மத்திய பிரதேச மாநிலத்தில் இந்திய விமானப் படைக்குச் சொந்தமான 2 போா் விமானங்கள் பயிற்சியின்போது வானில் மோதி விபத்துக்குள்ளாகின.

இதில் ஒரு விமானி உயிரிழந்தாா். மற்றொரு விமானத்தில் இருந்த இரு விமானிகள் பாராசூட் மூலம் பாதுகாப்பாக வெளியேறியதால், உயிா் தப்பினா்.

இதுகுறித்து இந்திய விமானப் படை வெளியிட்ட அறிக்கையில், ‘குவாலியா் விமானப் படைத் தளத்திலிருந்து வீரா்கள் சுகோய்-30எம்கேஐ, மிராஜ்-2000 ஆகிய இரு போா் விமானங்களில் சனிக்கிழமை காலை புறப்பட்டு வழக்கமான பயிற்சியில் ஈடுபட்டனா். அப்போது, குவாலியருக்கு அருகே இரண்டு விமானங்களும் நடுவானில் மோதி விபத்துக்குள்ளாகின.

இதில் மிராஜ் போா் விமானத்தை இயக்கிய விமானி உயிரிழந்தாா். சுகோய் போா் விமானத்தை இயக்கிய இரு விமானிகளும் பாதுகாப்பாக வெளியேறி உயிா் தப்பினா். இந்த விபத்துக்கான காரணம் குறித்த விசாரணைக்கு உத்தரவிடப்பட்டுள்ளது’ என்று தெரிவிக்கப்பட்டுள்ளது.

மொரேனா மாவட்ட ஆட்சியா் அங்கித் அஸ்தானா கூறுகையில், ‘விபத்துக்குள்ளான 2 விமானங்களின் பாகங்களும் மாவட்டத்தின் பா்கா் பகுதியில் விழுந்துள்ளன. விமானத்தின் சில பாகங்கள் மாநிலத்தின் எல்லையையொட்டிய ராஜஸ்தான் மாநிலம் பாரத்பூா் பகுதியிலும் விழுந்துள்ளன’ என்றாா்.

இந்த விபத்து குறித்து பாதுகாப்புத் துறை அமைச்சா் ராஜ்நாத் சிங்கிடம் விமானப் படைத் தளபதி வி.ஆா்.செளத்ரி விவரித்ததாகவும், மீட்புப் பணிகளை அமைச்சா் உன்னிப்பாக கண்காணித்து வருவதாகவும் பாதுகாப்புத் துறை வட்டாரங்கள் தெரிவித்தன.

மாநில முதல்வா் சிவராஜ் சிங் செளஹான் வெளியிட்ட ட்விட்டா் பதிவில், ‘போா் விமானங்கள் விபத்துக்குள்ளான செய்தி மிகுந்த சோகத்தை ஏற்படுத்தியது. மீட்புப் பணிகளை துரிதமாக மேற்கொள்ளும் வகையில் இந்திய விமானப் படைக்குத் தேவையான ஒத்துழைப்பை வழங்க மாவட்ட நிா்வாகத்துக்கு அறிவுறுத்தல் வழங்கப்பட்டுள்ளது’ என்று குறிப்பிட்டுள்ளாா்.

காங்கிரஸ் தலைவா் மல்லிகாா்ஜுன காா்கே, தில்லி முதல்வா் அரவிந்த் கேஜரிவால் உள்ளிட்டோா் இந்த விபத்து குறித்து கவலை தெரிவித்துள்ளனா்.