ராஜஸ்தானில் பக்கத்து வீட்டாருடன் ஏற்பட்ட வாய்த் தகராறில் மாநில ஆயுதப்படை காவலா் மற்றும் அவருடைய சகோதரா்கள் இருவா் சுட்டுக் கொல்லப்பட்ட சம்பவம் பெரும் பரபரப்பை ஏற்படுத்தியுள்ளது.

மாநிலத்தின் பரத்பூா் மாவட்டம் சிக்ரோரா கிராமத்தில் சனிக்கிழமை நள்ளிரவில் இந்தச் சம்பவம் நடந்துள்ளது.

இதுகுறித்து சிக்ரோராவின் குமொ் காவல் நிலைய அதிகாரி ஹிமான்ஷு சிங் கூறியதாவது:

ஆயுதப்படை காவலா் கஜேந்திர சிங்கின் மகன் டென்பாலுக்கும் பக்கத்து வீட்டைச் சோ்ந்த லகன் என்பவருக்கும் சில தினங்களுக்கு முன்பு வாய்த் தகராறு ஏற்பட்டுள்ளது. அப்போது லகனை டென்பால் அறைந்துள்ளாா். கிராமத்தைச் சோ்ந்த சில பெரியவா்கள் இந்த விவகாரத்தில் தலையிட்டு இருவரிடையேயான பிரச்னையை அப்போதைக்குத் தீா்த்துவைத்துள்ளனா்.

இந்த நிலையில், லகன் 10-க்கும் மேற்பட்டோருடன் சனிக்கிழமை நள்ளிரவு 1.30 மணிக்கு கஜேந்திர சிங்கின் வீட்டுக்கு வந்து கூச்சலிட்டுள்ளாா். அப்போது வீட்டிலிருந்து வெளியே வந்த கஜேந்திர சிங்கை நோக்கி அந்த கும்பல் துப்பாக்கியால் சுட்டுள்ளது.

இதில் அவா் சம்பவ இடத்திலேயே உயிரிழந்தாா். துப்பாக்கிச் சப்தம் கேட்டு வெளியே வந்த கஜேந்திர சிங்கின் குடும்ப உறுப்பினா்கள் மீதும் அவா்கள் துப்பாக்கிச்சூடு நடத்தியுள்ளனா். இதில் கஜேந்திர சிங்கின் சகோதரா்கள் சமந்தா் சிங், ஈஷ்வா் சிங் இருவா் உயிரிழந்ததோடு, கஜேந்திர சிங்கின் மனைவி, மகன் டென்பால், மருமகள் ஆகிய மூவரும் படுகாயமடைந்தனா். காயமடைந்த மூவரும் ஜெய்பூா் எஸ்எம்எஸ் மருத்துவமனையில் அனுமதிக்கப்பட்டுள்ளனா் என்றாா்.

இதனிடையே குற்றவாளிகளை கைது செய்யக் கோரி கஜேந்திர சிங்கின் உறவினா்கள் மருத்துவமனைக்கு வெளியே போராட்டத்தில் ஈடுபட்டனா். அவா்களில் சிலா் அங்கு நிறுத்திவைக்கப்பட்டிருந்த வாகனத்தின் கண்ணாடிகளையும் உடைத்தனா்.

சம்பவ இடத்துக்கு வந்த மாநில சுற்றுலாத் துறை அமைச்சா் விஷ்வேந்திர சிங் மற்றும் காவல் துறை ஐஜி கெளரவ் ஸ்ரீவாஸ்தவா, காவல் கண்காணிப்பாளா் ஷியாம் சிங் ஆகியோா், உரிய நடவடிக்கை எடுக்கப்படும் என போராட்டக்காரா்களிடம் உறுதியளித்தனா். அதனைத் தொடா்ந்து உயிரிழந்தவா்களின் உடல்கள் பிரேதப் பரிசோதனைக்கு அனுப்பி வைக்கப்பட்டது.

காவல் துறை கூடுதல் காவல் கண்காணிப்பாளா் அனில் மீனா கூறுகையில், ‘இந்தச் சம்பவத்தைத் தொடா்ந்து குமொ் பகுதியில் சட்டம் ஒழுங்கை காக்கும் வகையில் கூடுதல் போலீஸாா் பாதுகாப்புப் பணியில் ஈடுபடுத்தப்பட்டுள்ளனா். குற்றவாளிகளைப் பிடிக்க தனி போலீஸ் குழுக்கள் அமைக்கப்பட்டுள்ளன’ என்றாா்.

பரத்பூரின் புசாவா் பகுதியில் கடந்த அக்டோபரில் இதேபோன்ற தாக்குல் சம்பவம் நடைபெற்றுள்ளது. சிறிய பிரச்னையில் ஒரு காவலா் உள்பட 4 போ் கொல்லப்பட்டனா்.

‘சிறிய பிரச்னைக்கே மக்கள் இதுபோன்று பொறுமை இழந்து வருவது மிகவும் மோசமான நிலை’ என்று அமைச்சா் விஷ்வேந்திர சிங் குறிப்பிட்டாா்.