முயற்சி செய்வதற்கு எதுவும் தடையில்லை.
இந்த வாக்கியத்தை நிரூபித்துள்ளார் பிரான்ஸ் நாட்டைச் சேர்ந்த அலிஸ் கார்னட்.
இதுவரை 62 கிராண்ட் ஸ்லாம் போட்டிகளில் போட்டியிட்டும் ஒருமுறை கூட காலிறுதிக்கு அவர் தகுதி பெற்றதில்லை. இருந்தும் தனது 63-வது முயற்சியில் பெருங்கனவை எட்டியுள்ளார் 32 வயது அலிஸ் கார்னட். ஆஸ்திரேலிய ஓபன் போட்டியின் காலிறுதிக்கு முன்னேறி சாதனை படைத்துள்ளார்.
இன்று நடைபெற்ற 4-வது சுற்றில் இருமுறை கிராண்ட் ஸ்லாம் பட்டங்களை வென்ற சைமோனா ஹேலப்பை 6-4, 3-6, 6-4 என வீழ்த்தி முதல்முறையாக கிராண்ட் ஸ்லாம் போட்டி ஒன்றின் காலிறுதிக்குத் தகுதி பெற்றுள்ளார் அலிஸ் கார்னட். காலிறுதிச் சுற்றில் தரவரிசையில் 27-வது இடத்தில் உள்ள டேனியல் காலின்ஸை எதிர்கொள்கிறார். 2-வது சுற்றில் நெ.3 வீராங்கனையான முகுருஸாவைத் தோற்கடித்தி அதிர்ச்சி ஏற்படுத்தினார் அலிஸ் கார்னட். அடுத்ததாக ஹேலப்பை வீழ்த்தி மேலும் முன்னேறியுள்ளார்.
2005-ம் ஆண்டு பிரெஞ்சு ஓபன் போட்டியில் முதல்முறையாக கிராண்ட் ஸ்லாம் போட்டிக்கு அறிமுகமானார் அலிஸ் கார்னட். 63-வது தடவையாக மீண்டும் முயற்சி செய்தது தாமதமானதல்ல என்று பேட்டியளித்துள்ளார். இன்றைய ஆட்டத்தில் வெற்றி பெற்ற பிறகு, மிகவும் உணர்ச்சிவசப்பட்டு அரங்கிலேயே அழுதார். இதற்கு முன்பு தாய்லாந்தின் டமரைன் தனது 45-வது முயற்சியில் கிராண்ட் ஸ்லாம் காலிறுதிக்குத் தகுதி பெற்றார். அந்தச் சாதனையை அலிஸ் கார்னட் முறியடித்துள்ளார்.