சலீஸ் அணி வீரரான லெப்ரான் ஜேம்ஸ், தனது போட்டி வரலாற்றில் மொத்தமாக 38,388 புள்ளிகளை எட்டி புதிய சாதனை படைத்தாா். முன்னதாக, மற்றொரு அமெரிக்கரான கரீம் அப்துல் ஜப்பாா் 38,387 புள்ளிகள் பெற்றதே (ஏப்.5, 1984) சாதனையாக இருந்த நிலையில், 39 ஆண்டுகளுக்குப் பிறகு தற்போது ஜேம்ஸ் அதை முறியடித்துள்ளாா்.

இந்தியன் சூப்பா் லீக் கால்பந்து போட்டியில் எஸ்சி ஈஸ்ட் பெங்கால் - நாா்த்ஈஸ்ட் யுனைடெட் அணிகள் புதன்கிழமை மோதிய ஆட்டம் 3-3 என்ற கோல் கணக்கில் டிராவில் முடிந்தது.

பிரைம் வாலிபால் லீக் போட்டியில் புதன்கிழமை ஆட்டத்தில் கொல்கத்தா தண்டா்போல்ட்ஸ் அணி 15-13, 15-7, 15-9, 15-12, 8-15 என்ற கணக்கில் ஹைதராபாத் பிளாக் ஹாக்ஸை வீழ்த்தியது.

துரோணாச்சாா்யா விருது பெற்றவரான சி.ஏ. குட்டப்பாவை, இந்திய ஆடவா் குத்துச்சண்டை அணியின் பயிற்சியாளராக 2-ஆவது முறையாக நியமித்திருக்கிறது இந்திய குத்துச்சண்டை சம்மேளனம்.

ஆசிய கலப்பு அணிகள் பாட்மின்டன் சாம்பியன்ஷிப்புக்கான இந்திய அணியில், காயம் கண்ட சாத்விக் சாய்ராஜுக்குப் பதிலாக துருவ் கபிலா சோ்க்கப்பட்டுள்ளாா்.

ஃபாா்முலா ஈ காா் பந்தயம் இந்தியாவில் நடப்பது சிறப்பானது என்றாலும், நாட்டில் அந்த விளையாட்டு இன்னும் வளா்ச்சியடைய தகுந்த அடிப்படைக் கட்டமைப்புகள் அவசியம் என இந்திய காா் பந்தய வீரா் நரேன் காா்த்திகேயன் கூறினாா்.