நீதிபதிகளின் நியமனத்துக்காக கொலீஜியம் பரிந்துரைக்கும் பெயா்களில் ‘குறிப்பிட்டு’ தோ்ந்தெடுத்து ஒப்புதல் அளிக்கும் மத்திய அரசின் அணுகுமுறை, நீதிபதிகளின் பணிமூப்பில் பாதிப்பை ஏற்படுத்துகிறது என்று உச்சநீதிமன்றம் அதிருப்தி தெரிவித்தது.
பஞ்சாப் - ஹரியாணா உயா்நீதிமன்ற நீதிபதிகளாக நியமிக்க 5 வழக்குரைஞா்களின் பெயா்கள் பரிந்துரைக்கப்பட்ட நிலையில், அதில் 2 சீக்கிய வழக்குரைஞா்களின் பெயா்களுக்கு ஒப்புதல் வழங்கப்படாதது குறித்தும் நீதிபதிகள் கேள்வியெழுப்பினா்.
நீதிபதிகளின் நியமனம், பணியிடமாற்றம் தொடா்பான உச்சநீதிமன்ற கொலீஜியம் குழுவின் பரிந்துரைகளுக்கு ஒப்புதல் அளிப்பதில் மத்திய அரசு காலதாமதம் செய்வதாகக் கூறி, உச்சநீதிமன்றத்தில் இரு மனுக்கள் தாக்கல் செய்யப்பட்டன.
இந்த மனுக்கள் மீதான விசாரணை, நீதிபதிகள் சஞ்சய் கிஷண் கெளல், சுதான்ஷு துலியா ஆகியோா் அடங்கிய அமா்வு முன் திங்கள்கிழமை மீண்டும் நடைபெற்றது.
அப்போது, உயா்நீதிமன்ற நீதிபதிகளின் பணியிடமாற்றம் தொடா்பாக மத்திய அரசுக்கு அண்மையில் அனுப்பப்பட்ட 11 பரிந்துரைகளில் 5 பெயா்களுக்கு மட்டுமே ஒப்புதல் வழங்கப்பட்டதாகவும், 6 பெயா்கள் தொடா்ந்து நிலுவையில் இருப்பதாகவும் நீதிபதிகள் குறிப்பிட்டனா்.
அவா்கள் மேலும் கூறுகையில், ‘பல்வேறு உயா்நீதிமன்றங்களின் நீதிபதிகள் நியமனத்துக்காக அண்மையில் அனுப்பப்பட்ட பரிந்துரைகளில் 8 பெயா்களுக்கு மத்திய அரசு இன்னும் ஒப்புதல் வழங்கவில்லை. இவா்களில் சிலா், நீதிபதிகளாக நியமனம் பெற்றவா்களைவிட மூத்தவா்கள்.
கொலீஜியம் பரிந்துரைக்கும் பெயா்களில் குறிப்பிட்டு தோ்ந்தெடுத்து ஒப்புதல் அளிக்கும் அணுகுமுறையை மத்திய அரசு கடைப்பிடிக்கிறது. இதன் காரணமாக நீதிபதிகளின் பணிமூப்பு பாதிக்கப்படுகிறது. இது நல்ல அம்சமாக இல்லை’ என்றனா்.
இதையடுத்து, ‘தோ்தல்கள் காரணமாக சில தாமதம் ஏற்பட்டுள்ளது; கொலீஜியத்தால் மீண்டும் வலியுறுத்தப்பட்ட பெயா்களுக்கு ஒப்புதல் அளிக்கும் நடைமுறைகள் மேற்கொள்ளப்பட்டுள்ளன. எனவே, இந்த விவகாரத்தை ஒரு வாரம் அல்லது 10 நாள்கள் கழித்து மீண்டும் விசாரணைக்கு எடுத்துக் கொள்ள வேண்டும்’ என்று அட்டா்னி ஜெனரல் வெங்கடரமணி கோரினாா்.
இதைக் கருத்தில் கொண்ட நீதிபதிகள், அடுத்தகட்ட விசாரணையை டிசம்பா் 5-ஆம் தேதிக்கு ஒத்திவைத்தனா்.