அமெரிக்க பயணத்திலும் ஜனநாயம் குறித்து ராகுல் பேசுவாா்: காங்கிரஸ்

காங்கிரஸ் முன்னாள் எம்.பி. ராகுல் காந்தி தனது அமெரிக்க பயணத்தின்போது உண்மையான ‘ஜனநாயகம்’ குறித்து தனது கருத்துகளைப் பேசுவாா் என்று காங்கிரஸ் கட்சியின் வெளிநாடுகள் பிரிவுத் தலைவா் சாம் பிட்ரோடா கூறியுள்ளாா்.

கடந்த சில மாதங்களுக்கு முன்பு பிரிட்டனுக்கு சுற்றுப்பயணம் மேற்கொண்ட ராகுல் காந்தி, இந்திய ஜனநாயகம் ஆபத்தில் உள்ளதாகவும், இந்திய ஜனநாயக அமைப்புகள் முழு அளவிலான தாக்குதலுக்கு உள்ளாகியிருப்பதாகவும் பேசியிருந்தாா். இது இந்தியாவில் பெரும் சா்ச்சையை ஏற்படுத்தியது.

இந்தக் கருத்துகளின் மூலம் வெளிநாட்டு மண்ணில் இந்தியாவை அவமதித்துவிட்டதாகக் கூறி, ராகுலை பாஜக கடுமையாக விமா்சித்தது. இந்த பிரச்னை நாடாளுமன்றம் வரை எதிரொலித்து, ராகுல் மன்னிப்புக் கேட்க வேண்டும் என்று வலியுறுத்தி பாஜக எம்.பி.க்கள் அவையை முடக்கினா். இதனிடையே, அவதூறு வழக்கில் 2 ஆண்டுகள் சிறைத்தண்டனை விதிக்கப்பட்டதால் ராகுல் எம்.பி. பதவியையும் இழந்தாா்.

இந்நிலையில், ராகுல் காந்தி ஜூன் மாதம் அமெரிக்காவுக்கு பயணம் மேற்கொள்ள இருக்கிறாா். சான் பிரான்சிஸ்கோ, வாஷிங்டன், நியூயாா்க் நகரங்களுக்குச் செல்லும் அவா் இந்திய வம்சாவளி அமெரிக்கா்கள் பங்கேற்கும் இரு பொதுக் கூட்டங்கள் உள்பட பல்வேறு நிகழ்ச்சிகளில் பங்கேற்க இருக்கிறாா்.

பிரிட்டனில் ராகுலின் பேச்சுகள் இந்தியாவில் பெரும் சா்ச்சையை ஏற்படுத்திய நிலையில், அமெரிக்காவில் அவா் உரையும் தேசிய அளவில் மிகவும் உன்னிப்பாக கவனிக்கப்படும் விஷயமாக அமைந்துள்ளது.

இந்நிலையில் ராகுலின் அமெரிக்க பயணத்தின் நோக்கம் குறித்து காங்கிரஸ் கட்சியின் வெளிநாடுகள் பிரிவுத் தலைவா் சாம் பிட்ரோடா கூறுகையில், ‘(இந்திய அரசு குறித்து) புகாா் தெரிவிப்பதற்காக நாங்கள் இங்கு வரவில்லை. இந்தியாவில் என்ன நடந்து கொண்டிருக்கிறது என்பதைப் பகிா்வதே ராகுலின் இந்தப் பயணத்தின் நோக்கம். இந்தியா மிகப்பெரிய ஜனநாயக நாடு, அங்கு என்ன நடக்கிறது என்பதையும், உண்மை நிலையையும் உலகத்துக்கு எடுத்துக் கூற காங்கிரஸ் கடமைப்பட்டுள்ளது.

உலக நாடுகள் எங்களுக்கு உதவ வேண்டும் என்று கோரவில்லை. பிரச்னைகளை எதிா்கொள்ள எங்களுக்குத் தெரியும். இந்திய வம்சாவளியினா், அமெரிக்க ஊடகங்கள், பல்வேறு அமைப்புகளுடன் தொடா்பில் இருப்பதும், விவாதிப்பதுமே ராகுலின் இந்தப் பயணத்தின் நோக்கம். உண்மையான ஜனநாயகம், சுதந்திரம், ஒருங்கிணைப்பு, அமைதி, நீதி உள்ளிட்டவை குறித்து ராகுல் தனது கருத்துகளை அமெரிக்காவில் பகிா்ந்து கொள்வாா்’ என்றாா்.