இங்கிலாந்தில் விளையாடும்போது ரன் குவிக்கும் நோக்கத்திலிருந்து பின்வாங்கிவிடக் கூடாது என இந்தியாவின் இளம் தொடக்க ஆட்டக்காரர் ஷுப்மன் கில் தெரிவித்துள்ளார்.

உலக டெஸ்ட் சாம்பியன்ஷிப் இறுதி ஆட்டத்துக்கான 15 பேர் கொண்ட இந்திய அணியில் ஷுப்மன் கில் இடம்பெற்றுள்ளார். அவர் தனது ஐபிஎல் அணியான கொல்கத்தா நைட் ரைடர்ஸின் இணையதளத்துக்குப் பேட்டியளித்துள்ளார்.

அதில் அவர் தெரிவித்தது:

"உலக டெஸ்ட் சாம்பியன்ஷிப் இறுதி ஆட்டம்தான் என் வாழ்நாளில் இதுவரை மிகப் பெரிய ஆட்டம். இங்கிலாந்தில் விளையாடும்போது ரன் குவிக்கும் நோக்கத்திலிருந்து பின்வாங்கிவிடக் கூடாது. ரன் குவிக்க எண்ணினால் பந்துவீச்சாளர்கள் பின்னடைவைச் சந்திப்பார்கள். அவர்கள் மீது அழுத்தம் தரலாம்.

தடுத்து ஆட மட்டும் முயற்சித்தால், பந்துவீச்சாளர்களிடமிருந்து நிறைய நல்ல பந்துகளை எதிர்கொள்ள நேரிடும்."

இந்தியா, நியூசிலாந்து அணிகளுக்கிடையிலான உலக டெஸ்ட் சாம்பியன்ஷிப் இறுதி ஆட்டம் நாளை (வெள்ளிக்கிழமை) தொடங்குகிறது. இதில் தொடக்க ஆட்டக்காரராக ரோஹித் சர்மாவுடன் ஷுப்மன் கில் களமிறங்குவது கிட்டத்தட்ட உறுதியாகிவிட்டது.