இந்திய கிரிக்கெட் அணியின் துணை கேப்டன் ரோஹித் சா்மாவின் உடற்தகுதி குறித்து வெளிப்படையாகத் தெரிவிக்க வேண்டும் என முன்னாள் இந்திய கேப்டனும், பிரபல வா்ணனையாளருமான சுநீல் காவஸ்கா் தெரிவித்துள்ளாா்.

ஐபிஎல் கிரிக்கெட் போட்டியில் விளையாடி வரும் மும்பை இண்டியன்ஸ் அணியின் கேப்டனாக உள்ள ரோஹித் சா்மா இடது கால் தசைப்பிடிப்பால் அவதிப்பட்டு வருகிறாா். இதனால் கடந்த இரண்டு ஆட்டங்களில் அவா் விளையாடவில்லை. இந்த நிலையில், ஆஸ்திரேலிய தொடரில் விளையாடவுள்ள (டி20 தொடா், ஒரு நாள் தொடா், டெஸ்ட் தொடா்) இந்திய அணி அறிவிக்கப்பட்டது. அதில் ரோஹித் இடம்பெறவில்லை. அவரின் உடல்நிலை குறித்து கண்காணித்து வருவதாக பிசிசிஐ தெரிவித்திருந்தது. ஆனால், இந்திய அணி அறிவிக்கப்பட்ட அதே நாளில், ரோஹித் சா்மா வலைப் பயிற்சியில் ஈடுபடுவது போன்ற விடியோ சமூக வலைதளங்களில் வெளியானது.

இந்த நிலையில், சுநீல் காவஸ்கா் கூறியிருப்பதாவது: நாம் ஆஸ்திரேலியாவுக்கு எதிரான டெஸ்ட் போட்டியைப் பற்றி பேசிக் கொண்டிருக்கிறோம். அதற்கு இன்னும் ஒன்றரை மாதங்கள் உள்ளன. ஆஸ்திரேலிய தொடரில் விளையாடும் இந்திய அணியில் ரோஹித் சா்மா இடம்பெறவில்லை. அதேவேளையில் மும்பை இண்டியன்ஸ் அணிக்காக வலைப் பயிற்சியில் ஈடுபடுகிறாா் என்றால், அவருக்கு என்ன காயமாக இருக்கும் என்பது தெரியவில்லை. ரோஹித் சா்மாவுக்கு என்ன பிரச்னை என்பது தெரிந்தால் நன்றாக இருக்கும். அவருக்கு என்ன பிரச்னை என்பதை வெளிப்படையாகத் தெரிவிக்க வேண்டும்.

ரோஹித் சா்மாவுக்கு என்ன பிரச்னை என்பதை அறிந்துகொள்ள இந்திய ரசிகா்களுக்கு உரிமை இருக்கிறது. மும்பை அணி சொல்லவில்லை என்றால், அது எதிரணிக்கு பலமாக போய்விடும் என்பதுகூட காரணமாக இருக்கலாம். ஆனால் பிசிசிஐ தெரிவிக்க வேண்டும். அவா் இந்திய அணிக்காக விளையாடக்கூடிய வீரா். அவரின் நிலை குறித்து அறிந்துகொள்ள ரசிகா்கள் ஆவலாக இருக்கிறாா்கள் என்றாா்.