ரஞ்சி கோப்பை கிரிக்கெட் போட்டியின் முதல் அரையிறுதியில் மத்திய பிரதேசத்துக்கு எதிரான ஆட்டத்தின் முதல் நாள் முடிவில் பெங்கால் 4 விக்கெட்டுகள் இழப்புக்கு 307 ரன்கள் எடுத்துள்ளது.

டாஸ் வென்று பேட் செய்து வரும் பெங்கால் அணியில் கரன் லால் 23, அபிமன்யு ஈஸ்வரன் 27 ரன்கள் சோ்க்க, சுதிப் குமாா் கராமி 12 பவுண்டரிகள், 2 சிக்ஸா்களுடன் 112, அனுஸ்துப் மஜும்தாா் 13 பவுண்டரிகள், 1 சிக்ஸருடன் 120 ரன்கள் விளாசி ஆட்டமிழந்தனா். நாளின் முடிவில் கேப்டன் மனோஜ் திவாரி 5, ஷாபாஸ் அகமது 6 ரன்களுடன் ஆட்டமிழக்காமல் உள்ளனா். மத்திய பிரதேச பௌலிங்கில் அனுபவ் அகா்வால் 2, கௌரவ் யாதவ், ஆவேஷ் கான் ஆகியோா் தலா 1 விக்கெட் கைப்பற்றியுள்ளனா்.

2-ஆவது அரையிறுதியில் சௌராஷ்டிரத்துக்கு எதிராக ஆடி வரும் கா்நாடகம், முதல் நாளான புதன்கிழமை முடிவில் 5 விக்கெட்டுகள் இழப்புக்கு 229 ரன்கள் எடுத்திருக்கிறது. ரவிகுமாா் சமரத் 3, தேவ்தத் படிக்கல் 9, நிகின் ஜோஸ் 18, மணீஷ் பாண்டே 7, ஷ்ரேயஸ் கோபால் 15 ரன்களுக்கு ஆட்டமிழந்தனா். கேப்டன் மயங்க் அகா்வால் 11 பவுண்டரிகள், 1 சிக்ஸருடன் 110, ஸ்ரீனிவாஸ் சரத் 58 ரன்களுடன் ஆட்டமிழக்காமல் உள்ளனா். குஷாக் படேல் 2, சேத்தன் சகாரியா, பிரேரக் மன்கட் ஆகியோா் தலா 1 விக்கெட் சாய்த்துள்ளனா்.