கர்நாடக ப்ரீமியர் லீக் போட்டியில் பெல்லாரி டஸ்கர்ஸ் அணி வீரர் கிருஷ்ணப்ப கெளதம் புதிய டி20 சாதனை படைத்தார். 56 பந்துகளில் 134 ரன்களை விளாசிய அவர், பந்துவீச்சில் 8/15 விக்கெட்டுகளையும் வீழ்த்தினார்.
பெங்களூருவில் சனிக்கிழமை பெல்லாரி டஸ்கர்ஸ்-ஷிவமொக்கா லயன்ஸ் இடையிலான கேபிஎல் டி20 ஆட்டம் நடைபெற்றது.
முதலில் ஆடிய பெல்லாரி அணி 17 ஓவர்களில் 3 விக்கெட் இழப்புக்கு 203 ரன்களை எடுத்தது. பின்னர் ஆடிய ஷிவமொக்கா அணி 16.3 ஓவர்களில் 133 ரன்களுக்கு ஆல் அவுட்டாகி 70 ரன்கள் வித்தியாசத்தில் தோல்வியைத் தழுவியது.
கிருஷ்ணப்ப கெளதம் புதிய சாதனை: பெல்லாரி ஆல்ரவுண்டரான கெளதம் 56 பந்துகளில் 134 ரன்களை விளாசினார். 39 பந்துகளில் அவர் சதம் அடித்த சாதனையும் தன் வசம் வைத்துள்ளார். 134 ரன்களே கேபிஎல் போட்டியில் அதிகபட்ச ஸ்கோராகும். பின்னர் பந்துவீசிய கெளதம் 4 ஓவர்களில் 15 ரன்களை மட்டுமே விட்டு தந்து 8 விக்கெட்டுகளை சாய்த்தார்.
மாநில லீக் போட்டிகளுக்கு அதிகாரபூர்வ அந்தஸ்து தரப்படவில்லை என்பது குறிப்பிடத்தக்கது.
எனது ஆட்டம் ஒரு கனவு போன்று அமைந்தது. இதை நான் எதிர்பார்க்கவில்லை என கெளதம் தெரிவித்தார்.