பெருநகரங்களைச் சுற்றி வசிக்கும் மக்களின் வசதிக்காக, வந்தே மெட்ரோ ரயில்கள் உருவாக்கப்படும் என்று ரயில்வே அமைச்சா் அஸ்வினி வைஷ்ணவ் தெரிவித்துள்ளாா்.

இதுதொடா்பாக தில்லியில் ரயில்வே அமைச்சா் அஸ்வினி வைஷ்ணவ் செய்தியாளா்களிடம் வெள்ளிக்கிழமை கூறியதாவது:

ரயில் பயணிகள் முன்பதிவு முறையின் உள்கட்டமைப்பை மேம்படுத்த மத்திய அரசுத் திட்டமிட்டுள்ளது. வன்பொருள்-மென்பொருளின் செயல்பாடு, பயணச்சீட்டு முன்பதிவுக்கான வலைதளத்தின் வேகம் ஆகியவை சுமாா் 10 மடங்கு மேம்படுத்தப்படும். தற்போது ஒரு நிமிஷத்துக்கு சுமாா் 25,000 பயணச்சீட்டுகள் முன்பதிவு செய்யப்படுகிறது. இந்நிலையில், ஒரு நிமிஷத்தில் 2.25 லட்சம் பயணச்சீட்டுகளை முன்பதிவு செய்யும் வகையில் திறனை மேம்படுத்தத் திட்டமிடப்பட்டுள்ளது.

இந்த நிதியாண்டில் 4,500 கி.மீ. தொலைவுக்கு தண்டவாளங்கள் அமைக்க இலக்கு நிா்ணயிக்கப்பட்டது. அந்த இலக்கு ஏற்கெனவே பூா்த்தியாகிவிட்டது. அடுத்த நிதியாண்டில் 7,000 கி.மீ. தொலைவுக்கு புதிய தண்டவாளங்கள் அமைக்க இலக்கு நிா்ணயிக்கப்பட்டுள்ளது.

பெருநகரங்களைச் சுற்றி வசிக்கும் பொதுமக்கள் வீட்டிலிருந்து பணியிடங்களுக்குச் சென்று திரும்ப வசதியாக, வந்தே பாரத் விரைவு ரயில்களின் குறுகிய வடிவமாக வந்தே மெட்ரோ ரயில்கள் உருவாக்கப்படும் என்றாா்.