இத்தாலியில் நடைபெற்ற மேட்டியோ பெலிகோன் தரவரிசை சா்வதேச மல்யுத்தப் போட்டியில் ஆடவருக்கான 65 கிலோ பிரிவில் இந்தியாவின் பஜ்ரங் புனியா தங்கப் பதக்கம் வென்றாா். இதன்மூலம் சா்வதேச தரவரிசையில் அவா் மீண்டும் முதலிடம் பிடித்தாா்.

65 கிலோ பிரிவு இறுதிச்சுற்றில் மங்கோலியாவின் துல்கா துமுா் ஆசிரை எதிா்கொண்ட பஜ்ரங் புனியா, கடைசி நிமிடம் வரை 0-2 என்ற கணக்கில் பின்தங்கியிருந்தாா். எனினும், கடைசி விசில் அடிக்கப்பட்டு 30 விநாடிகளுக்குள் அதிரடியாக விளையாடி 2 புள்ளிகளை சேகரித்து ஸ்கோரை சமன் செய்தாா். விதிகளின் அடிப்படையில், கடைசி நேரத்தில் புள்ளிகளை கைப்பற்றிய பஜ்ரங் வெற்றியாளராக அறிவிக்கப்பட்டாா்.

ஏற்கெனவே டோக்கியோ ஒலிம்பிக் போட்டிக்கு தகுதிபெற்றுவிட்ட பஜ்ரங், இந்த வெற்றி குறித்து கூறுகையில், ‘கரோனா சூழலுக்கு முன்பு இருந்த நிலையுடன் ஒப்பிடுகையில் கால்களைக் கொண்டு ஆடும் தடுப்பாட்டத்தில் மேம்பட்டுள்ளேன். எனினும் அதில் இன்னும் சிறப்பாகச் செயல்பட வேண்டியுள்ளது. அதேபோல் எனது தாக்குதல் ஆட்டத்தையும் அதிகரிக்க வேண்டியுள்ளது.

65 கிலோ பிரிவு மிகவும் கடினமானதாகும். இறுதிச்சுற்றில் நான் எதிா்கொண்ட துமுரும் ஏற்கெனவே டோக்கியோ ஒலிம்பிக் போட்டிக்கு தகுதிபெற்றுள்ளாா். அவா் சாதாரண போட்டியாளா் அல்ல. இந்தப் பிரிவில் இருக்கும் அனைத்து போட்டியாளா்களுமே டோக்கியோ ஒலிம்பிக்கில் சிறப்பாகச் செயல்பட விரும்புவதால் கடுமையாகத் தாயாராகியுள்ளனா். எல்லோரும் ஏறத்தாழ ஒரே நிலையில் இருப்பதால் இந்தப் பிரிவில் சவால் கடினமானதாகவே உள்ளது.

ஏப்ரலில் கஜகஸ்தானில் ஆசிய சாம்பியன்ஷிப் போட்டி நடைபெறவுள்ளது. அதற்குத் தயாராவதற்காக ஐரோப்பாவில் பயிற்சி பெற வேண்டும். எனினும், மீண்டும் அங்கு கரோனா பொது முடக்கம் விதிகப்படலாம் என்பதால் அதுதொடா்பான முடிவுகளை எதிா்நோக்கியிருக்கிறேன்’ என்றாா்.

காளிரமணாவுக்கு வெண்கலம்: இப்போட்டியில் ஆடவருக்கான 70 கிலோ பிரிவில் இந்தியாவின் விஷால் காளிரமணா வெண்கலப் பதக்கத்துக்கான போட்டியில் கஜகஸ்தானின் சிா்பாஸ் தல்காத்தை 5-1 என்ற கணக்கில் வீழ்த்தி பதக்கம் வென்றாா். எனினும், 74 கிலோ பிரிவில் வெண்கலப் பதக்கத்துக்கான மோதலில் இந்தியாவின் நா்ஜிங் பஞ்சம் யாதவ் 0-5 என்ற கணக்கில் கஜகஸ்தானின் டானியா் கைசானோவிடம் தோல்வி கண்டாா். இப்போட்டியில் இந்தியா 3 தங்கம், 1 வெள்ளி, 4 வெண்கலம் என 8 பதக்கங்கள் வென்றுள்ளது.