செய்திகள்

உலகக் கோப்பை: 8-ம் நாள் புள்ளிவிவரங்கள்

28th Nov 2022 05:17 PM

ADVERTISEMENT

 

உலகக் கோப்பைப் போட்டியின் 8-ம் நாளில் கோஸ்டா ரிக்கா, மொராக்கோ, குரோசியா ஆகிய அணிகள் வெற்றி பெற்றன. மிகவும் எதிர்பார்க்கப்பட்ட ஜெர்மனி - ஸ்பெயின் ஆட்டம் 1-1 என டிராவில் முடிவடைந்தது.

கோஸ்டா ரிக்கா, ஜப்பானை 1-0 எனவும் மொராக்கோ, பெல்ஜியத்தை 2-0 எனவும் குரோசியா கனடாவை 4-1 எனவும் வீழ்த்தின. 

8-ம் நாள் ஆட்டங்களைக் கொண்டு தொகுக்கப்பட்ட புள்ளிவிவரங்கள்:

ADVERTISEMENT

* 1970 முதல் இந்தப் போட்டி வரை உலகக் கோப்பைக்கு 6 முறை தகுதி பெற்றுள்ளது மொராக்கோ அணி. 1986-ல் காலிறுதிக்கு முந்தைய சுற்றுக்குத் தகுதி பெற்றது. நேற்றைய ஆட்டத்தில் பெல்ஜியத்தை 2-0 என வீழ்த்தியது மொராக்கோ. உலகக் கோப்பையில் அந்த அணி பெறும் 3-வது வெற்றி இது. முதல் வெற்றியை 1986-ல், 2-வது வெற்றியை 1998-ல் அடைந்தது. ஆப்பிரிக்க நாடுகளில் ஒன்றான மொராக்கோ, மூன்று முறையும் ஐரோப்பிய அணிகளுக்கு எதிராக வென்றுள்ளது. 

* உலகின் நெ.2 அணியான பெல்ஜியம், 14 முறை உலகக் கோப்பைக்குத் தகுதி பெற்றுள்ளது. 2018 உலகக் கோப்பையில் அரையிறுதிக்கு முன்னேறி 3-ம் இடம் பிடித்தது. இப்பேர்ப்பட்ட அணி இந்த உலகக் கோப்பையில் விளையாடிய இரு ஆட்டங்களில் கனடாவை 1-0 என வீழ்த்தி அடுத்த ஆட்டத்தில் மொராக்கோவிடம் 0-2 எனத் தோற்றுள்ளது. அதாவது முதல் இரு ஆட்டங்களில் ஒரே ஒரு கோல் மட்டுமே அடித்துள்ளது. ஆனால் கடந்த உலகக் கோப்பையில் முதல் இரு ஆட்டங்களில் மட்டும் 8 கோல்களை அடித்தது. 

* இந்த ஆட்டத்துக்கு முன்பு உலகக் கோப்பையில் பெல்ஜியம் கடைசியாக விளையாடிய 8 குரூப் ஆட்டங்களிலும் வெற்றி பெற்றிருந்தது. கடைசியாக 1994-ல் 0-1 என சவூதி அரேபியாவிடம் தான் குரூப் ஆட்டத்தில் தோற்றது. பிறகு விளையாடிய குரூப் ஆட்டங்களில் 8 வெற்றி, 5 டிராக்களுக்குப் பிறகு முதல்முறையாகத் தோல்வியை எதிர்கொண்டுள்ளது. 

* உலகக் கோப்பையில் முதல்முறையாக ஆப்பிரிக்க நாட்டிடம் தோற்றுள்ளது பெல்ஜியம். 

* உலகக் கோப்பையில் நேற்று வரை அடிக்கப்பட்ட 67 கோல்களில் 58% கோல்கள் அதாவது 39 கோல்கள் ஆட்டத்தின் கடைசி 30 நிமிடங்களில் அடிக்கப்பட்டவை.

* குரோசியாவிடம் 1-4 எனத் தோற்ற கனடா, போட்டியிலிருந்து வெளியேறியுள்ளது. 1986-க்குப் பிறகு 2-வது முறையாக உலகக் கோப்பையில் விளையாடும் கனடா, முதல்முறையாக உலகக் கோப்பைப் போட்டியில் ஒரு கோலை அடித்துள்ளது. அதுவும் ஆட்டம் தொடங்கிய 2-வது நிமிடத்திலேயே கோலடித்தார் கனடாவின் அல்போன்சோ டேவிஸ். 

* இந்த உலகக் கோப்பையில் விரைவாக கோலடித்த வீரர் என்கிற பெருமையைப் பெற்றுள்ளார் கனடாவின் டேவிஸ். உலகக் கோப்பையில் குரூப் ஆட்டங்களில் விரைவாக அடித்த கோல்களில் இதற்கு 2-வது இடம். 2014-ல் கானாவுக்கு எதிராக அமெரிக்காவின் கிளிண்ட் டிம்ப்சி ஆட்டம் தொடங்கிய 29-வது நொடியில் கோலடித்து சாதனை படைத்தார்.

* உலகக் கோப்பையில் இதுவரை விளையாடிய 5 ஆட்டங்களிலும் கனடா தோல்வியடைந்துள்ளது. மெக்சிகோ (முதல் 9 ஆட்டங்களில் தோல்வி), எல் சால்வடோர் (அனைத்து 6 ஆட்டங்களிலும் தோல்வி) ஆகிய அணிகளுக்கு அடுத்த நிலையில் கனடா உள்ளது. 

* ஃபிஃபா உலகக் கோப்பையில் கோலடித்த 76-வது நாடு - கனடா. இதற்கு முன்பு கோலடித்த 75-வது நாடானது கத்தார். 2026 உலகக் கோப்பையில் போட்டியை நடத்தும் நாடுகளில் ஒன்றாக கனடா பங்கேற்கவுள்ளது. 

* ஜெர்மனி தனது முதல் ஆட்டத்தில் ஜப்பானிடம் தோற்றது. ஸ்பெயினுக்கு எதிராக 1-1 என டிரா செய்துள்ளது. நான்கு முறை சாம்பியன் பட்டம் வென்றுள்ள ஜெர்மனி அணி, 1938-க்குப் பிறகு முதல்முறையாக முதல் இரு குரூப் ஆட்டங்களிலும் ஒரு வெற்றியையும் அடையாமல் உள்ளது. நேற்றைய ஆட்டத்தில் மட்டும் ஜப்பான் வென்றிருந்தால் ஜெர்மனிக்கு நெருக்கடி ஏற்பட்டிருக்கும். ஸ்பெயினை வீழ்த்தாவிடால் கத்தார், கனடா அணிகளுக்கு அடுத்ததாக ஜெர்மனி 2 ஆட்டங்களிலேயே போட்டியிலிருந்து வெளியேறியிருக்கும். ஜப்பான் தோற்றதால் ஸ்பெயினுக்கு எதிரான ஆட்டம் டிரா ஆன பிறகும் ஜெர்மனிக்கு அடுத்தச் சுற்றுக்குத் தகுதி பெற இன்னும் வாய்ப்புள்ளது. 

* உலகக் கோப்பையில் இதுவரை முதல் இரு ஆட்டங்களிலும் ஜெர்மனி தோற்றதேயில்லை. அந்த நிலை இந்தமுறையும் தொடர்ந்துள்ளது. 

* ஜெர்மனியை 2-1 என வென்றது ஜப்பான். ஆனால் கோஸ்டா ரிக்கா, ஸ்பெயினுக்கு எதிராக 0-7 எனத் தோற்றது. எனவே அடுத்த ஆட்டத்தில் வெற்றி பெற்றிருந்தால் காலிறுதிக்கு முந்தைய சுற்றுக்குத் தகுதி பெற்றிருக்கும் ஜப்பான். ஆனால் கோஸ்டா ரிக்கா 1-0 என ஜப்பானை வீழ்த்தியுள்ளது. 1998 முதல், உலகக் கோப்பைக்கு 7 முறை தகுதி பெற்றுள்ளது ஜப்பான். காலிறுதிக்கு முந்தைய சுற்றுக்கு மூன்று முறை தகுதி பெற்றது. இந்தமுறையும் அதற்கான நல்ல வாய்ப்பு கிடைத்தும் உடனடியாகப் பயன்படுத்திக்கொள்ளவில்லை. கடைசி ஆட்டத்தில் இன்னொருமுறை வெல்ல வேண்டிய நிலைமையில் உள்ளது.

ADVERTISEMENT
ADVERTISEMENT