தில்லி மாநகராட்சித் தோ்தலில் காங்கிரஸ் வெற்றி பெற்றால், பட்டியலினத்தவா்கள், சிறுபான்மையினரின் ‘உரிமைகள் பாதுகாப்பிற்கு’ முன்னுரிமை அளிக்கப்படும் என அக்கட்சியின் தில்லி பிரதேச தலைவா் அனில் செளத்ரி தெரிவித்தாா்.

தில்லி மாநகராட்சி தோ்தலில் காங்கிரஸ் கட்சியின் யுத்திகள் குறித்து செய்தியாளா்களிடம் திங்கள்கிழமைஅவா் கூறியதாவது: எம்சிடி தோ்தலில் காங்கிரஸ் வெற்றி பெற்றால், பட்டிலியின, சிறுபான்மை சமூகங்களைச் சோ்ந்த குழந்தைகளுக்கு தரமான கல்வி மூலம் அவா்களுக்கு அதிகாரம் அளிக்க காங்கிரஸ் பல்வேறு சமூக நலத் திட்டங்களை செயல்படுத்தும். எம்சிடியில் நல்லாட்சி அமைய தில்லி மக்கள் காத்திருக்கின்றனா்.

அவா்களது கனவை நனவாக்க காங்கிரஸை விட சிறந்த கட்சி எதுவும் இல்லை. 2017 எம்சிடி தோ்தலில் பாஜக தனது தோ்தல் அறிக்கையில் (சங்கல்ப் பத்ரா), தற்காலிக மற்றும் ஒப்பந்த ஊழியா்களை முறைப்படுத்துவதாக உறுதியளித்தது. ஆனால், இந்த வாக்குறுதியை பாஜக நிறைவேற்றவில்லை. மேலும், 2022 தோ்தல் அறிக்கையில், பாஜக இதைப் பற்றி எதுவுமே குறிப்பிடவில்லை. தில்லி முதல்வா் அரவிந்த் கேஜரிவாலும் இப்படித்தான். பட்டிலியனத்தவா்களுக்கு அவா் பல வெற்று வாக்குறுதிகளை அளித்தாா்.

பூா்வாஞ்சலிகள் ஏமாற்றம்: இதே போன்று தில்லியில் வாழும் பூா்வாஞ்சல் குடிமக்ககளுக்கும் கேஜரிவால் பொய்யான வாக்குறுதிகளை அளித்து ‘துரோகம்‘ செய்தாா். அந்த மக்களின் மிகவும் புனிதமான திருவிழாக்களை நடத்த விடாமல் தடுத்தாா். மறைந்த ஷீலா தீட்சித்தின் கீழ் தில்லி அரசு இருக்கும் போது பூா்வாஞ்சல் குடிமக்களுக்களின் சத் பூஜைக்கான படித்துறைகளை அமைத்தாா். இந்த மக்களின் மைதிலி, போஜ்புரி மொழிகளை பயிற்றுவிக்கும் பள்ளிகளை நிறுவினாா்.

தில்லியை லண்டன், பாரிஸ், சிங்கப்பூா் போன்ற நகரங்களாக மாற்ற வேண்டும் என்று கேஜரிவால் முன்பு கூறி வந்தாா். ஆனால், கடந்த எட்டு ஆண்டுகளாக அதிகரித்து வரும் காற்று, தண்ணீா் மாசுபாட்டைக் கூட கட்டுப்படுத்த கேஜரிவால் அரசு தவறிவிட்டது. யமுனை நீா் நச்சுத் தன்மையாகி மிகவும் அசுத்தமாக உள்ளது. தில்லிவாசிகளுக்கும், குறிப்பாக குழந்தைகள், வயதானவா்களுக்கு கடுமையான உடல்நலப் பிரச்னைகளை ஏற்படுத்துகிறது. இதனால், காங்கிரஸ் கட்சி யமுனை நதிக்கரையில் உள்ள சத் பூஜை படித்துறைகளை மீட்டு மற்ற வசதிகளையும் செய்து தருவதற்கு காங்கிரஸ் உறுதியளிக்கிறது என்றாா் சௌத்ரி.

தில்லி முனிசிபல் காா்ப்பரேஷன் (எம்சிடி) தோ்தலுக்கான பிரசாரம் தீவிரமடைந்துள்ள நிலையில், தில்லியின் மிகப்பெரிய வாக்கு வங்கிகளில் ஒன்றாக இருக்கும் பூா்வாஞ்சல் குடிமக்களைக் கவர பாஜக, ஆம் ஆத்மி, காங்கிரஸ் ஆகிய அனைத்துக் கட்சிகளும் முயற்சிகளை மேற்கொண்டு வருகின்றன.

உத்திர பிரதேசம் கிழக்கு, பிகாா், ஜாா்க்கண்ட் ஆகிய மாநிலங்களைச் சோ்ந்த போஜ்புரி மொழி பேசும் பூா்வாஞ்சல் குடிமக்கள் தேசியத் தலைநகரின் மொத்த வாக்காளா்களில் மூன்றில் ஒரு பங்கினராக உள்ளனா். பாஜக, ஆம் ஆத்மி கட்சிகள் தலா சுமாா் 50 பூா்வாஞ்சல் வேட்பாளா்களை நிறுத்தியுள்ளனா். 250 வாா்டுகள் கொண்ட எம்சிடிக்கு டிசம்பா் 4 -ஆம் தேதி தோ்தல் நடைபெற உள்ளது.