நியூசிலாந்துடனான முதல் டெஸ்ட் ஆட்டத்தின் மூன்றாம் நாளில் இந்திய சுழற் பந்துவீச்சாளர் ரவிச்சந்திரன் அஸ்வின் நடுவர் நிதின் மேனனுடன் வாக்குவாதத்தில் ஈடுபட்டது சமூக ஊடகங்களில் கவனத்தை ஈர்த்து வருகிறது.

பந்துவீசியவுடன் நடுவரின் பார்வையைப் பாதிக்கும் வகையில் அஸ்வினின் நகர்வு இருப்பது தொடர்பாக வாக்குவாதம் நடைபெற்றதாகத் தெரிகிறது.

இந்தியா, நியூசிலாந்து அணிகளுக்கிடையிலான முதல் டெஸ்டின் 3-ம் நாள் ஆட்டம் நடைபெற்று வருகிறது. இதில் 77-வது ஓவரின் 4-வது பந்தை வீசி முடித்த அஸ்வின், பந்து கையிலிருந்து வெளியேறியதும் மறுதிசையை நோக்கி நகர்ந்தார்.

இதையும் படிக்க | சாஹாவுக்கு பதில் விக்கெட் கீப்பிங் செய்யும் பரத்; காரணம் இதுதான்

இதையடுத்து, அபாயகரமான பகுதிக்கு அஸ்வின் செல்வதால் தன்னால் பந்தைப் பின்பற்ற முடியவில்லை என நடுவர் நிதின் மேனன், அஸ்வினிடம் கூறியதாகத் தெரிகிறது.

இதன்பிறகு, களநடுவர்கள் நிதின் மேனன் மற்றும் விரேந்தர சர்மா ஆகியோர் கேப்டன் அஜின்க்யா ரஹானேவை அழைத்துப் பேசினர். இதில் அஸ்வினும் கலந்துகொண்டார். பின்னர், தலைமைப் பயிற்சியாளர் ராகுல் டிராவிட் போட்டி நடுவர் ஜவகல் ஸ்ரீநாத்துடன் பேசும் காட்சிகள் ஒளிபரப்பப்பட்டன.

வர்ணனையாளர்கள் பின்னர் கூறுகையில், "இது நடுவரின் பார்வையைத் தடுப்பதைவிட பேட்ஸ்மேன்கள் 1 ரன் எடுப்பதைத் தடுப்பதாகும்" எனக் கூறினர்.

இதனால், ஆட்டத்தின் நடுவே லேசான சலசலப்பு ஏற்பட்டது.