மேற்கு வங்க மாநிலத்தில் ஆசிரியா் நியமன முறைகேடு தொடா்பான வழக்கில் தொடா்புடையதாக குற்றச்சாட்டுக்கு உள்ளாகியுள்ள சுஜய் கிருஷ்ண பத்ராவை அமலாக்கத் துறை அதிகாரிகள் செவ்வாய்க்கிழமை இரவு கைது செய்தனா்.

கொல்கத்தாவில் உள்ள அமலாக்கத் துறை அலுவலகத்தில் அவரிடம் செவ்வாய்க்கிழமை தொடா்ந்து 12 மணி நேர விசாரணையை மேற்கொண்ட அதிகாரிகள், விசாரணை முடிவில் அவரைக் கைது செய்தனா்.

மேற்கு வங்கத்தில் மாநில அரசு மற்றும் அரசு உதவி பெறும் பள்ளிகளில் மேற்கொள்ளப்பட்ட ஆசிரியா் பணி நியமனங்களில் முறைகேடு நிகழ்ந்ததாகக் குற்றச்சாட்டு எழுந்தது. இதுதொடா்பாக சிபிஐ மற்றும் அமலாக்கத் துறை விசாரணை மேற்கொண்டு வருகிறது.

பள்ளிகளில் ஆசிரியா் பணி வழங்க 130 பேரிடம் தலா ரூ.8 லட்சம் லஞ்சம் பெறப்பட்டதாகவும், மாநில முன்னாள் கல்வி அமைச்சா் பாா்த்தா சாட்டா்ஜி மற்றும் இதர செல்வாக்குமிக்க நபா்களுக்கு அந்தப் பணம் கைமாறியதாகவும் அமலாக்கத் துறை குற்றஞ்சாட்டியுள்ளது.

இந்த முறைகேடு தொடா்பாக பாா்த்தா சாட்டா்ஜி, திரிணமூல் காங்கிரஸ் எம்எல்ஏவும் மாநில தொடக்கக் கல்வி வாரிய முன்னாள் தலைவருமான மானிக் பட்டாச்சாா்யா, திரிணமூல் காங்கிரஸ் இளைஞரணி முன்னாள் தலைவா் குண்டல் கோஷ், அக்கட்சியைச் சோ்ந்த சாந்தனு பானா்ஜி உள்ளிட்டோா் கைது செய்யப்பட்டனா்.

இந்த முறைகேட்டில் திரிணமூல் காங்கிரஸ் தலைவா்களுக்கு உள்ள தொடா்பு குறித்து விசாரணை மேற்கொள்ளுமாறு சிபிஐ மற்றும் அமலாக்கத் துறைக்கு கடந்த மாதம் கொல்கத்தா உயா்நீதிமன்றம் உத்தரவிட்டது. அதன்படி, மேற்கு வங்க முதல்வா் மம்தா பானா்ஜியின் உறவினரும், திரிணமூல் காங்கிரஸ் எம்.பி.யுமான அபிஷேக் பானா்ஜியிடம் கொல்கத்தாவில் உள்ள சிபிஐ அலுவலகத்தில் அதிகாரிகள் அண்மையில் 9 மணி நேரம் விசாரணை மேற்கொண்டனா்.

இந்த முறைகேட்டில் சுஜய் கிருஷ்ண பத்ரா என்பவருக்கு உள்ள தொடா்பு குறித்து அபிஷேக் பானா்ஜியிடம் விசாரணை நடத்தியதாக தகவல்கள் வெளியாகின. இந்த முறைகேடு தொடா்பாக பத்ராவிடம் சிபிஐ அதிகாரிகள் ஏற்கெனவே இரு முறை விசாரணை நடத்தியுள்ளனா்.

சுஜய் கிருஷ்ண பத்ராவிடம் விசாரணை நடத்த அமலாக்கத் துறை அதிகாரிகளும் முடிவு செய்து, அதற்கான அழைப்பாணையை அவருக்கு கடந்த வாரம் அனுப்பினா். அதை ஏற்று, விசாரணைக்காக கொல்கத்தாவில் உள்ள அமலாக்கத் துறை அலுவலகத்தில் பத்ரா செவ்வாய்க்கிழமை ஆஜரானாா். அவரிடம் தொடா்ந்து 12 மணி நேரம் விசாரணை நடத்திய அதிகாரிகள், விசாரணை முடிவில் அவரைக் கைது செய்தனா்.

இதுகுறித்து அமலாக்கத் துறை அதிகாரி ஒருவா் கூறுகையில், ‘அதிகாரிகளின் விசாரணைக்கு பத்ரா ஒத்துழைப்பு அளிக்கவில்லை. ஆசிரியா் நியமன முறைகேடு தொடா்பாக சில கேள்விகளுக்கு அவரிடமிருந்து பதில் பெற அதிகாரிகள் முயற்சித்தனா். ஆனால், பலனளிக்கவில்லை. அதைத் தொடா்ந்து அவரை அதிகாரிகள் கைது செய்தனா்’ என்றாா்.

மக்களைத் திசைதிருப்பவே கைது நடவடிக்கை - திரிணமூல் காங்கிரஸ்: சுஜய் கிருஷ்ண பத்ரா கைது குறித்து கருத்து தெரிவித்த திரிணமூல் காங்கிரஸ் செய்தித் தொடா்பாளா் குணால் கோஷ், ‘மாநிலத்தில் காங்கிரஸ் கட்சியின் ஒரே சட்டப்பேரவை உறுப்பினரான பைரோன் பிஸ்வாஸ் திரிணமூல் காங்கிரஸ் கட்சியில் செவ்வாய்க்கிழமை இணைந்தாா். இது பாஜக, மாா்க்சிஸ்ட் கம்யூனிஸ்ட் மற்றும் காங்கிரஸ் உள்ளிட்ட எதிா்க்கட்சிகளிடையே பெரும் பதற்றத்தை ஏற்படுத்தியுள்ளது. இதுகுறித்து விவாதிப்பதிலிருந்து மக்களின் கவனத்தை திசைதிருப்பவே, இந்தக் கைது நடவடிக்கை மேற்கொள்ளப்பட்டிருக்கலாம்’ என்றாா்.

மாநில பாஜக செய்தித் தொடா்பாளா் சமிக் பட்டாச்சாரியா கூறுகையில், ‘ஆசிரியா் நியமன முறைகேடு வழக்கில் இதுவரை மேற்கொள்ளப்பட்டுள்ள கைது நடவடிக்கைகளில் இப்போதைய கைது முக்கியமானதாகும். இந்த முறைகேட்டில் மூளையாக செயல்பட்டவா்கள் மற்றும் மிகப் பெரிய அளவில் பலனடைந்தவா்களைக் கண்டறியும் சட்ட நடவடிக்கை இறுதிக்கட்டத்தை எட்டி வருகிறது. இந்த ஊழலில் தொடா்புடைய திரிணமூல் காங்கிரஸ் தலைவா்களின் பட்டியல் மிக நீண்டதாகும்’ என்றாா்.

மாநில காங்கிரஸ் தலைவா் அதீா் ரஞ்சன் செளதரி கூறுகையில், ‘இந்த முறைகேட்டில் தொடா்புடைய திரிணமூல் காங்கிரஸ் கட்சியின் உயா் தலைவா்கள் சிறைக்குச் செல்லும் நாள் வெகு தொலைவில் இல்லை’ என்றாா்.