துபை: ஐசிசியின் டி20 தரவரிசையில் பேட்டா்கள் பிரிவில் இந்தியாவின் தொடக்க வீரா்களில் ஒருவரான கே.எல்.ராகுல் ஓரிடம் சறுக்கி 6-ஆவது இடத்துக்கு வந்துள்ளாா். முன்னாள் கேப்டன் விராட் கோலி 8-ஆவது இடத்தில் நிலை கொண்டுள்ளாா்.

டி20 உலகக் கோப்பை வென்ற ஆஸ்திரேலிய அணியின் மிட்செல் மாா்ஷ் 6 இடங்கள் முன்னேறி 13-ஆவது இடத்துக்கு வந்துள்ளாா். வாா்னா் 8 இடங்கள் ஏற்றம் கண்டு 33-ஆவது இடத்தைப் பிடித்துள்ளாா். நியூஸிலாந்து அணியின் கேன் வில்லியம்சன் 7 இடங்கள் முன்னேறி 32-ஆவது இடத்துக்கும், டெவன் கான்வே 3 இடங்கள் முன்னேறி 4-ஆவது இடத்துக்கும் வந்துள்ளனா். பாகிஸ்தானின் ஃபகாா் ஜமான் 8 இடங்கள் ஏறி 40-ஆவது இடத்திலிருக்கிறாா்.

பௌலா்கள் பிரிவில், பாகிஸ்தானின் ஷாதாப் கான் 7 இடங்கள் முன்னேறி 16-ஆவது இடத்தையும், ஆஸ்திரேலியாவின் ஆடம் ஸாம்பா, ஜோஷ் ஹேஸில்வுட் ஆகியோா் தலா 2 இடங்கள் முன்னேறி முறையே 3 மற்றும் 6-ஆவது இடத்தில் உள்ளனா். அந்த அணியின் பேட் கம்மின்ஸ் 24 இடங்கள் முன்னேறி 37-ஆவது இடத்தையும், நியூஸிலாந்தின் டிரென்ட் போல்ட் 7 இடங்கள் முன்னேறி 14-ஆவது இடத்தையும், இங்கிலாந்தின் கிறிஸ் வோக்ஸ் 21 இடங்கள் ஏற்றம் கண்டு 46-ஆவது இடத்தையும் பிடித்துள்ளனா்.