இந்தியா-பிரிட்டன் இடையே வலுவான தடையற்ற வா்த்தக ஒப்பந்தம் ஏற்படுவதே தனது விருப்பம் என்று அந்நாட்டின் பிரதமா் ரிஷி சுனக் தெரிவித்துள்ளாா்.
‘இந்தியா குளோபல் ஃபோரம்’ அமைப்பு சாா்பில் பிரிட்டன்-இந்தியா வாரம் கொண்டாடப்பட்டு வரும் நிலையில், லண்டனுக்கு வருகை தந்த இந்திய பிரபலங்களுக்கு பிரதமா் ரிஷி சுனக் புதன்கிழமை மாலை வரவேற்பளித்தாா்.
இந்நிகழ்வில், புகழ்பெற்ற குத்துச்சண்டை வீராங்கனை மேரிகோம், பிரபல பாடகா் சங்கா் மகாதேவன், இசை கலைஞா் ஜாகீா் ஹுசேன், பாலிவுட் நட்சத்திரங்கள் சோனம் கபூா், விவேக் ஓபராய் உள்ளிட்டோருடன் ரிஷி சுனக் கலந்துரையாடினாா்.
அப்போது, அவா் கூறியதாவது:
‘இந்தியா-பிரிட்டன் செயல்திட்டம் 2030’-இன்கீழ், இரு நாடுகளின் உறவுகளும் சிறப்பான முன்னேற்றம் கண்டு வருகின்றன. இருதரப்பு நல்லுறவில் மிகப் பெரிய வாய்ப்புகள் இருப்பதை, நானும் பிரதமா் நரேந்திர மோடியும் ஒப்பு கொண்டுள்ளோம். இரு நாடுகளும் பெரிதும் பலனடையும் வகையில், உண்மையிலேயே லட்சியமிக்க தடையற்ற வா்த்தக ஒப்பந்தம் ஏற்பட வேண்டுமென விரும்புகிறேன். அது, இருதரப்பு வா்த்தகா்கள் மற்றும் நுகா்வோருக்கு மிகப் பெரிய வாய்ப்புகளை கொண்டு வரும்.
இந்தியா-பிரிட்டன் இடையிலான தொடா்புகள் முன்னெப்போதும் இல்லாத அளவில் நெருக்கமடைந்துள்ளன. இதில் கொண்டாடுவதற்கு பல விஷயங்கள் உள்ளன.
அண்மையில் நடைபெற்ற பிரிட்டன் அரசா் முடிசூடும் நிகழ்வு நடைமுறைகளில், இந்திய வம்சாவளியினா் முக்கிய அங்கம் வகித்தனா்.
இது, இரு நாடுகளுக்கு இடையிலான ஆழமான பிணைப்புகள், வளமையான வணிக தொடா்புகள், பரஸ்பர கருத்து பரிமாற்றங்கள் மற்றும் முதலீடுகள் ஆகியவை முன்னெப்போதும் இல்லாத அளவில் வலுவாக உள்ளன என்பதை வெளிக்காட்டுகிறது. இந்த தொடா்புகளை மேலும் வலுவாக்க வேண்டுமென விரும்புகிறோம் என்றாா் ரிஷி சுனக்.
ஜி20 கூட்டமைப்புக்கு இந்தியா தலைமை வகித்து வரும் நிலையில், தில்லியில் செப்டம்பரில் நடைபெறவுள்ள ஜி20 உச்சிமாநாட்டையொட்டி இந்தியாவுக்கு பயணம் மேற்கொள்ள ஆவலுடன் உள்ளதாகவும் அவா் குறிப்பிட்டாா்.
இந்திய குளோபல் ஃபோரம் சாா்பில் 5-ஆவது ஆண்டு பிரிட்டன்-இந்தியா வாரம் கொண்டாட்ட நிகழ்ச்சிகள், கடந்த 26-ஆம் தேதி தொடங்கின. வெள்ளிக்கிழமை (ஜூன் 30) வரை நடைபெறும் இந்நிகழ்ச்சிகளில், இருதரப்பு அரசுகளின் பிரதிநிதிகள், தொழிலதிபா்கள், கொள்கை வகுப்பாளா்கள் உள்ளிட்டோா் பங்கேற்றுள்ளனா்.
இந்தியா, பிரிட்டன் இடையிலான தடையற்ற வா்த்தக ஒப்பந்தம் தொடா்பாக இதுவரை 10 சுற்று பேச்சுவாா்த்தைகள் நடைபெற்றுள்ளன. 11-ஆவது சுற்று பேச்சுவாா்த்தை அடுத்த சில வாரங்களில் தொடங்கவுள்ளது.
முதுபெரும் முன்னாள் சீக்கிய வீரருக்கு விருது: இரண்டாம் உலகப் போரின்போது நேச நாடுகளின் படையில் பங்கேற்று போரிட்ட முன்னாள் சீக்கிய வீரா் ராஜிந்தா் சிங் தத்துக்கு, மேற்கண்ட நிகழ்ச்சியில் ‘பாயிண்ட்ஸ் ஆஃப் லைட்’ விருதை ரிஷி சுனக் வழங்கி கெளரவித்தாா்.
தற்போது 101 வயதாகும் ராஜிந்தா், ‘பிரிவினைக்கு முந்தைய இந்தியாவின் முன்னாள் ராணுவ வீரா்கள் சங்கத்தை’ நடத்தி வருகிறாா். இரண்டாம் உலகப் போரில் பங்கேற்ற சீக்கிய வீரா்களில் கடைசி நபரான இவா், தற்போது லண்டனில் வசிக்கிறாா்.